Hapines: I Moa Bitim wan Filing
Oli tijim yumi se blong gat glad, i stamba tingting blong laef blong yumi (luk long 2 Nifae 2:25). ?So from wanem nao, hapines i olsem wan samting we yumi no save long hem? Maet i from se yumi no andastanem wanem stret hem i hapines … mo wanem i no hapines.
?Wanem Ia Hapines?
Long simpol toktok, hapines i wan sot taem we tingting blong yu i go antap, i go antap i bitim oltaem long saed blong balens blong filing blong yu.1 Long nara toktok, hem i blong yu filim gud.
I gat plante wei blong mekem se filing i go hae—olsem blong mekem fani wetem wan fren, plei wan naes gem, mo iven, blong kakae wan pis blong jis kek—be hemia i no stap longtaem. Plante taem, yumi stap jiam jiam long wan wei blong gat gud taem i go long wan narawan, mo traem blong karembak filing ia we i hae. ?Be i no gat wan kaen hapines we i stap oltaem?
Yes—be i defren smol long wanem yu tingting long hem, i mekem nao se, fulap taem, yumi stap mestem mak blong hem. Wol ia i stap talem long yumi se wan laef we i gud i fulap wetem ol niu wokbaot, se ol dei blong yu oli wan gud filing i go daon long wan non-stop rod, we i fulap long isi samting we i mekem yu glad. Be trutok i olsem: yu no nid blong gat hae filing oltaem blong save laef “folem fasin blong stap hapi” (2 Nifae 5:27). Hapines we i stap stap—wanem we yumi save singaotem tru hapines—hem i moa kwaet, i wan filing we yu stap gud, be i no wan filing we yu harem yu hae oltaem. Gud pleiplei, mo gud taem oli stap go lus, be tru hapines i no wan filing we i stap pas i go—hem i stap longtaem moa. Sapos blong gat gud taem i mekem ol filing blong yu oli go hae i bitim stret balens, nao blong kasem tru hapines i olsem blong leftemap balens ia i go antap.2
Yu save tingting se hapines we i stap stap i nidim tu blong yu kam antap sloslo mo kam fri long ol soa long bodi mo kam fri long ol tes. Be ol stadi oli soem se ol gudfala situesen oli no meksua se yu kasem hapines, mo ol situesen we oli gudgud, bae oli no blokem hapines. Be, long medel blong ol samting we i go wetem hapines blong yu, ol joes blong yu oli plei wan bigfala pat.3 Elda Ulisses Soares blong Presidensi blong Olgeta Seventi i bin tijim: “Hapines i folem ol evri dei fasin, ol wei blong mekem samting, mo fasin blong tingting we yumi save lidim blong i tekem aksen.” Hapines i moa bitim wan gudfala filing o wan laef we i no gat wari—hem i wan wei blong tingting mo laef we yumi save kontrolem. Ol jeneral level blong filing oli dipen tu long famli laen, mo fasin we oli resemap yumi, be ol joes blong yumiwan oli plei wan impoten rol. Long sot toktok, “hapines i wan joes we eniwan i save mekem”4
?Olsem Wanem Mi Save Hapi?
?So olsem wanem stret yumi save “jusum” blong stap hapi? ?Wanem i sikret kaekae blong hapines jis kek blong yumi? Olsem Elda Soares i eksplenem, tru hapines i nidim blong wan i “wokhad longtaem from wan samting we i moa impoten bitim laef.” Semmak, Viktor Frankl, wan popula man we oli save se hem i laef tru long Holokos, mo i wan dokta blong maen, i talem se hapines i “saed risal blong strong tingting mo wok blong wan blong folem wan rod we i moa hae bitim hemwan bakegen.”5
?Mo wanem rod moa i moa hae bitim hemia we God i putum i stap blong yumi folem? Long wokbaot blong yumi blong lukaotem hapines, yumi no nidim blong lukluk i go moa bitim plan ia blong Papa long Heven. Yes, !i no blong nating we oli singaotem “plan blong stap glad”! Alma 42:8,16 Fulap fulap skripja oli stap testifae we taem wan i folem plan blong God, i mekem se hem i hapi (luk long 2 Nifae 2:13; Hileman 13:38). Nomata we wan laef we i stret mo gud bae i no sevem yumi long eni hat i soa, be bae i putum yumi long wan ples we bae yumi save gotru mo save gat hapines long laef ia, mo bae i lidim yumi blong kam olsem wan god mo kasem glad we i no save finis long wol we i stap kam.
Semmak olsem fet, hapines oli save mekem i kam wik, o i kam strong, i dipen long aksen blong yumi. Sapos yu spendem taem blong yu blong hapi blong smol taem, hapines blong yu bae evri kaen win i kam pulpulum i go” (Efesas 4:14). Be sapos yu traehad blong laef stret mo gud, bambae yu developem wan kaen filing ia we i gat wan pis mo wan gud laef i slip i stap we i save fesem eni kaen strong win. Mo taem yu putum fet i kam fastaem long pleiplei, yu save faenem tru glad—kaen glad ia, “man ia i wan man we i sakem sin, mo tingting blong hem i stap daon blong lukaotem glad,” hem nomo i save faenem kaen glad ia (Alma 27:18).