Aapa Atu I Uo Fou

O Elder Neil L. Andersen ma lona faletua, o Kathy, na asiasi i le Ripapelika Temokarasi o Congo i Aferika. Sa faia le latou sauniga a le Ekalesia i fafo i lalo o ni faleie. Sa faataamilo i faleie se pa tele. Na iloa atu e Elder Andersen ni tamaiti o loo matamata mai ia i latou mai le isi itu o le pa. Sa fesili atu Sister Andersen ia te ia, “Mata e te manao e valaaulia tamaiti e o mai i totonu?” Sa savali atu Elder Andersen i le tamaloa i le masini faaleotele leo. Sa ia fai atu i le tamaloa e valaaulia tamaiti e o mai i totonu ma faatasi ma i latou.

Sa taufetuli mai tamaiti! Sa latou ataata uma ma le fiafia i le avea ai ma se vaega o le sauniga.

Na faamatala atu foi e Elder Andersen se tala i se taulealea e igoa ia Iosua na aapa atu i se isi tamaitiiti i le lotu.

Ina ua faatoa alu atu Iosefa, o se taulealea mai Uganda, i le lotu mo le taimi muamua lava, sa leai sona aiga iina e fesoasoani ia te ia e iloa le mea e alu i ai. Ona faailoa atu lea e faifeautalai o ia ia Iosua.

Sa tau atu e Iosua ia Iosefa o le a avea o ia ma ana uo. Na ia tuuina atu ia Iosefa se tusipese mo le Peraimeri, ma sa ia nofo i ona autafa. Ona usuina lea e le vasega a le Peraimeri “O au o se atalii o le Atua” ia Iosefa. Na galulue tagata uma ina ia lagona e Iosefa le taua tele, ae maise lava o lana uo fou, o Iosua. Ina ua la matutua, na auauna atu Iosua ma Iosefa o se soa faifeautalai!

Sa faamanatu mai e nei aafiaga ia Elder Andersen e faapea tatou te manaomia uma lava le aapa atu i tagata o loo siomia i tatou o e atonu o loo lagonaina le tuuatoatasi po o le na o ia.