Wanem, From Wanem, mo Olsem Wanem: Lukluk Evri Step blong Restoresen
Blong save tijim gospel, bae yu nid blong save eksplenem wanem hem i apostasi, dispensesen, mo Restoresen. Jat ia i save help.
Tekem se yu stap long wan trip blong wan wik i go long solwota wetem famli blong fren blong yu. Yufala i gat plante gud taem, be yu yu misim famli blong yu. Papa blong yu i sendem yu wan teks mesej blong jekem se ol samting oli oraet—i stret samting ia nao we yu nidim, blong filim se wan i lavem yu mo i tingbaot yu.
Laef long wol i lelebet olsem ia. God i sendem ol teks i kam long yumi, be yumi stap longwe long hom blong yumi long heven, mekem se, wan wei blong Papa long Heven i soemaot lav blong Hem long yumi, i taem Hem i sendem ol profet oli stap.
Dispensesen
ol pikja oli kam long Ben Simonsen
Ol profet oli stap lidim wanem we yumi stap singaotem, ol dispensesen, we hem i wan taem, taem we (1) God i gat wan prishud lida we Hem i givim raet long hem we i stap long wol, mo (2) lida ia, wan profet, i lanem abaot plan blong fasin blong sevem man, mo hem i lanem hemia stret long God. Afta, profet i stap tij, o i givimaot, gospel ia long ol pipol.
Yumi talem tangkyu from ol skripja, from tru long olgeta yumi save abaot plante dispensesen we i bin pas. Sam impoten dispensesen (o taem), i hemia blong Adam, blong Inok, blong Noa, blong Ebraham, blong Moses, blong Jisas Kraes, mo blong Josef Smit. Lod i bin statem wan dispensesen tru long wanwan long ol profet ia.
Apostasi
Apostasi=fasin nogud. Taem wan man, o grup blong ol pipol oli tanem baksaed blong olgeta long ol trutok blong gospel blong Jisas Kraes, i sakemaot ol profet, mo i foldaon long sin, nao oli stap long apostasi.
Olsem Wanem Nao Apostasi I Stap Hapen
God i singaotem wan profet, we i stap tijim tru gospel blong Jisas Kraes.
Ol pipol we oli stap folem ol tijing blong ol profet, oli kasem blesing.
Sam long ol pipol oli kam blong gat hae tingting mo oli sakemaot profet.
Plante taem, Lod i karemaot profet blong Hem long ol pipol we oli sakemaot ol prinsipol blong gospel.
Taem we taem i stret, God i singaotem wan niu profet blong putumbak trutok, prishud mo Jos.
Restoresen
Wan restoresen i taem oli putumbak wan samting i kam olsem we i bin stap bifo. Hem i no wan rifomesen (wan niu samting), we i jenisim wan samting we i bin stap blong krietem wan niufala samting. Eksampol. Sapos yu wantem blong putumbak wan olfala haos, bambae yu bildimbak haos ia folem semfala plan we i bin stap bifo. Maet yu wantem ademap wan niu ples blong faea, be sapos olsem, bambae yu jenisim haos, yu no putumbak.
Gospel blong Jisas Kraes, i bin gat nid blong oli putumbak from se hem i bin lus long taem blong Bigfala Apostasi. Ol pipol oli bin laef plante handred yia we i no gat tru Jos. Mekem se Lod i putumbak Jos mo gospel blong Hem tru long Josef Smit, olsem we ol profet blong bifo oli bin profesae long hem (luk long Aesea 2:1–3; 29:13–14; Ol Wok 3:19–21; Revelesen 14:6–7; 2 Nifae 3:3–15).
Tru gospel blong Jisas Kraes i stap ia blong i stap—?bae yu yu stap wetem gospel ia? Nomata wol ia i stap gro, i stap kam moa mo moa nogud, Jos blong Jisas Kraes bae i stap kasem en.
Yu gat wan joes blong mekem—semfala joes ia we i bin fesem ol man long wol stat long stat blong taem: ?bae yu folem profet? Sapos yu mekem, bambae yu gat blesing mo gat Spirit blong lidim yu.
Adam
Adam i wan tru paeonia: !hem i bin fas man long wol ia mo i bin fas profet! Hem i bin tijim famli blong hem long saed blong gospel, be iven long stat, plante oli bin “lukluk long ol kaonsel blong olgetawan nomo long sikret” mo oli bin sakemaot trutok (Moses 6:28).
Inok
?Yu yu bin harem abaot wan ful siti we God i tekem i go antap long heven? Yes, siti blong Saeon—we Inok i stanemap—i bin stret mo gud tumas, mekem se ol pipol oli bin go stap wetem God (luk long Moses 7:23).
Noa
Yu save abaot bigfala sip blong Noa. I gat eit man nomo—famli blong Noa—we i laef long Bigfala Wota we i Ron from se oli bin lisin long ol woning blong Noa (luk long Jenesis 7; Moses 8). Be yu yu save se Noa i bin kasem prishud taem hem i gat 10 yia nomo (luk long D&C 107:52) mo “i gat ol bigfala man we oli gat dabolbun … oli bin wantem blong tekemaot laef blong Noa”? (Moses 8:18).
Ebraham
Ebraham, kolosap ol nogud pris oli sakrifaesem hem, be wan enjel i bin sevem hem (luk long Abraham 1). Hem i kasem ol bigfala revelesen, mo tu, hem i bin gat visen ia blong laef bifo laef long wol ia. Ol memba blong Jos oli kamaot long laen blong hem, mo kavenan blong Ebraham i tekem nem blong hem. (Luk long Abraham 2–5.)
Moses
Moses i bin lidim Ol Man Isrel oli aot long Ijip mo i bin helpem olgeta blong kasem fridom. Hem i bin “traem, wetem fasin blong wok strong wetem strong tingting, blong mekem ol pipol blong hem oli kam tabu, blong oli save luk fes blong God, be oli bin mekem hat blong olgeta i kam strong mo oli no bin save stanap long fes blong hem” (luk long D&C 84:23–24). Wanem we i tru, i we, from apostasi blong olgeta, oli bin wokbaot olbaot long waelples !blong 40 yia!
Jisas Kraes
Jisas Kraes i no bin tijim gospel nomo mo mekem plante merikel, be tu, Hem i bin stanemap Jos blong Hem long wol ia. Hem i pem praes from sin blong yumi, mo oli bin hangem Hem long kros, mo Hem i bin laef bakegen long ded blong mekem se yumi save winim ded long saed blong spirit mo long saed blong bodi. Hem i hed blong Jos blong Hem tedei, mo Hem mo Papa long Heven oli stamba blong prishud atoriti.
Bigfala Apostasi
Afta we Sevya i Laef Bakegen long Ded, ol Aposol blong Hem mo ol nara lida blong Jos oli bin traem blong serem gospel i go, be ol pipol oli bin sakemaot ol tijing blong olgeta, mo tu, oli kilimded bigfala namba blong ol Aposol ia. From fasin nogud blong ol pipol, gospel we i fulwan i bin lus mo i nomo stap long wol. Wol i bin foldaon long tudak long saed blong spirit (luk long Aesea 60:2).
-
Blong moa long 1,000 yia, ol pipol oli no bin save kasem ol odinens we i sevem man, ol blesing blong tempol, o ol gudfala toktok blong wan profet.
-
Ol bigfala trutok ia oli bin lus long Baebol.
-
Oli bin stat blong tijim ol giaman tingting long huia hem i God.
-
Sam long ol odinens blong fasin blong sevem man oli bin jenis o oli no bin tijim gud olgeta (luk long Aesea 24:5).
-
Apostasi ia, long en, i lidim man blong oli statem fulap jos.
Rifomesen
Long taem blong Bigfala Apostasi, sam pipol we oli save relijin, long Yurop, oli bin luksave se gospel blong Jisas Kraes, oli nomo stap tijim long stret fasin. Olgeta man ia, ol rifoma, oli no ol profet, be oli bin mekem bes blong olgeta blong tijim trutok olsem we oli bin andastanem. Oli bin help blong mekem fulap moa pipol oli save kasem Baebol. Plante oli bin faet from fridom blong relijin mo oli openem rod blong Restoresen blong gospel, o blong gospel i kambak.
Josef Smit
?So, gospel we i fulwan i bin lus blong oltaem? !No! God i soemaot plante impoten trutok long Josef Smit bakegen. Ol mesenja blong heven oli bin putumbak evri prishud ki we i nid i go long Josef Smit (luk long D&C 27:8–13; 110; 128:18–21), mo mekem se dispensesen ia, i “dispensesen blong taem blong evri wok blong God i kamtru” (D&C 138:48). Oli save long hem tu olsem ol lata-dei, o ol las dei, from se hem i las dispensesen bifo Seken Kaming blong Jisas Kraes.
Restoresen
?Yu save wanem? YU gat ol blesing blong Restoresen. !Yes, yu!
-
Jos blong Jisas Kraes, oli bin putumbak wetem wan profet mo ol aposol blong lidim jos ia.
-
Buk blong Momon, Doktrin mo Ol Kavenan, Perel we I Gat Bigfala Praes, mo ol nara revelesen blong tedei, oli putumbak ol impoten trutok we oli bin lus bifo (luk long 2 Nifae 27).
-
Josef Smit i bin kasem Aronik Prishud long Jon Baptaes (luk long D&C 13) mo i bin kasem Melkesedek Prishud long ol Aposol ia, Pita, Jemes, mo Jon (luk long D&C 128:20).
-
Ol man we oli kasem prishud mo oli kasem raet, oli mekem ol odinens blong fasin blong sevem man long stret fasin.
-
Mo yumi save se trutok bambae i neva lus tru long wan apostasi (luk long Daniel 2:44).