Me Yacova ni Da qai Sota Tale
Na Kaukauwa ni Kalou
Mai na dua na vosa ena soqoni raraba ni matabete ka kena ulutaga “Na iVunau ni Matabete,” Ensign, Me 1982, 32–34; vakadeitaki na matanivola levu.
Na vakabauta na kaukauwa kei na kaukauwa sai koya na matabete.
Kaucake na Koro Levu ko Saioni, mai vei Del Parson
E Kalou na Kalou baleta ni sai koya na waqawaqa ni vakabauta kecega kei na kaukauwa kecega kei na matabete kecega. Na bula e bulataka e vakatokai na bula tawamudu.
Na iyalayala eda na yacova ena noda vakataki Koya na iyalayala eda rawata kina na Nona vakabauta, rawata Nona kaukauwa, kei na noda cakacakataka Nona matabete. Ia ni da sa yaco me vakataki Koya ena kena vakasama dina taucoko, eda na qai rawata talega na bula tawamudu.
Na vakabauta kei na matabete erau veitauriliga. Na vakabauta na kaukauwa kei na kaukauwa sai koya na matabete. Ni da sa rawata na matabete, eda qai ciqoma na matabete. Ia, mai na matabete, eda na tubu ena vakabauta me yacova, ni sa tu vei keda na kaukauwa kece, eda sa yaco me vaka na noda Turaga.
Na noda gauna eke ena bula oqo sa gauna vakawawa kei na vakatovolei. Sa noda galala ni da tiko eke me da vakavinakataka sara na noda vakabauta ka tubu ena kaukauwa vakabete. …
Na matabete tabu a vakayacora e levu cake na ka me vakavinakataki kina na tamata ena gauna i Inoke mai na veigauna kece tale. Dau kilai ena gauna oya me ivakarau i Inoke (raica V&V 76:57), sai koya na kaukauwa era a vakamataliataki kina o koya kei ira na nona tamata. Era sa vakamataliataki baleta na nodra vakabauta kei na nodra cakacakataka na kaukauwa ni matabete.
E cakava vata kei Inoke na Turaga e dua na veiyalayalati tawamudu ni o ira kece era ciqoma na matabete ena tu vei ira na kaukauwa, ena vakabauta, me ra liutaka ka lewa na veika kece e vuravura, me vakadruka kina na mataivalu ni veivanua kecega, ka tu ena lagilagi ka vakacerecerei ena mata ni Turaga.
O Melikiseteki e dua e vakakina na nona vakabauta, “era sa ivalavala dodonu na nona tamata, ka rawati lomalagi, ka vakasaqara na koro nei Inoke” (iVakadewa nei Josefa Simici, Ai Vakatekivu 14:34). …
Sa qai cava, na ivunau ni matabete? Eda na qai bula vakacava vakaitalai ni Turaga?
Na ivunau oqo sai koya ni Kalou na Tamada e dua na kabula lagilagi, vinaka sara ka vakacerecerei ka tu vua na kaukauwa kecega, na mana kecega, kei na lewa kecega, o koya e kila na ka kecega ka tawayalani na nona itovonibula kecega, ka bula ena isoqosoqo ni matavuvale.
Sai koya ni tu vua na Tamada Tawamudu na ituvaki cecere oqo ni lagilagi kei na vinaka sara kei na mana baleta ni sa vinaka sara na Nona vakabauta ka sega ni yalani na Nona matabete.
Sai koya na matabete oqori na yaca ni kaukauwa ni Kalou, kevaka eda na yaco me vakataki Koya, sa dodonu me da ciqoma ka cakacakataka na Nona matabete se kaukauwa me vaka e cakacakataka o Koya. …
Sai koya ni tu vei keda na kaukauwa, ena vakabauta, me da liutaka ka lewa na ka kecega, vakayago ka vakayalo; me da cakamana ka vakataucokotaka na bula; me da tu ena iserau ni Kalou ka vakataki Koya ni da sa rawata na Nona vakabauta, Nona taucoko, kei na Nona kaukauwa, se ena dua tale na kena itukutukuni na taucoko ni Nona matabete.
Sai koya oqo, na ivunau ni matabete, e cecere cake mai na ka e sega ni dua na ka e cecere cake vua, ka sega talega ni dua na ka e cecere cake rawa vua. Sai koya oqo na kaukauwa eda rawa ni rawata mai na vakabauta kei na buladodonu …
E dina ni tu na kaukauwa ena matabete—e dua na kaukauwa eda segata me da rawata me da vakayagataka, na kaukauwa eda dau masuta vagumatua me tu vei keda kei ira na noda kawa me tawamudu.