Domodra na Yalododonu Edaidai
Vukei Ena Lomani olo
Droini mai vei Allen Garns
Dau cakacaka vakalevu ena Sigatabu na watiqu, sa tiko kina vei au na itavi meu kauti iratou duadua na luvei keirau tagane e va ki lotu. Ena dua na Sigatabu ena soqoni ni sakaramede, rau veiqati toka na luvequ lalai. Kevaka e taleitaka e dua, na ivola au solia vua, ena vinakata mai na tacina kadua. Au tovolea na kakana, vakatatalo, kei na peniroka, sega ga ni yaga. Au sa vakadrukai saraga vei irau noqu cauravou, erau sega ni rawa ni dabe vakadua ena dua mada ga na auwa.
Au dreta mai noqu kato e dua na vakatatalo ka solia vua na noqu yabaki dua. Sega ni bera sa kaila noqu yabaki tolu, o Tyson, ena nona toqovi tacina lailai, ka tovolea me dreta na ka ni vakatatalo. Au sa madua dina ena noqu kauti rau ki na foya e rua na cauravou lalai, rau kaikaila ka veivala.
E tonawanawa na mataqu ena wainimata ni cudru. Na cava sa rui dredre kina na ka oqo? Au sa cakava tiko na ka e vinakata na Tamada Vakalomalagi meu cakava ena noqu kauti iratou mai noqu matavuvale ki lotu, se vakacava? Ia au sa sega saraga ni qai rawata tale. Sa ka ni oca ka veivakamaduataki vei au na vorati rau duadua tiko na noqu gonetagane ena gauna ni soqoni ni sakaramede e veimacawa. Au sega tale vakadua ni vinakata meu lesu tale mai.
Au dabe ka vakasamataka toka oqo me rauta beka ga ni 15 na sekodi, qai muri au mai ki na varada e dua na marama au se bera mada ga ni kilai koya vinaka. Na yacana o Sisita Beus. E dau dabe duadua voli ga, ni tiko ena matabisopi o watina ka ra sa ka lelevu na luvena. Qai kaya mai, “O dau lako duadua ga mai! Au rawa ni raica ni o sa tovolea tiko vakaukauwa. E rawa beka ni mai dabe vata kei au o Tyson?” Au sega mada ga ni vakasamataka rawa e dua na kena isau! Au deguvacu ga ni sa taura na ligana ka kauti koya yani, ena gauna oqo sa ruru ka marau, ki loma ni valenilotu.
Au qusia laivi na wainimataqu, taura cake na luvequ lailai, ka lako yani ena yalomalua ki loma ni valenilotu meu marautaka na vo ni soqoni.
Ena Sigatabu ka tarava ni keitou curu yani ki na soqoni ni sakaramede, e vaqarai nona itokani vou o Tyson. Ena bogi ena dau masu, “Tamaqu mai Lomalagi, au vakavinavinaka vakalevu me baleti Sisita Beus. Au lomani koya vakalevu sara!”
Sa oti oqo e tolu na yabaki, ena vuqa na gauna se dau vaqarai Sisita Beus voli ga e valenilotu o Tyson. Ena yabaki sa oti a kacivi me qasenivuli nei Tyson ena Lalai. A yaco me gonetagane lailai mamarau duadua me bula tiko o koya.
Au vakavinavinaka vakalevu ena vukui Sisita Beus kei na nona lomasoli me dau lomani ira ka qaravi ira na tani. Au kila ni rawa ni da dau vakalougatataka na nodra bula na tani ni da veiqaravi me vaka na iVakabula.