Fai Mai lea Itulau ma lea Itulau Matou te Talitonu
Ina ua fai mai se tasi o lau vasega o Mamona e le talitonu ia Keriso, sa tonu loa ia te au e faitau le Tusi a Mamona i se auala e fou atoa.
“O Mamona e le o ni Kerisiano.”
O le faamatalaga mai se tasi o lau vaega i le aoga maualuga na faateia ai au.
“Ioe o matou o [Kerisiano],” sa ou fai atu ai.
“Aisea la tou te faitauina ai le Tusi a Mamona?” sa ia fai mai ai ao savali ese atu, ma sa leai se avanoa ou te tali atu ai.
Sa ou mafaufau soo i lenei fesili. O le tali o le, ioe, o Mamona o ni Kerisiano ma o le Tusi a Mamona o se tasi lea o molimau ia Iesu Keriso. Tatou te faitauina faatasi ma le Tusi Paia e aoao atili ai e uiga i le Faaola.
Sa ou faitauina muamua le Tusi a Mamona. Na ou iloaina e moni. Ae ona o le fesili a le tagata o lau vasga, sa ou lagonaina ai le uunaiga e suesue i ai i se auala fou, ma matauina pe faafia ona taua ai Iesu Keriso. A o ou faia, sa ou maofa lava.
E lei leva ona ou susueina le tusi ae ou faitau i le itulau autu o le Tusi a Mamona ua tusia e faatalitonu ai le au faitau “o Iesu o le Keriso, o le Atua Faavavau, ua faaali mai o ia lava i atunuu uma.”
O le faatomuaga o le Tusi a Mamona, sa ou faitau ai “O mea aupito sili ona taua na tupu ua faamaumauina i le Tusi a Mamona, o le auaunaga patino lea a le Alii o Iesu Keriso i totonu o tagata sa Nifaē, ina ua mavae Lona toetu mai.” Fai mai, o i latou o e e mauaina se molimau paia mai le Agaga Paia ua moni faamaumauga, “o le a latou iloa foi e ala i lea lava mana o Iesu Keriso o le Faaola o le lalolagi.”
Sa ou susue atu i “le Mau a Molimau e Toatolu,” lea na faapea mai, sa faaali atu e se agelu ia i latou ia papatusi ia na faaliliuina mai ai le Tusi a Mamona, ma “ua matou iloa foi o le alofa tunoa o le Atua le Tamā, ma lo matou Alii o Iesu Keriso, ua matou vaai ma molimau atu ai ua moni ia mea.”
O le isi na sosoo ai, “O Le Molimau a le Perofeta o Iosefa Samita” na faamatala ai le asiasiga a le agelu o Moronae, o le sa fai mai o le Tusi a Mamona o loo i ai le atoatoaga o le talalelei tumau faavavau “e pei ona tuʼuina atu e le Faaola i tagata anamua” o Amerika.
O Le Mana Faaliliu o le Tusi a Mamona, saunia e Ben Sowards
Ou te lei oo i le 1 Nifae ae o lea ua tele mea ua ou maua!
Sa faaauau lau sailiiliga. I le 1 Nifae, sa ou maua ai, sa iloa e Liae e uiga i le afio mai o le Mesia (tagai 1 Nifae 1:19). Sa ou faitau i ana valoaga e uiga i le Togiola, “o lē o le a aveesea agasala a le lalolagi” (1 Nifae 10:10; tagai fuaiupu 4–10). Na ou faitau i le faamatalaga a Nifae i le soifua mai o Iesu Keriso, Lana auaunaga, maliu, Toetu, ma le asiasiga i le lumanai i Amerika anamua (tagai 1 Nifae 10–12).
Sa ou faitau i valoaga e faapea, o le Tusi a Mamona o le a faamautuina upumoni o le Tusi Paia e faapea, “o le Tamai Mamoe a le Atua o le Alo lea o le Tamā Faavavau, ma o le Faaola o le lalolagi; ma e ao i tagata uma ona o mai ia te ia” (1 Nifae 13:40). Ma sa ou faitau i le molimau a Nifae e faapea, “o le a nonofo saogalemu atunuu, ituaiga, gagana, ma tagata uma i le Paia e Toatasi o Isaraelu, pe afai latou te salamo” (1 Nifae 22:28).
E uma ane le aso e tasi, ua ou oo i le itulau e 53. Na faatoa ou faaumaina lava le nao le tasi o tusi i le Tusi a Mamona, ae oka se mamana o molimau ua uma ona ou mauaina!
I vaiaso na mulimuli mai ai, sa ou maua ai lea itulau ma lea itulau o molimau ia Iesu Keriso, o faaaliga vaaia ia sa faaali mai ai o Ia i perofeta, ma le faamatalaga auiliili o Lana galuega i tagata o Amerika anamua. Sa faamaeaina lau faitauga i le molimau mamana a Moronae e uiga ia Iesu Keriso (tagai Moronae 9); o lana luitau ia, “ole atu i le Atua, le Tama Faavavau, i le suafa o Keriso, pe moni [le Tusi a Mamona]” (Moronae 10:4; ua faaopoopo le faamamafa); ma, i le itulau mulimuli, o lana valaaulia agavaivai ma le faatauanau ia “o mai ia Keriso” (Moronae 10:30, 32).
Sa ou iloa ai o le Tusi a Mamona na teenaina atoa le faamatalaga a le tagata o lau vasega. Afai o se Kerisiano o se tagata e talitonu ia Iesu Keriso, o lona uiga la, o lea itulau ma lea itulau i le Tusi a Mamona, ua fai mai, “Matou te talitonu!”
Sa iu ina ou toe vaai i lau uo. Sa ou faamatala i ai lou aafiaga ma valaaulia o ia e faitau le Tusi a Mamona. Sa ia teena ma le faaaloalo ae sa fai mai, sa fiafia o ia i lou talia o Iesu Keriso e avea ma ou Faaola. Ma ina ua uma le ma talanoaga, ou te manatu na sili atu ona ia malamalama i le uiga o lau tala ina ua ou fai atu, “Ioe, o i matou o Kerisiano.”