iTukutuku ni Mataveiliutaki Taumada
Era na Bula ena Vakabauta na tamata dodonu
Na Rapai kei na Daucaka Sovu
E dua na itukuni makawa vaka-Jiu ni daucaka sovu ka sega ni vakabauta na Kalou. Ena dua na siga erau a lako tiko kei na dua na rapai, qai kaya, “E dua na ka au sega ni rawa tiko ni ciqoma. Eda sa lotu tu ena vica na udolu na yabaki sa oti. Ia ena veivanua kecega o rai kina sa tu kina na ca, cakacaka vakailawaki, sega ni dina, sega ni dodonu, mosi, viakana, kei na ivalavala kaukauwa. Kena irairai ni se sega ni vakavinakataka rawa na vuravura na lotu. O koya au na tarogi iko kina, na cava beka na kena yaga?”
A sega mada ni sauma na rapai ia a lako tikoga vata kei na daucaka sovu. Me yacova ni rau sa namata yani ki na dua na rara, era qito tiko kina ena qele na gonelalai era qeleqelea tu.
“E dua na ka au sega ni ciqoma rawa tiko,” e kaya cake o rapai. “Raici ira mada na gone oya. Sa tu vei keda na sovu ena vica na udolu na yabaki, ia era se duka ga na gone oya. Na cava na betena na sovu?”
E sauma yani na daucaka sovu, “Rapai, e sega ni dodonu me bilitaki na sovu me baleti ira na gone duka oqo. E dodonu me vakayagataki mada na sovu me qai rawa na kena inaki.”
E matadredredre o rapai ka kaya, “Donu vinaka.”
Me da Bula Vakacava?
Na iApositolo ko Paula, ni cavuta tiko nona vosa e dua na parofita ni Veiyalayalati Makawa, e vakalekalekataka na kena ibalebale me vakabauta ena nona vola, “Era na bula ena vakabauta na tamata dodonu” (Roma 1:17).
E rairai ena iyatuvosa rawarawa oqo eda sa kila kina na kedrau duidui na lotu malumalumu ka sega ni mana kei koya e tu kina na kaukauwa me veisautaka na bula.
Ia me da kila na ibalebale ni bula ena vakabauta, sa dodonu me da kila na cava na vakabauta.
Na vakabauta e levu cake sara mai na vakanananu walega. Sai koya na vakanananu vakatabakidua vua na Kalou ka salavata kei na cakacaka.
E sa levu cake mai na diva tiko.
E levu cake mai na dabe toka ga, deguvacu na uluda, ka kaya ni da duavata. Ni da kaya ni ra “dau bula ena vakabauta na tamata dodonu,” eda tukuna tiko ni da tuberi ka liutaki ena noda vakabauta. Eda cakacaka ena dua na iwalewale e tautauvata kei na noda vakabauta—sega ena yalo ni talairawarawa sega ni vakasamataki ia ena yalodei kei na lomana dina na noda Kalou kei na yalomatua sega ni voli rawa sa vakatakila mai o Koya vei ira na Luvena.
Na vakabauta me na salavata kei na cakacaka; ke sega sa mate walega (raica na Jemesa 2:17). E sega sara ga ni vakabauta oqori. E sega kina na mana me veisautaka e dua mada ga na tamata, qai sega sara na vuravura.
Na tagane kei na yalewa vakabauta era na nuitaka na Tamada Vakalomalagi dauloloma—ena gauna sara mada ga ni veilecayaki, ena gauna sara mada ga ni lomalomarua kei na kalouca ena gauna era sega ni rai vakavinaka kina se kila vakamatata.
Na tagane kei na yalewa vakabauta era dau lakova ena yalodina na sala vakatisaipeli ka segata me ra muria na ivakaraitaki ni nodra iVakabula lomani, ko Jisu Karisito. Na vakabauta e vakayaloqaqataki keda ka, vakauqeti keda me da vagoleya na yaloda ki lomalagi me da dolele yani, laveta cake, ka vakalougatataki ira na kainoda.
Na lotu sega ni cakacakataki sa vaka na sovu tawa tu ga ena kena pakete. E vakasakiti beka na ka e rawa ni cakava, ia na ka dina e lailai sara na kena kaukauwa me vakayaco veisau me yacova ni sa vakataucokotaka na kena inaki. Na kosipeli vakalesui mai nei Jisu Karisito e kosipeli ni cakacaka. Na Lotu i Jisu Karisito e vakavuvulitaka na lotu dina me itukutuku ni inuinui, vakabauta, kei na loloma cecere, oka kina nodra vukei na wekada ena veika vakayalo ka vakayago.
Ena vica na vula sa oti, keirau a lako kei na watiqu, o Harriet, ena dua na gade vakamatavuvale kei ira eso na luvei keirau ena yasayasa vaka-Mediterenieni. Keirau a sikova eso na keba ni ise ka sota kei ira na veimatavuvale mai na veimatanitu vakacacani ena ivalu. O ira oqo era sega ni da vakabauta vata, ia era tacida ka ganeda ka ra gadreva vakatotolo sara na veivuke. E lauti vakatitobu na yaloi keirau ni keirau raica sara ga e matai keirau na kena kau mai na veivuke, veivueti, kei na inuinui ena nodra vakabauta cakacakataki na lewe ni noda Lotu vei ira na kainoda era leqa tu, era sega ni via wilika na nodra lotu, na vanua era lako mai kina, se na ituvaki ni nodra vuli.
Na vakabauta e vakaivuataki ena cakacaka e veigauna ena vakasinaita na uto ena yalovinaka, na vakasama ena yalomatua kei na kilaka, kei na yalo ena vakacegu kei na loloma.
Na noda vakabauta e rawa ni veivakalougatataki ka veivakayarayarataki vakadodonu ruarua vei ira era tu wavoliti keda kei keda.
Na noda vakabauta e rawa ni vakasinaita na vuravura ena vinaka kei na vakacegu.
Na noda vakabauta e rawa ni veisautaka na veicati ki na veilomani kei na veimecaki ki na veitokani.
O ira na tamata dodonu, ena gauna oya, era bula ena nodra cakacakataka nodra vakabauta; era bula ena nodra nuitaka na Kalou ka lakova na Nona sala.
Sai koya oqori na mataqali vakabauta e rawa ni veisautaka na tamata, matavuvale, matanitu, kei na vuravura.