iVaqa ni Veisiko
Bubului kei na Veiyalayalati ni Matabete
Vulica ena masumasu na itukutuku oqo ka vakasaqara na veivakauqeti mo kila na ka me wasei. Ena vakarautaki ira vakacava na luve ni Kalou yalewa ki na veivakalougatataki ni bula tawamudu na kena kilai deivaki na inaki ni iSoqosoqo ni Veivukei?
Na levu ga ni noda kila vinaka na marama na bubului kei na veiyalayalati ni matabete ni sa noda bula yadua, na kena levu cake noda ciqoma na veivakalougatataki kei na yalayala ni matabete.
E kaya o Elder M. Russell Ballard ena Kuoramu ni iApositolo Le Tinikarua, “O ira kece era sa cakava na veiyalayalati tabu kei na Turaga ka ra rokova na veiyalayalati oqori sa rawa ni ra ciqoma na ivakatakila yadua, me ra vakalougatataki ena veiqaravi ni agilosi, me ra veitaratara kei na Kalou, me ra rawata na taucoko ni kosipeli, ka me kena ilutua, me ra vakaivotavota vata kei Jisu Karisito ena veika kecega e tu vei Tamada”1
Na veivakalougatataki kei na yalayala ni bubului kei na veiyalayalati ni matabete sa baleta na tagane kei na yalewa talega. E kaya o Sister Sheri L. Dew, daunivakasala vakacegu ena Mataveiliutaki Raraba ni iSoqosoqo ni Veivukei, “Na taucoko ni matabete sa umanaki tu ena cakacaka vakalotu cecere duadua ni vale ni Turaga ena rawa me ciqomi duadua ga mai na nodrau cokovata e dua na tagane kei na yalewa.”2
Sa kaci kina vakaoqo o Sister Linda K. Burton, na Peresitedi ni iSoqosoqo ni Veivukei, “Au sa sureti iko mo cavuqaqataka na bubului kei na veiyalayalati ni matabete, e tiko ena Vunau kei na Veiyalayalati 84:33-44. Ni caka oqo, au yalataka ni na vakarabailevutaka na Yalo Tabu na nomu kila vinaka na matabete ka vakauqeta ka laveti iko cake ena veisala totoka.”3
Na inaki ni ivakasala nei Josefa Simici ki na iSoqosoqo ni Veivukei o ya me vakarautaki ira na marama me ra “na taukena na madigi kei na veivakalougatataki kei na isolisoli ni matabete.” Oqo ena rawa ga ena cakacaka vakalotu ena valetabu.
“Na cakacaka vakalotu ni valetabu [sa] cakacaka vakalotu ni matabete, ia era [sega] ni solia na itutu vakalotu vei ira na tagane se yalewa. [Na cakacaka vakalotu oqo sa yaco] kina na yalayala ni Turaga ni o ira na nona tamata—yalewa kei na tagane—era na ‘vakalougatataki ena kaukauwa mai lomalagi’ [V&V 38:32].”4
iKuri ni iVolanikalou kei na iTukutuku
Vunau kei na Veiyalayalati 84:19–40; 121:45–46; reliefsociety.lds.org
Vakabauta Matavuvale Veivukei