Kasem Taem Yumi Mit Bakegen
Laef Bakegen long Ded I Ril
I Kam long Elda D. Todd Christofferson
Blong Kworom blong Olgeta Twelef Aposol
I kamaot long wan toktok we hem i bin givim long Epril 2014 jeneral konfrens.
Jisas Kraes, i tru, i wan nem ia nomo, o i wan wei ia nomo, we i save sevem man.
Pikja i kam long Yajaira Ramos
Blong wan smol taem, tingting long hamas Laef Bakegen long Ded i impoten blong stretem fogud tru aedentiti blong Jisas blong Nasaret, mo ol bigfala aedia mo toktok we oli agensem olgeta mo ol kwestin blong laef. Sapos i tru we, Jisas i bin laef bakegen long ded, i stret nomo se Hem i wan man we i hae, i tabu. I no gat man olbaot we i gat paoa insaed long hemwan blong laef bakegen afta we hem i ded. From se Hem i bin laef bakegen long ded, Jisas i no save stap nomo olsem wan kapenta, wan tija, wan rabae o wan profet. From se Hem i bin laef bakegen long ded, bifo i kam, Jisas i mas stap olsem wan God, iven Hem i Wan Stret Pikinini Ia Nomo blong Papa.
From hemia, wanem we Hem i bin tijim, i tru; God i no save giaman.
From hemia, Hem i bin Krieta blong wol olsem we Hem i bin talem.
From hemia, heven mo hel oli ril, olsem we Hem i bin tijim.
From hemia, i gat wan wol blong ol spirit, we Hem i bin visitim afta long ded blong Hem.
From hemia, bambae Hem i kam bakegen, olsem ol enjel oli bin talem, mo bambae “Hemwan, Hem i kam, i rul long wol ia” [Ol Toktok blong Bilif 1:10].
From hemia, i gat wan laef bakegen long ded mo wan las jajmen blong evriwan.
From se Laef Bakegen long Ded blong Kraes i tru, i no gat risen blong gat tu tingting se God Papa we i gat Olgeta Paoa, i Save Evri Samting, i gat open hat—mo i givim Wan Stret Pikinini ia Nomo blong Hem blong pemaot wol ia. Ol tu tingting long saed blong mining mo stamba tingting blong laef, oli no gat stamba blong hem. Jisas Kraes, i tru, i wan nem ia nomo, o i wan wei ia nomo, we i save sevem man. Gladhat blong Kraes i ril, i gat paoa blong fogivim man, mo blong klinim man we i mekem sin we i sakem sin. Fet, i tru, i bitim wan samting we man i mekemap o i tingting long tingting blong hem. I gat wan trutok we i tru evriwan mo i blong ful yunives, mo i gat ol stamba tingting blong kasem, mo ol standet blong fasin we oli no stap jenis, olsem we Hem i bin tijim.
From se Laef Bakegen long Ded blong Kraes i ril, fasin blong sakem sin blong brekem loa mo ol komanmen blong Hem i posibol, mo i mas hapen kwiktaem. Ol merikel blong Sevya oli ril, semmak olsem promes blong Hem long ol disaepol blong Hem se oli save mekem sem samting, mo iven ol wok we oli bigwan moa. Prishud blong Hem i nid blong i wan ril paoa we i “lukaotem gospel, mo i holem ki blong ol sikret blong kingdom, we i ki blong kasem save long saed blong God. From hemia, insaed long ol odinens blong hem, i gat paoa we i olsem hemia blong God, i kamaot” [D&C 84:19–20]. From se Laef Bakegen long Ded I ril, ded i no en blong laef blong yumi, mo nomata “sik i spolem skin blong [yumi] finis, be long bodi ia blong [yumi] bambae [yumi] luk God” [Job 19:26].