Aposol Elda Gary E. Stevenson i visitim Saot Pasifik
Vanuatu
Jos i stat long aelan blong Vanuatu samples 40 yia i pas. Las taem we wan memba blong Fas Presidensi o Kworom blong Olgeta Twelef Aposol i bin visitim kantri ia, hem i long yia 2003, taem we Presiden Gordon B. Hinckley i bin holem wan miting wetem olgeta memba. Tedei, kantri ia i gat wan stek, mo trifala distrik wetem moa long 8,000 memba blong Jos.
“Taem mifala i kasem longwe, oli welkamem mifala wetem wan bigfala tradisonol welkam, mo i gat wan lokol stringban mo danis. Taem ia i pulum tingting blong mi mo i bin gud tumas blong olgeta man ia, we plante long olgeta oli ol lokol prishud lida, oli mekem wan ‘strong danis blong man blong faet’ we i pat blong histri.”
Elda Stevenson i bin mitim ol memba, ol misinari mo ol yut long Vanuatu, mo tu, hem i bin mitim tufala bigfala politik lida—His Excellency Tallis Obed Moses, we i Presiden blong Ripablik blong Vanuatu, mo Onorabol Charlot Salwai Tabimasmas, we i Praem Minista blong Vanuatu. Elda Stevenson i bin talem tangkyu long olgeta lida ia blong letem ol memba blong Jos blong oli praktisim fet blong olgeta.
Hem i talem: “Hem i bin wan spesel janis wantaem blong save mit wetem ol lida blong gavman ia. Oli bin talem fulap gud samting mo tangkyu from ol memba blong yumi long Vanuatu mo from kontribusen blong yumi long kantri blong olgeta.”
Taem hem i bin stap mit wetem Presiden Obed, oli bin storian raon long impoten responsabiliti we ol papa mo mama oli gat blong fidim maen mo lukaotem ol pikinini blong olgeta blong oli kam ol gudfala sitisen mo ol gudfala lida long fiuja.
“Gavman i save pasem ol loa blong traem blong kontrolem o daonem ol kraem, be ol loa ia oli no save stopem ol kraem blong kam antap insaed long kantri,” Presiden Obed i talem. “Olgeta jos oli gat wan impoten rol blong mekem blong helpem ol sitisen blong mifala blong kam ol pipol we oli stap fraet long God.”
Praem Minista Salwai i bin tokbaot fasin blong tufala Kristin prinsipol we i stap long fandesen blong konstitusen blong Vanuatu: Ol valiu blong tradisen, mo bilif long God.
Ostrelia
Elda mo Sista Stevenson oli bin spendem ol fasfala tri dei blong olgeta long Adelahid, Ostrelia. Spesel haelaet blong visit ia i blong save mit wetem ol strong yut long wan maltistek divosen. Hem i bin givim advaes mo i bin leftemap tingting blong olgeta blong stap glad blong gat ol blesing blong gat wan bisop, blong holemtaet wan lukluk long saed blong gospel, mo skelem gud laef blong olgeta long saed blong spirit, mo blong tingbaot se Lod bambae i helpem olgeta wetem ‘ol tul’ blong faet agensem ol giaman blong Setan.
“Ol tul oli olsem: blong ridim Buk blong Momon, ol papa mo mama, ol profet, prea, go long seminari, buklet ia Blong Ol Yut Oli Kam Strong, mo blong stap klin inaf blong kasem wan tempol rekomen we i stap laef,” hem i talem.
Taem hem i bin stap longwe, hem i bin prisaed mo toktok long wan divosen miting wetem ol adalt memba, i bin gat wan misin miting, wan prishud lidasip konfrens, mo wan spesel stek konfrens. From samfala misinari mo prishud lida oli bin stap longwe, oli bin joen tru long wan satelaet brodkas.
Niu Silan
Long sot taem we hem i bin stop long Oklan, Elda Stevenson i bin mekem wan tua long Tempol Viu bilding, mo tu, Misinari Trening Senta long Niu Silan.
“Hem i wan long ol grup we oli moa bigwan blong joenem long Niu Silan MTS, we i bin gat samples 80 misinari,” Elda Stevenson i talem. “I bin gud tumas blong visitim Tempol Viu mo blong luk olgeta bilding ia we Presiden Eyring i jes dediketem. Taem mi bin stap olsem prisaeding bisop, bisoprik i gat responsabiliti blong lukluk long plan mo taem oli stap bildim ol bilding ia, mekem se i gud tumas blong luk olsem wanem ol bilding ia, we long wan taem oli bin Jos Kolej blong Niu Silan, naoia oli stap yusum blong wan niufala samting. Wan long ol bilding ia, i wan Jos Histri Miusiom bilding ia nomo we i stap aotsaed long Sol Lek Siti.”
Tahiti
“Jos long Tahiti i stap strong,” hem i talem. Jos i gat moa long 25,000 memba long naen stek mo trifala distrik long Franis Polinesia.
“Ol fas misinari we oli go long Franis Polinesia oli kasem longwe long 1843,” Elda Stevenson i talem. “Ol pipol longwe oli save Jos, mo hem i seken bigfala jos long aelan ia. Taem yu travel raon long aelan, yu luk ol mitinghaos blong yumi oli flasem evri ples.”
Wan haelaet blong visit blong hem long Tahiti i wan spesel kalja selebresen we i bin gat 2,000 pipol we oli bin joen long wan bigfala danis mo kaekae.
Elda Stevenson i bin mit tu wetem Akbisop Jean-Pierre Edmond Cottanceau, we i akbisop blong Papete, Franis Polinesia. Miting ia i bin wan taem blong taltalem tangkyu from wok we i stap hapen long kantri ia, we tufala jos i stap mekem.
“Hem i bin kaen mo glad, mo i luksave plante ples blong save wok wan taem i kam blong stap kea long olgeta we oli pua mo olgeta we oli stap long nid, mo blong stap developem ol fasin olsem hemia blong Kraes,” Elda Stevenson i talem abaot visit blong hem. “Mifala i agri se hem i impoten blong stap tijim ol yang pipol blong bildimap ol valiu blong gud fasin, mo blong stap developem tingting ia blong save wanem i raet mo wanem i rong.”
Ol kantri insaed long Eria blong Pasifik oli defdefren, mo i semmak long ol memba blong eria presidensi. Elda Haleck i kam long Ameriken Samoa, Elda Arden i kam long Niu Silan, mo Elda Cardon i kam long Arisona. Elda Stevenson i tinting mo talem se “oli karem i kam ol strong kombaen bakgraon mo kalja we bae i miks gud tugeta blong ol pipol oli save joen mo blong gud blong ol kalja blong ol pipol ia we oli stap givim seves long olgeta. Hem i wan glad blong stap wetem olgeta mo luk ol gudfala wok we oli stap mekem long naesfala eria ia blong wol ia.”