?Olsem Wanem Mi Save Mekem Skripja Stadi blong Mi I Laef Bakegen?
Sarah Keenan
Yuta, YSA
Ol pikja oli kam long Bradley Clark
Mi bin kambak hom afta long misin blong mi blong tri manis nomo taem mi stat blong traehad blong stap ridim ol skripja.
Mi bin stap ridim ol skripja evri dei long misin blong mi mo mi bin promes se bae mi gohed taem bae mi kambak hom. Be taem i pas, ol samting oli kam blokem rod. Samtaem mi gat tumas homwok, mi bisi blong go wok, o mi taed tumas. Wetem wanwan eskius, skripja stadi blong mi i hafhaf kasem taem we mi nomo stap rid nating.
Mi bin openem Buk blong Momon long wan naet mo mi stap plan blong ridim wan ves nomo. Ves ia we mi bin ridim i mekem mi tingbaot se ol skripja oli tekem “toktok blong God we i mekem olgeta oli hapi, yes, toktok ia we i mekem ol sol we i gat soa i kam oraet bakegen” (Jekob 2:8).
Mi bin tingting hevi long ves ia mo mi luksave ol nogud saed we fasin blong no wantem stadi long ol skripja i mekem long mi. Mi filim se tingting i fasfas long skul, mi no kea long man long jos, mo mi stap go longwe long God. Sol blong mi i bin nidim toktok blong God we i mekem man i kam oraet bakegen, we i stap long ol skripja. Mi bin save se mi nidim blong putum bakegen ol samting long oda mo ol fas wok oli kam faswan.
Mi tanem mi i go long ol fren blong mi, ol famli, mo ol lida blong Jos blong askem sam tingting long wei blong mekem skripja stadi blong mi i laef bakegen. Mi bin faenem trifala samting we i bin help.
Faswan, mi bin luksave se, blong stadi long ol skripja blong mi long naet taem, i no wok long mi. Taem mi stadi long moning, i givim janis long mi blong mi tingting hevi truaot long dei long saed blong doktrin we mi bin ridim long moning ia.
Nambatu, oli tijim yumi blong ridim ol skripja blong yumi wetem ol famli blong yumi, be from mi bin stap long yunivesiti, mo mi stap longwe long famli, mi bin stat blong ridim ol skripja wetem olgeta we mifala i serem rum mo ol fren. Hemia i bin helpem mi blong mi ansa from stadi blong mi, mo i statem ol gudfala storian long saed blong gospel.
Nambatri, mi stat blong raetemdaon ol filing mo ol tingting we mi bin stap kasem long taem blong skripja stadi. Hemia i bin helpem mi blong lukluk nomo long wanem mi stap ridim mo i bin helpem mi blong haremsave moa voes blong Spirit.
Taem we skripja stadi i kam faswan long laef blong mi bakegen, mi bin faenem se mi gat moa taem mo paoa blong mekem evri samting we mi nidim blong mekem. Moa impoten, mi bin filim se mi kam kolosap long God bakegen taem mi stap ridim mo tingting hevi long ol skripja. Naoia, taem mi spendem taem long ol skripja, mi stap filim pis mo mi stap faenem hiling long sol blong mi.