I le Pulelaa

Autasi i le Faia o Mea Lelei

Saunia e Ema Hale Samita

O lenei faagasologa ua faasusulu mai ai olaga o tamaitai naunautai ma a latou savali, na sii mai le tusi I le Pulelaa: 185 Tausaga o Aoaoga na saunia e Tamaitai o le Au Paia o Aso e Gata Ai (2017). O mataupu filifilia e maua i le churchhistorianspress.org/at-the-pulpit.

E Uiga ia Sister Samita

O Ema Hale Samita (1804–79) sa fetaui i lana tane o Iosefa, ao nofomautotogi o ia i le faatoaga a ona matua i Harmony, Pennsylvania, ISA. Sa faaipoipo i laua i le aso 18 o Ianuari, 1827. Sa viia e le tina o Iosefa, o Lusi Maka Samita, ia Ema: “Ou te lei vaai lava i se tamaitai i lou olaga o le e onosaia ituaiga uma o vaivaiga ma faigata … faatasi ma lena lototele, naunautai, ma le onosai e le maluelue.”¹ Sa galue mo se taimi puupuu ia Ema o se tusiupu i le faaliliuga o le Tusi a Mamona. Sa ia faaavanoaina lona fale i e mamai, i e na matuaoti, ma isi tagata asiasi.

Ia Iulai 1830, sa faamalau atu ai e Iosefa Samita se faaaliga na fitoitonu ia te ia, lea ua taua nei o le Mataupu Faavae ma Feagaiga 25. Sa filifilia o ia o se peresitene o le Aualofa a Tamaitai a Navu i le aso 17 o Mati, 1842. E ui ina sa na o le faasefululua ona fono Ema ma le faalapotopotoga i le 1842, ae faafa ia Mati 1844, o lana taitaiga sa taua i le mamanuina o le faalapotopotoga.

O le Aualofa a Navu sa faagaoioia i se faiga o se soalaupulega nai lo o ni lesona aloaia. O upu a Ema, ua sii atu iinei, ua faaalia ai lona tulaga faaletaitai.² Sa taofimau e Ema lona faamoemoega o le taitai faaleagaga, i le apoapoai atu i tamaitai ia salamo ao latou faamalolosia e le tasi le isi ma ola i le alofa mama. Sa ia uunaia le lotogatasi ma aoaoina tamaitai i le agaalofa ma le tausia o e matitiva.

Ia Naunau e Fai Mea Lelei

[17 Mati, 1842]

“Na saunoa atu Peresitene³ Ema Samita, o le a tatou faia se mea tulaga ese. A paulia se vaa i se ogasami matautia, ae o loo i ai i totonu ni tagata Mamona se toatele, e tatau ona tatou manatunatu i lena mea o se valaau leotele mo se toomaga. Tatou te faamoemoeina ni mea e tutupu tulaga ese ma ni valaau faanatinati. …

“[Sa ia faia] ni faamatalaga i le faamoemoega o le aualofa, i ona tiute i isi, faapea foi ona tiute e faatatau i le tasi ma le isi, e faapea., ia saili ma fesoasoani i e puapuagatia, e tatau i tagata taitoatasi [o le aualofa] ona naunau e fai mea lelei, … [ma] taulima faamaoni le tasi ma le isi.”

Ia Iulai ma Aokuso o le 1839, sa osofaia ai le aai o Commerce (lea na igoa mulimuli ane ia Navu), Ilinoi, i se faamai o le maleria. I le atavali lenei, o Ema o loo i le ogatotonu o se lio o tagata na gasegase i le maleria, o loo tuuina atu le fesoasoani ma le faamafanafanaga.

Ema Samita, le Tamaitai Filifilia, saunia e Theodore S. Gorka; faavaa mai le Getty Images

Ia Tasi

[24 Mati, 1842]

“Sa tulai Peresitene E. Samita … ma faapea atu, o fuafaatatau e siitia ai le autasi i lenei faalapotopotoga e tatau ona faatinoina ma le faautauta. E tatau i sui uma ona faaaumeaina atoatoa. I le avea ai ma se faalapotopotoga, sa faamoemoe o [ia] o le a latou aveese ia i latou lava le lotovale ma lagona leaga uma agai i le tasi ma le isi, pe afai o i ai ni mea faapena. …

“… E le tatau ona i ai se tasi e lagona le musua e tali i ni fesili e faaatau i lenei faalapotopotoga. E leai se mea e faaliloliloa. O ona faamoemoega e matuai agalelei … ,o ona faamoemoega e agaalofa: e leai se tasi e mafai ona tetee i le iloaina o le lelei, o loo taofiofia e le leaga. Sa faamoemoe o ia o le a lagona e tagata uma le tatau ona latou usitaia o lenei tulafono. … O le tiute o tagata uma ia fesili i le tulaga o le mativa ma faailoa atu lo latou tulaga moni.”

Amata i le Aiga

[14 Aperila, 1842]

“O le manao o Peresitene E. Samita o le faia o mea lelei. Sa faamoemoe e lagolago atu tagata uma o lenei faalapotopotoga ia te ia. Sa fai mai, sa alagatatau ona amata i le aiga, ia aveese mea leaga uma mai o tatou lava loto. … Faamalosia le manaomia o le savavali i se tulaga o le a taliaina e le Atua.”

Salamo ma Lafoai

[19 Me, 1842]

“Sa faaauau e le Tamaitai Peresitene ona apoapoai atu i tagata uma o e na sese ia salamo ma lafoai a latou agasala. Fai mai, sa faasagatau mai au a Satani i lenei Ekalesia.”

Ia Ola Tonu i luma o le Atua

[23 Iuni, 1842]

“Na saunoa le Tamaitai Peresitene, sa olioli o ia i le vaaia o le faateleina o le lototasi o le faalapotopotoga. Sa faamoemoe e tatau ona tatou ola sao i luma o le Atua, ia i tatou lava, ma luma o le lalolagi. … Fai mai, e leai se mea tatou te faia ae ia mata’u i le Atua ma tausi poloaiga, ma o le faia o na mea, o le a tatou manuia ai.”

Faamalosia o le Tasi ma le Isi

[16 Mati, 1844]

“Sa saunoa atu le Tamaitai Peresitene … i le fonotaga e faatatau i le manaomia o le lotogatasi ia i latou lava ma le faamalosia o lima o le tasi ma le isi ina ia mafai ona tatou faia mea lelei e tele i e matitiva. … E tatau ona tatou lafo atu le ofutalaloa o le alofa mama e puipuia ai i latou o e o le a salamo ma ia le toe faia na mea. … Sa ia fautuaina tagata uma ia ola e tusa ai ma aoaoga o le Tusi a Mamona ma le Mataupu Faavae ma Feagaiga.”

Faamatalaga

1. “Lucy Mack Smith, History, 1845,” 190, josephsmithpapers.org.

2. Fuaitau ua sii mai le Tusi o Minute a le Aualofa a Navu, Mar. 17, 1842–Mar. 16, 1844, 8–[126]; ua faalaugatasia le faamataitusi tetele ma faasa’oga.

3. Sa masani ona umia e taitai tamaitai i le seneruri lona sefuluiva ni faalaniga eseese. I Minute a Navu, ina ia tuuese ai o ia mai lana tane, sa valaauina ai Ema o le Tina Peresitene, Peresitene Ema Samita, Tamaitai Peresitene, ma Peresitene Samita.