Iloa Au Meaalofa

Saunia e Justina Lichner

E alala le tusitala i Rhineland-Palatinate, Siamani.

E foliga mai e fai mai uma tagata, “Maimau pe ana e iloa lou maoae.” Ia, o le mea moni, o nisi taimi e te le iloa ai lou maoae. Pe a tatou le lagona le pei o i tatou o le tagata e sili ona atamai, sili ona lelei, sili ona aulelei, sili ona malie, ma le sili ona talenia, e foliga mai la ua mouese lo tatou talitonu ia i tatou lava.

Ae mafaufau i le mea lenei: o i tatou uma o atalii ma afaine o le Tama Faalelagi. O le mea lea, ua Ia tuuina mai ai ia i tatou ni meaalofa ma ni taleni tulaga ese e fesoasoani e faataunuu ai o tatou gafatia faalelagi. A o tatou iloaina nei meaalofa, e faamanatu mai ai lo tatou taua faalelagi o ni Ana fanau, ma e mafai ona tatou faalatalata atili atu ia te Ia ma fesoasoani ai i isi ia faia foi faapea.

Iloa Au Meaalofa

O manatu nei e iva e fesoasoani e te iloa ai nisi o au meaalofa e tau le iloa.

1. Fai atu i isi e ta’u atu ia te oe.

   O nisi taimi tatou te le vaaia ai ia i tatou lava mea e mafai ona iloa e isi ia i tatou. Fai atu i se uo, tagata o le aiga, po o se taitai o le Ekalesia e tusi atu se faamatalaga puupuu ia te oe e uiga i se meaalofa po o se taleni latou te vaaia ia te oe.

2. Vaavaai mo meaalofa i puapuaga.

   I taimi faigata, e mafai ona tatou filifili i le va o le faaali atu i fafo o o tatou uiga sili ona lelei po o o tatou uiga e sili ona leaga. Pe a oo i taimi faigata, ia taulai atu i le iloaina ma le faaaogaina o ou uiga sili ona lelei ma meaalofa.

3. Tatalo mo le fesoasoani ia iloa ai au meaalofa.

   E silafia e le Tama Faalelagi o tatou gafatia faalelagi. Afai e faafaigata ona tatou vaaia lena mea ia i tatou lava, e mafai ona fesoasoani mai o Ia. E mafai ona e tatalo mo le fesoasoani ia iloa ai au meaalofa.

4. Aua le fefe e faataitai ni mea fou.

   Pe o tatou atinaeina nao meaalofa ua uma ona tatou iloa ona o lo tatou fefefe tele e fai se mea tatou te lei faia muamua? O le taimi lenei e faataitai ai se mea fou ma iloa ai meaalofa e lei mailoa.

5. Saili i le afioga a le Atua.

   E fesoasoani mai le Tama Faalelagi ia tatou iloa ma atinae a tatou meaalofa e ala i faaiteite o loo maua i tusitusiga paia—e masani lava e ala i valaaulia e faatino. Faaaoga le mau lenei e fai ma faataitaiga: “Tuu le fefinauaʼi ma le tasi; tuu le tautala leaga o le tasi i le isi” (MF&F 136:23). O a ni meaalofa e mafai ona e atinaeina mai lenei valaaulia? O le meaalofa o le tautala i upu agalelei, o le meaalofa o le faatoatoaina o isi, o le meaalofa o le loto pulea, ma isi mea e tele. Ma e nao le tasi le fuaiupu ua maua mai ai! O le faitau i tusitusiga paia ma le faalogo i uunaiga a le Agaga e mafai ona fesoasoani e te iloa ai au meaalofa.

6. Vaai i fafo atu o oe lava.

   O nisi taimi e faaalia ai o tatou uiga sili ona lelei i taimi tatou te le o taulai ai ia i tatou lava, ae nai lo o lena, e taulai atu i auala e mafai ona tatou galulue faatasi ma fesoasoani ai i isi. Pe a tatou faia lena mea, o le a tatou iloa ai, ua ia i tatou le tele o meaalofa faaKeriso.

7. Mafaufau i tagata e te faamemelo i ai.

   O ai nisi e te fia faataitai i ai? E mafai ona e faia se lisi o meaalofa uma o loo i ai i le tagata e te fia faataitai i ai ma, nai lo o le taulai atu po o le fea o meaalofa e te lua le tutusa ai, ia patipatia le iloaina o meaalofa e te lua tutusa ai.

8. Mafaufau i lou aiga.

   O a ni au meaalofa o loo i ai, o loo faapena foi ona i ai i nai ou tei, matua, po o matua o matua? Ia alu pea i luma! Saili talafaasolopito o aiga, ia iloa tala, ma faailoa foi nisi meaalofa tou te tutusa ai ma lou aiga.

9. Ia faia pe faitau lou faamanuiaga faapeteriaka.

   E mafai ona talanoa mai lou faamanuiaga e uiga i au meaalofa o loo i ai ma e tatau ona atinae, ma e mafai foi ona faasino atu ai oe i le auala o le a taitai atu ai i le iloaina o isi meaalofa ma taleni fou.

Ia Faaatoatoaina ia te Ia

E le faapea e tatau lava ona tatou lelei silisili i mea uma ia iloa ai o i tatou o ni fanau tauaogaina a le Atua. E na o le tau lava ona tatou tuuto i le iloaina ma le atinaeina o a tatou meaalofa ma taleni—ona, ala mai lea i le Togiola a Iesu Keriso, e mafai ai ona tatou atoatoa ia te Ia (tagai Moronae 10:32).

O Le Manao ia Iloa

“Ou te iloa e tele meaalofa ma taleni a lo tatou Tama Faalelagi ua Ia finagalo e faaee mai i o tatou luga, peitai ‘e faalagolago lea i lo tatou ole atu mo na mea. O faamanuiaga e manaomia ai ni a tatou galuega po o taumafaiga o la tatou vaega’ (Bible Dictionary, ‘Prayer’).”

Elder Mervyn B. Arnold o le Fitugafulu, “O Fea Ua Ou I Ai? Auala e Iloa ma Atinae ai Au Meaalofa Faaleagaga ma Taleni,” Liahona, Tes. 2014, 61.

Fesoasoani i Isi ia Iloa Meaalofa

Tatou te vaaia mea i isi atonu e le mafai ona latou vaaia ia i latou lava. I le vaiaso lenei, ia faasoa atu na mea i se uo po o se tagata o le aiga. O nisi nei o fesili e fesili ai ia te oe lava e mafai ona fesoasoani ia e iloa ai meaalofa a isi.

1. O le a se mea ua latou faia e fesoasoani ai ia te oe?

2. O a ni mea e te fiafia ai e uiga ia i latou?

3. O ni mea latou te lelei ai?

4. O a ni mea o loo latou taumafai ia lelei atili ai?