“!Jiam I Go long Reva!”
Elvin Jerome Laceda
Pampanga, Filipin
Pikja i kam long Gary Alfonso
Wan dei, bubuwoman blong mi i askem mi blong tekem sam kaekae we hem i rere i go long anti blong mi. Hem i wan hot Satedei aftenun, mo i gat plante nara samting we mi bin wantem mekem, be i no blong go mekem wan smol wok blong bubuwoman blong mi. Mi talem long hem se wan long ol kasen blong mi bae i go, be hem i talem se mi nomo bae mi go.
Wan aoa i pas, mo mi stat blong filim se bae mi mas go mekem wanem bubuwoman i bin askem mi. Mi tekem kaekae ia, mo mi wokbaot i go long haos blong anti. Hem i longwe, mo taem mi kasem ples, mi no gat tingting blong stap longtaem.
Mi faenem anti blong mi, wetem bebi blong hem blong faef manis we i slip long wan hamok we oli fasem bitwin tufala mango tri. Ol tri ia oli stap long saed blong wan reva we i ron biaen long haos. Mi wokbaot i go long tufala blong givim kaekae. Mi sek, ol rop blong hamok i brok. Anti blong mi mo bebi blong hem i rol i go long reva. Fraet i kasem mi. Mi no save olsem wanem blong swim, mo i no gat man i stap raon blong help. Mi no save stret wanem blong mekem.
Kwiktaem, mi harem voes blong Spirit i talem: “!Yu jiam i go!”
Mi no tingting tu taem, mi jiam i go. Laki, mi faenem bebi ia long sam seken nomo, mo anti blong mi i bin save kamaot long wota. Taem mi kamaot long wota wetem bebi, mi no save bilivim nomo wanem i jes hapen. Mi bin jiam long wan reva we mi no save hao blong swim, be from se mi bin lisin long Spirit, bebi kasen blong mi, mo mi, i bin laef mo mitufala i no draon.
Mi bin luksave olsem wanem i impoten blong luksave mo lisin long daereksen mo insperesen we God i givim long yumi tru long Tabu Spirit. Mi mi talem tangkyu se long fas ples, mi bin mekem wanem we bubuwoman blong mi i askem mi, mo mi bin tekem kaekae ia i go long haos blong anti blong mi. Mi save se yumi mas traem moa blong save lisin long ol toktok blong Spirit blong mekem se yumi save stap olsem ol han blong God blong helpem ol pikinini blong Hem.