O Le Faamamaluina o le Perisitua i se Tulaga Maualuga

Saunia e Charlotte Acquah

E alala le tusitala i le Vaega Tutotonu i Kana.

O le auala na faamanuiaina ai a’u ma lo’u aiga e le faaaliga o le 1978.

Faamatalaga a le tusitala: O aafiaga o le faaaliga na oo i talaatu o le ofoina atu o le faauuina o le perisitua i alii agavaa o ituaiga uma. Na tuuina atu ai faamanuiaga uma o le perisitua i tagata uma, na aofia ai avanoa ma matafaioi o sauniga ma feagaiga o le malumalu. O Charlotte Acquah, o se tagata muamua o le Ekalesia i Kana, na talanoa i auala na faamanuiaina ai e le faaaliga lona aiga atoa, e aofia ai le molimauina o le faatulagaina aloaia o le Ekalesia i Aferika, o le i ai o se tagata e umiaina le perisitua i lona aiga, ma faamauina o se aiga i le malumalu.

Sa ou faalogo muamua e uiga i le Ekalesia ina ua auai atu lo’u tina i le vaega a Brother Joseph W. B. Johnson i le 1968.¹ Pe a ma le 10 o o’u tausaga i lena taimi. Sa oo i se tulaga faaletonu le pisinisi a si o’u tamā ona o le coup d’état [vevesi] i le 1966, ma sa oo le aiga i se taimi faigata. O lea sa manatu ai lo’u tina o se tulaga atamai le sailia o se fesoasoani faaleagaga.

A o lei faia le faaaliga o le 1978, sa lei aloaia le Ekalesia ona sa lei tuuina atu i lena taimi le perisitua i tagata uli. Ina ua mavae le faaaliga, sa mafai ona faatuina le Ekalesia i le pule o le perisitua. Sa ou papatiso i le aso 24 o Fepuari 1979.²

E lua tausaga na faaaluina e lo’u toalua e suesue ai—ma ni nai finauga—ina ia auai ai i le Ekalesia. Na iu lava ina ia papatiso i le 1980, ona ia mauaina lea o le perisitua. Sa amata ona avea o ia ma se tagata to’a, o lea sa le talitonu ai tagata o lona lava aiga i le ala ua ia suia ai. Sa ia faaeteete i le perisitua lea na ia umia ma faamautinoaina foi o loo ia faia pea e le aunoa le mea sa’o i luma o le Alii. A aunoa ma le perisitua, semanu na te saili i mamalu ma viiga a tagata. Ae o le perisitua, na ia iloa ai o le mea sili ona taua o lau faaipoipoga, lou fale, lou aiga, ma le auauna atu i isi.

I lo matou vaega o le lalolagi, afai o oe o se tamā, o le mea e te fai mai ai o le mea lena e i ai. Peitai matou te le faaaogaina le perisitua i lena auala. Matou te saofafai faatasi i se fonotaga faaleaiga. E fesoasoani tamā ia latou ava ma fanau ia malamalama o le mea o loo ia aoao atu e sa’o.

O alii o avea ma tagata o le Ekalesia e auauna atu ia latou ava nai lo le auauna mai o a latou ava ia i latou. E aumaia ia i latou e lena mea le alofa ma le filemu o le tasi i le isi.

O le taimi muamua na ou vaai ai ia te ia o faamanuiaina le faamanatuga o le taimi “o le taofiga [the freeze]” ona sa faia a matou faamanatuga i lo matou lava fale.³ Sa matua maoae o matou lagona ina ua ia umia le perisitua i lena taimi. E leai se tasi e sau i le fale e faamanuia le faamanatuga mo i matou; na fai e ia. Na faapitoa ma sa matou fiafia i ai.

O le taimi muamua sa ou faitau ai i nisi o tusi e faatatau i le le faatagaina o tagata uli e umia le perisitua i le taimi o le taofiga, ina ua amata ona faasolo le aumaia o tusi e tetee ai i Mamona i nofoaga faitele. Ou te lei popole tele i ai aua sa ou iloa e moni le Ekalesia. Ua aoaoina i tatou e aua le faalagolago atu i soo se tasi ae ia faaogatotonu o tatou olaga ia Iesu Keriso ma Lana taulaga togiola. O le mea lena o loo faaogatotonuina i ai lo’u faatuatua.

I le aso 17 o Tesema, 1996, sa mafai ona matou o i le Malumalu o Johannesburg Aferika i Saute. Sa ou lagona le fiafia, aemaise lava ina ua ou faalogo o le a faamauina ia i maua le ma tamaitiiti muamua, o se pepe tama lea na oti i le mavae ai o ni nai aso na ola ai. Sa ou manatu ua oti ma aluese atu o ia, e ui lava sa ou iloa e mama o ia. Ae mo ia ina ia faamauina ia i maua o se aafiaga faaleagaga lea e le galo ia te a’u.

A fesili mai la tagata pe toafia le ma fanau, ou te tau atu ia i latou e toa valu le ma fanau. Latou te fesili mai, “E faapefea?” Ou te fai atu i ai, “Ioe, o le muamua o loo faatalitali mai mo i matou, ma e faalagolago lea i lo matou tausiga o poloaiga a le Atua ma ola ai ina ia mafai ona matou toe foi atu ma avea faatasi o se aiga.”

O le perisitua o le mana a le Atua. Ua tele naua o’u faamanuiaga mai le perisitua. Ou te lagonaina pea le fiafia ma le faagaeetia pe a talosagaina e le fanau se faamanuiaga faaleperisitua mai lo latou tamā. Ona ou iloa lea ua latou faatuatuaina o ia ma ua latou faatuatuaina le galue o le Tama Faalelagi e ala atu i lo latou tamā, lea e umiaina le perisitua. Tatou te faamamaluina le perisitua i se tulaga maualuga i totonu o tatou aiga. I le taimi nei e toatolu le ma fanau tama ua faaipoipo, ma o loo latou faaaogaina le perisitua i o latou aiga.

Ou te iloa e moni le perisitua aua o le mana lea a le Atua, ma o se mana ola ona o loo soifua le Tama Faalelagi. Ua Ia tuuina mai se vaega o lena mana i Ana fanau tama i le fogaeleele. Ua ia i tatou o tamaitai se vaega i le perisitua. Ou te faamamalu i ai i se tulaga maualuga. Ua fesoasoani le perisitua i lo matou aiga ma e faaauau pea ona faia o lena mea.

Faamatalaga

1. I le ogatotonu o le vaitau o le 1960 i Kana, na mauaina ai e Joseph William Billy ni kopi o le Tusi a Mamona, Mataupu Faavae ma Feagaiga, ma le Penina Tau Tele ma lagonaina le faamalosia e faatu ni faalapotopotoga e le aloaia a le Ekalesia.

2. Ua tofia aloaia faifeautalai i Kana mo le uluai taimi ia Novema 1978.

3. O le aso 14 o Novema, 1989, na tutuliesea ai e le malo o Kana ia faifeautalai ma faasaina le Ekalesia ae na faatagaina tagata e faia sauniga i o latou fale. Sefuluvalu masina mulimuli ane na faaalia ai e le malo le faamalieina faapea o loo aoao atu e le Ekalesia tagata ina ia usiusitai i tulafono a le malo ma uunaia ai le loto gatasi mai le faailogalanu, ma i le aso 1 Tesema, 1990, na faataga ai e Kana gaoioiga a le Ekalesia ia toe amatalia.

Iloaina o Isi Faaopoopoga i le Initoneti

• Mo se vaaiga e sili atu ona loloto, faitau i le Gospel Topics essay “Race and the Priesthood” i le topics.lds.org.

• Faitau i aafiaga mamana a nisi o tagata uli o a latou faamatalaga patino na faaalia ai le ala na aafia ai e le faaaliga o le 1978 o latou olaga ma le latou liua.

• —Charlotte ma William Acquah (Kana), Helvécio ma Rudá Martins (Pasila), ma Joseph ma Toe Freeman (ISA) i le “Witnessing the Faithfulness: Folafolaga Aloaia 2” i le lds.org/go/061820a.

• —George Rickford (Egelani) i le “I Will Take It in Faith” i le lds.org/go/061820b.

• —Victor Nugent (Iamaika) i le “It Was the Truth!” i le lds.org/go/061820c.

• Tagai i ata ma ata vitio o uluai faifeautalai i Aferika i Sisifo ua mauaina le fia selau ua uma ona saunia mo le papatisoga i le lds.org/go/061820f.