Ol Eksampol blong Bilif
Rakotomalala Alphonse
Sarodroa, Madagaska
Taem Rakotomalala i stat blong intres long gospel, jos we i bin stap kolosap i stap long Antsirabe, wan taon we i stap 50 kilometa longwe long vilej blong hem long Sarodroa. Rakotomalala mo wan fren, tufala i faenem wan rod blong go kasem longwe evri Sandei.
Tedei, long Sarodroa, i gat wan smol mitinghaos we i gat ova long 100 memba we i stap go ia evri Sandei. Rakotomalala i luk vilej blong hem i akseptem gospel. Fo misinari i bin stap mekem wok long Sarodroa mo Jos i stap gohed blong stap gro.
Cody Bell, fotografa
Taem bubuman blong mi i bin sik, mi bin go long Antsirabe blong stap wetem hem. Ol misinari oli stap visitim hem long haos blong hem plante taem. Bubuman mo mi i no memba blong Jos, be hem i laekem blong stap storian wetem ol misinari. Wan naet, oli bin givim wan blesing long bubuman, mo afta long wan famli haos naet, oli bin givim Buk blong Momon.
“Plis ridim buk ia mo askem God sapos hem i tru,” oli talem.
Taem mi bin gobak long Sarodroa, mi no bin wantem ridim Buk blong Momon from mi ting se hem i no tru. Afta, wan dei mi sik, we i mekem se mi stap long haos nomo blong plante dei. Mi stap lukaotem wan samting blong mekem. Mi faenem Buk blong Momon mo mi stat blong rid.
Afta, mi gobak long Antsirabe mo mitim ol misinari. Oli bin tijim mi abaot Buk blong Momon mo abaot Profet Josef Smit. Mi talem long olgeta se yumi no nidim ol profet mo i no gat profet tedei. Ol misinari oli askem mi blong prea long God mo askem sapos i gat wan profet i stap naoia. Oli bin promesem mi se bambae God i ansarem mi. Mi bin prea mo filim se wanem ol misinari oli bin stap talem i tru.
Mi bin wantem blong go long jos, be mi no gat mane blong pem bas. Mi toktok long fren blong mi, Razafindravaonasolo, mo sista ia i talem se mitufala i save ron long baeskel blong mi. Bae mitufala i stap ron tu aoa wan wei stat long Sarodroa i go kasem Antsirabe, evri Sandei. Taem bae mi taet, ale, bae mi go sidaon biaen long baeskel, mo hem nao bae i ron long hem. Taem bae hem i taed, bae mitufala stap jenisim ples bakegen.
Long en, famli blong Razafindravaonasolo mo mi i bin joenem Jos. Mifala i stap go long jos long Antsirabe kasem taem we wan branj i bin open long Sarodroa. !Mifala i bin hapi tumas taem mifala i bin save go long jos long stret vilej blong mifala!
Papa blong Razafindravaonasolo, oli bin singaotem hem i kam branj presiden. Wan dei, hem i toktok wetem mi mo leftemap tingting blong mi blong rere blong go long wan misin. Mi no ting se bae mi save go long misin, be hem i talem long mi se i posibol. Mi bin akseptem koling ia blong go long mekem wok long Madagaska Antananarivo Misin. Naoia mi mared mo mi gat tu pikinini. Mi talem tangkyu from famli blong mi, mo mi bin gat moa eksperiens bitim we mi bin save serem se i bin helpem mi blong save se Jos ia i tru.
Afta we hem i joenem Jos, Rakotomalala (long raet saed) i bin go long misin long Madagaska Antananarivo Misin, mo Razafindravaonasolo (long lef saed) i bin go long misin long Demokratik Ripablik blong Kongo Kinsasa Misin.
Long 2013, ol memba blong Sarodroa oli bin bildim smol wud japel ia blong oli wosip insaed long hem. Rakotomalala i hapi blong help blong mekem ol jenis we i nid long bilding.
Raes i wan stamba krop long Madagaska. Kolosap evriwan long Sarodroa oli wok long ol garen blong raes blong sapotem famli blong olgeta.
Taem Jos i stap gohed blong gro, ol memba long Sarodroa oli nidim wan niu japel. Wetem wan niu japel long nekis doa, Rakotomalala mo ol narawan oli wok blong jenisim olfala wud japel oli kam ol klasrum mo ofis blong bisop.
Stat long ol taem ia we oli bin ron tu aoa wan wei i go long jos evri Sandei, Rakotomalala mo Razafindravaonasolo oli gohed blong stap gudfala fren. Tufala i talem tangkyu from ol blesing we gospel i tekem i go long olgeta mo famli blong olgeta.
Rakotomalala mo Razafindravaonasolo, tufala i stanap long fored blong niufala japel long Sarodroa. Japel ia, we oli mekem long simen mo brikis, olgeta memba nomo oli bildim.