Stoa blong Sus blong Abuelo
Hem we i raet i stap long Yuta, YSA.
“Yu save, yu nidim blong yu kam moa olsem sus ia,” Bubuman i talem.
“‘Mi sore’ i no wan toktok we i isi oltaem blong talem” (Children’s Songbook, 98).
Miguel i openem doa blong stoa blong sus blong Abuelo (bubuman) blong hem. Hem i smelem leda we Abuelo i stap wok wetem. I wan smel we hem i laekem tumas.
“!Halo Abuelo!”
Abuelo i nildaon, i stap makem leg blong wan kastoma long wan pis pepa. Hem i no lukluk i kam antap. Abuelo i no stap harem gud samting long sora blong hem.
Miguel i sidaon long wan tebol blong wok. Hem i lukluk long hip blong leda we oli katem finis. Hem i stap traem tingting se Abuelo bae i mekem olsem wanem wetem wanwan, mo yusum hama mo plaes blong hem.
Ol tul ia oli mekem Miguel i tingbaot wan samting we hem i lavem. Abuelo, oltaem i givim hem wan pis loli evri taem we Miguel i help blong klinap.
!Be naoia, Miguel i hanggri! Hem i bin save se hem i no sapos blong tekem wan loli we hem i no askem, be i luk se Abuelo bae i bisi blong longtaem. “Ating bae mi nid blong wet,” Miguel i tingting.
Miguel i pusum han i go antap long kaonta blong tekem loli botel. !Hem i fulap long loli we Hem i laekem tumas—i swit mo i gat jili paoda long hem! Taem hem i stap openem, hem i filim se i no stret tumas. Be loli ia i luk swit tumas tu. Hem i hariap mo i putum i go long maot blong hem.
I no longtaem, kastoma i aot. Abuelo i pikimap wan moa pis leda mo i draonem i go long wota. Hem i help blong mekem leda i sopsop mo i isi blong wok wetem.
Miguel i solemdaon haf loli kwiktaem. Afta, hem i wokbaot i go luk Abuelo.
“!Halo!” Abuelo i talem wetem wan smael. “Mi glad yu kam blong luk mi.”
Miguel i hangem Abuelo. Hem i hop se Abuelo bae i no save luk se hem i kakae wan pis loli. Miguel i no wantem tingting long hem.
Miguel i talem: “Luk olsem se yu yu bisi tedei,” mo i poenem hip blong leda we i stap. ?Yu nidim eni help?”
“!Yes! ?Yu save pasem tred ia i kam long mi?”
Miguel i pusum han i go from wan longfala pis tred. I holem strong bitwin han blong hem. I moa had bitim we hem i tingting long hem.
“Wao, hemia i strong.”
Abuelo i laflaf smol. “I mas strong, blong i save stap longtaem tru long ol hadtaem mo olfala taem blong laef.” Abuelo i pulum tred i kam tru long leda. Afta, hem i mekem fes blong hem ia, we Mama, samtaem i singaotem, “Waes Abuelo” fes.
“Yu save, yu nidim blong yu kam moa olsem sus ia,” Abuelo i talem mo semtaem sakem hed blong hem i go antap i kam daon.
Miguel i tanem ae smol i lukluk leda. “Ah. “?Bae yumi mas?”
“Yes, i tru. Yumi nidim blong stap strong. Long wei ia Setan i no save temtem yumi blong yumi stap folfoldaon.”
Red loli ia i flas long maen blong Miguel. Hem i bin save se hem i sapos blong talem Abuelo abaot loli ia.
Abuelo i tekem wan olfala sus antap long self. “?Luk bigfala hol ia?”
Miguel i save pusum han blong hem tru long hol ia. “Yes.”
“Hol ia i smol bifo, mo bae oli save stretem i isi nomo. Be oli wet, mo naoia bambae i moa had blong stretem. Ol nogud fasin, mo ol nogud joes, oli semmak long hol ia. I moa gud blong stretem olgeta eli.”
Abuelo i saksakem hed blong hem bakegen, mo fes blong Waes Abuelo i jenis, i smael bakegen. Oli bin gohed blong toktok taem we Abuelo i stap wok. Ful taem ia, Miguel i stap gohed blong tingting long saed blong red loli stik ia.
Taem Abuelo i finis, Miguel i bin helpem hem blong klinap. Nao Abuelo i pusum han blong botel loli.
Nao, Miguel i nomo save holemtaet hem moa. “!Mi tekem wan loli blong yu!” hem i talem kwik.
Abuelo i putum botel i stap. “?Yu talem wanem?”
Miguel i talem long hem long saed blong loli ia we hem i no askem. “!Mi sore Abuelo! Bae mi nomo mekem bakegen, !mi promes!”
Abuelo i haggem Miguel. Miguel i filim gud moa evriwan afta.
“Tangkyu blong yu stap ones. Hemia, long mi, i moa impoten long eni nara samting.”
Taem oli wokbaot i go hom, Miguel i jes filim se hem i olsem wan niufala sus blong Abuelo. !I strong gud, mo i rere blong wan laeftaem!