God i givim sore blong Hem long mi, mo i mekem mi nomo trabol
Samtaem, hem i no isi blong givim seves long wan misin, be hem i gud.
Taem mi gobak hom afta long misin blong mi, mi akseptem famli blong mi afta 18 manis olsem wan misinari. Taem mi stap long misin, mi gat blesing blong gat Papa blong yumi long Heven kolosap long mi.
Long taem blong tufala transfea blong mi, mi bin harem nogud tumas, nomata we mi save toktok Franis. Mi sem tumas blong stopem ol pipol blong tokbaot Jisas Kraes. Fasfala kompanion blong mi i bin helpem mi fulap tru long eksampol blong hem.
Oltaem mi stap gat wan Buk blong Momon wetem mi blong serem naesfala mesej blong Restoresen tru long Josef Smit.
Wan dei, mi stap mekem stadi blong miwan wetem wan buk we misin i bin givim long mi blong lanem abaot misinari wok. Mi faenem wan kwestin abaot Buk blong Momon. Hem i stap talem olsem: ?Yu yu gat wan eksperiens abaot Buk blong Momon? ?Yu save serem eksperiens ia wetem kompanion blong yu?”
Mi tingting: “Mi no rili gat wan eksperiens.” Mi disaed blong prea long Papa blong yumi long Heven long en blong stadi blong miwan, mo blong askem sapos Buk blong Momon i tru (Moronae 10:4). Mi no bin kasem wan ansa stret long tetaem ia. Mi bin askem semfala kwestin ia long God evri taem mi bin prea mo kolosap bae mi givap.
Long tetaem ia, mifala i bin stap tijim wan investigeta we hem i bin stap mit wetem ol misinari blong 30 yia finis nao. Olsem ol misinari, mifala i stap askem God oltaem blong helpem mifala blong save wanem nao problem, mo olsem wanem mifala i save helpem ol investigeta blong mifala blong kasem wan testemoni.
Nao mifala i putum wan deit blong baptaes, be dei ia, bifo long baptaes blong hem, hem i ring blong talem se hem i no bin wantem baptaes. Mifala i gat wan lesen wetem hem, mo mifala i invaetem wan kapol misinari blong kam tij wetem mifala. Stamba tingting blong mifala i blong andastanem ol samting we oli bin stap stopem hem blong folem Jisas Kraes.
Mifala i bin askem plante kwestin long saed blong Buk blong Momon, mo mifala i bin save se hem i no bin gat wan testemoni se God i bin givim wan nara buk blong i testifae abaot Jisas Kraes.
Long taem blong lesen ia, mi bin filim wan samting insaed long hat blong mi we i talem long mi we, “mi nidim blong askem investigeta ia sapos i oraet blong prea mo askem sapos Buk blong Momon i tru.” Mi wantem sakemaot tingting ia from se mi no gat paoa long tingting blong mekem wanem we God i givim oda long mi blong mekem. Spirit i mekem mi tingbaot skripja insaed long Doktrin mo Ol Kavenan long seksen 9:8–9:
“Be, luk mi talem long yu, se yu mas stadi gud long hem insaed long maen blong yu; afta, yu mas askem long mi sapos hem i raet, mo sapos hem i raet, bambae mi mekem jes blong yu i gat wan filing we i hot insaed; taswe, bambae yu filim se hem i raet.
“Be sapos hem i no raet, bambae yu no gat ol filing olsem ia, be bambae tingting blong yu i fasfas, mekem se bae yu fogetem wanem we hem i rong; taswe, yu no save raetem wanem we i tabu, be nomo sapos mi mi givim long yu.”
Mi filim se jes blong mi i stat blong hot we kolosap mi aot long rum blong go dring wota. Be, mi bin luksave se filing ia i bin helpem mi blong gat moa paoa long tingting blong openem maot blong mi mo askem investigeta sapos i oraet blong mifala i prea naoia, mo askem God sapos Buk blong Momon i tru.
Bifo mi talem prea ia, mi bin save se Buk blong Momon i tru, from se mi bin filim insaed long jes blong mi i hot, mo olsem skripja i talem: “bambae yu filim se hem i raet.”Long taem blong prea ia, mi bin krae fulap from se mi harem nogud se investigeta blong mitufala i gat wan strong hat we i no letem hem blong filim Spirit. Be, mi bin glad se God i bin ansarem kwestin blong mi afta long wan manis we mi stap tingting hevi long kwestin ia: “?yu yu gat wan eksperiens wetem Buk blong Momon?” Nao, mi gat wan testemoni abaot Buk blong Momon.
Mi no save se hamas Buk blong Momon mi bin givim long taem blong ful misin blong mi, be mi bin save se buk ia i bin jenisim laef blong mi. Laef blong miwan i bin jenis, i no bifo long misin, be long taem blong misin blong mi. Mi bin luksave olsem wanem bae mi save wok wetem Spirit blong ansarem kwestin blong man.
Mi testifae se Buk blong Momon, hem i ki ston blong relijin blong yumi. Mi save se God i stap ansarem ol kwestin blong yumi. Maet Hem i gat kalenda blong Hemwan, be oltaem, Hem i stap ansarem ol prea. Samtaem, yumi ting se, from se yumi gat ol tes, hem i from we God i no laekem yumi. Hemia i no tru. Mi save se God i givim ol tes long yumi, i no from se Hem i no lavem yumi, be hem i from we Hem i wantem stretem yumi semmak olsem wan daeman, from se yumi impoten tumas long Hem. Hem i wantem yumi blong gat strong paoa long tingting, blong gat waes, blong stap fetful mo blong gat inaf paoa blong faet agensem ol temtesen blong Setan.
Mi save se yumi blong Jos blong Jisas Kraes mo i no blong jos blong man. God i wan God blong ol merikel. Mi stap invaetem wanwan long yumi blong prea oltaem long pblh mo askem sapos Buk blong Momon i tru. Iven sapos yu save finis se hem i tru, olsem we Presiden Henry B. Eyring i talem, “mi askem God sapos Buk blong Momon i tru, i no from se mi no gat wan testemoni, be from se mi wantem filim ol semfala filing ia evri taem; ol semfala filing ia we i bin helpem mi blong filim lav blong God.”
Buk blong Momon i pruf blong lav we God i gat long ol pikinini blong Hem.
Amandine Liard i bin stap long misin long Franis Paris Misin stat long Maj 2016 kasem Ogis 2017. Hem i stap long Toahotu wod, Tahiti.