O Auala e 4 e Auauna Atu Ai i Aiga e i ai Manaoga Faapitoa

Saunia e Valerie Durrant

Mekasini a le Ekalesia

E manaomia e aiga o loo i ai manaoga faapitoa lo tatou alofa, fesoasoani ma le lagolagosua.

E tusa ma le 15 pasene o le faitauaofai o le lalolagi o loo ola ma se ituaiga o manaoga faapitoa.¹ Mo i latou o loo tausia i latou e i ai manaoga faapitoa, o nisi taimi o mea faigofie e pei o le alu atu i sauniga faamanatuga e mafai ona avea o se galuega faigata tele. E masani lava ona mananao uso a tagata o le uarota e fesoasoani atu peitai latou te le iloa po o a ni mea e mafai ona latou faia.

O fautuaga nei e fa mai le Tautua a le Ekalesia mo [Tagata e i ai] Manaoga Faapitoa, e mafai foi ona fesoasoani atu:

Faaalu se taimi ia malamalama moni ai i o latou manaoga: Ia fesili atu ma le agavaivai ae ia tuusao e uiga i le tagata ma’i ma o latou tulaga patino. Ia e faamasani i fesootaiga faaletino, faalelagona, pe faalemafaufau o auga o le ma’i o lena tagata. O le tau lava o le faamasani i le tagata o le uarota ma ona tauiviga i se tulaga patino o se nofoaga lelei tele lea e amata ai, ma o le a e maua ai ni manatu i le auala e fesoasoani atu ai i le tagata ma le au tausimai.
Ia taulima i latou e i ai manaoga faapitoa e pei ona e taulima ai soo se isi lava tagata. Faalagi i latou i o latou suafa ma faaaofia i latou i talanoaga. Ia manatua o i latou o fanau a le Atua. Ia taulai atu i mea e mafai ona fai e i latou e i ai manaoga faapitoa.
Ofo atu le fesoasoani e fitoitonu i ai. Sui le “ia tau mai pe a i ai se mea e mafai ona ou faia” i le fesoasoani e fitoitonu ma patino. Mafaufau i mea e pei o le “E mafai ona ou tausitama mo oe i le po o le Aso Tofi ae e alu i le malumalu?”
Ia amata i mea latiti ma ia fatufatuai. Afai o se aiga e i ai se tamaitiiti e alu i se nofoa faataavalevale, e mafai ona e faaavanoa mo i latou le laina nofoa e faaaoga e tagata feoai i nofoa faataavalevale i sauniga faamanatuga taitasi. Po o le, afai e le manao se tagata o le vasega e faitau leotele, fai atu i ai e fesoasoani i le tufaga o pepa e tufa atu nai lo le faitau leotele.

A o e saili ia iloa le auala e auauna atu ai i aiga ma e e tausia i latou e i ai manaoga faapitoa, o le a avea le Agaga ma ou taiala.