Noda Vanua Galala
Droini mai vei Dan Burr
Sa Solia Vei Keda na Kalou na iYaya ni Cakacaka
E dau cakacakaniliga noqu momo ka dau caka waqa kau lalai ena tavaya. E dau taura e levu na gauna, vakanamata ni vakasama, kei na igu me rawa kina.
Ena dua na siga au raica nona iyaya ni cakacaka taucoko ka vakila na kena vakayagataki na iyaya ni cakacaka yadua me baleta na veitiki matailalai se ibulibuli ni waqa. Niu sarava toka nona cakacaka, au kurabui ena ivakarau ni nona vakayagataka na iyaya ni cakacaka me cakava kina na waqa eso oqo. A vakananumi vei au na italanoa kei Nifai ena nona taya e dua na waqa (raica 1 Nifai 17–18). A tara me vaka na kena ivakarau vua na Turaga, sega ena ivakarau ni tamata. Sa solia vei keda na Kalou na iyaya ni cakacaka me da dui tara noda waqa ena Nona ivakarau. Na ivolanikalou, na vakabauta, kei na loloma ni Kalou sai ira na iyaya ni cakacaka e dodonu meu vakayagataka ena noqu bula meu tara kina vakavinaka na noqu waqa ka sega na kena lalaqa. Au sa vulica tiko e veisiga yadua meu dua na tisaipeli ni Turaga.
Mara vía Mercedes G., mai Monagas, Venezuela
Yalo Galili
Ena dua na mataka batabata ena vulaitubutubu mai Denmark. Se qai tekivu na noqu kaulotu tudei, ka se malumalumu sara noqu ivakadinadina. E se qai 19 ga na vula na noqu lewe ni lotu voli ka sega tu vei au na yalodei baleta noqu sotava e dua na vanua vou, na vosa au sega ni rawa ni vosataka, kei na veibasogayaki ni gaunisala kau sega ni kila. Na noqu masu dau sinai ena vakavinavinaka sa totolo na kena yaco me veibeitaki wiwi: “Kemuni na Kalou, na cava o ni sa biuti au duadua tu kina?”
Ena dua na mataka au vakatakekere Vua ena masu. Ia sa sega ni tarogi “na cava na vuna” ena dela ni cudru ni yaloqu, au vakatakekere me dua na ivakadinadina ni dina vakosipeli ka tabonaki noqu vakatitiqa.
Ni oti na masu, au cega sara noqu ivolanikalou. Au cega sara Nai Vakarua 31:6: “Mo ni kaukauwa ka qaqa, kakua ni rere se sautaninini ena vukudra: ni sa lako vata kei kemuni ko Jiova na nomuni Kalou; ena sega ni weletaki kemuni, se biuti kemuni.”
E sinai na yaloqu ena reki niu raica na isau ni noqu masu: A tiko ga vata kei au na Kalou. A waraka tikoga o Koya na masu yalodina ka sega na veibeitaki ni veivakanadakui.
Ena sega vakadua ni laivi au na Kalou, kevaka sara mada ga sa sega na vakanuinui. Ka da rawa ni vakila na Nona rarama ni matanisiga mai na masu kei na Nona ivolanikalou.
Clayton E. mai Texas, Amerika