O Le Faatinoga Faapaleniina o le Tumau Ai
Saunia e Elder Michael John U. Teh
O Le Fitugafulu
Mai se saunoaga i le faigalotu, “These Are Your Days,” na tuuina atu i le Iunivesite o Polika Iaga–Idaho i le aso 9 o Iuni, 2015. Mo le tusiga atoa i le gagana Peretania, alu i le web.byui.edu/devotionalsandspeeches
Ou te molimau atu e mafai ona tatou “fiafia e oo i le iuga” pe a tatou mulimuli i musumusuga mai le Agaga Paia, filifili le lelei nai lo le leaga, ma faapaleniina a tatou tiutetauave.
Sa ou talanoa talu ai nei i la’u fanau, fanau teine a uso ma tuafafine, ma se uo talavou ina ia maua se lagona o fesili, luitau, le fiafia, ma manumalo o feagai ma talavou matutua i lenei vaitaimi. Sa ou mafaufau loloto ma tatalo e uiga i mea sa faasoa mai ia te a’u ma ua aoteleina i ni manatu lea o le a ou faasoaina atu nei ma faamoemoe e mafai ona fesoasoani e taliina nisi o na fesili ma luitau.
Faalogo i le Agaga Paia
E ese mai ai i lagona o nisi o outou i nisi taimi, sa ou folafola atu e tali mai le Tama Faalelagi ia tatou tatalo i Lana ala. Mafaufau i mau nei:
“Aua o i latou uma e ole atu, e to mai i ai; ma o ia o le e saili, e maua e ia; ma o le e tuitui atu, o le a tatala mai ia te ia” (3 Nifae 14:8).
“Ae afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua; ona foaiina mai ai lea ia te ia” (Iakopo 1:5).
“Faauta, o le a Ou tau atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto” (MF&F 8:2).
E faapefea la ona tatou mauaina tali ma faaaliga? E faapefea ona tatou iloa o le Agaga Paia ae le na’o o tatou lava mafaufauga? Ou te fia faasoa atu ni aafiaga se lua i lo’u olaga ua avea ma ni mamanu.
Ina ua uma ona ma tafafao faamasani ma Sister Teh mo sina taimi, na manino lava ua ou manao e faatasi ma ia e faavavau. E masani lava, sa ou faia o se mataupu o le tatalo faatauanau ma le anapogi. Sa leai se suiga faapitoa i o’u lagona mulimuli ane. Ou te lei lagonaina se mu i lo’u loto. Ae peitai, sa faaauau pea ona ou maua se lagona lelei e uiga i la’u faaiuga, o lea sa ou tumau ai pea. Sa maua foi e Sister Teh le tali lava e tasi, o lea la ua ma i ai nei. Talu mai lena aafiaga, ua ou mauaina le tele o a’u faaiuga i se tulaga lava e tasi (tagai MF&F 6:22–23).
E faatusatusa lena mea i aafiaga ia ua ou mauaina nei e faatatau i ni tofiga faapitoa mai le Korama a Aposetolo e Toasefululua e valaau se peresitene fou o se siteki. A’o o’u alu atu i lenei tofiga i le agaga o le tatalo ma le anapogi, sa faamanuiaina a’u i ni uunaiga manino lea na fesoasoani ia te a’u ia ou iloa po o ai e tatau ona valaauina. Na muai oo mai uunaiga i nisi taimi, i nisi taimi i le faagasologa, pe i nisi foi taimi ina ua maea le faagasologa o le faatalanoaga. Sa ou lagona i taimi uma le mu o lo’u loto. Ua ou iloa talu mai lena taimi le ala e taitaia ai a’u e le Agaga Paia i ia ituaiga tofiga.
Aisea e eseese ai le auala e fesootai mai ai le Agaga Paia ia te a’u? Ou te le iloa. O le mea taua, ua ou aoao ia iloa nei mamanu e avea o ni auala ou te mauaina ai ni faaaliga patino. Ou te maua le mafanafana ma le lototele i le apoapoaiga lenei, “Ia e lotomaulalo; ona taitaiina ai lea o oe e le Alii lou Atua, ma tali atu i au talosaga” (MF&F 112:10).
Filifili le Lelei nai lo le Leaga
O nisi tagata e mafaufau ua amata ona faigata ma faigata atili ona iloa o le sa’o mai le sese. E foliga mai ua matua faateleina le faigata o le iloaina o le sa’o mai le sese. O le tele o manatu le sa’o ae lauiloa o nei vaitaimi ua foliga mai e sa’o, pe a vaaia e ala atu i ni tioata vaapiapi. Peitai o lapisi tuai ua kavaina e ni pepa fou ma faasalalauina mai i ni faasalalauga fatufatuai e avea pea lava ma ni lapisi.
O le iloatino o le sa’o ma le sese e le manaomia ai le faafaigataina. E oo lava i le taimi ae tatou te lei mauaina le meaalofa o le Agaga Paia, sa faamanuiaina i tatou i le Malamalama o Keriso.
“Aua faauta, ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga; o le mea lea, ou te faaali atu ai ia te outou le ala e faamasino ai; ona o mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso; o le mea lea e mafai ai ona outou iloa ma le malamalama atoatoa ua mai le Atua.
“Ae o soo se mea e faatauanauina tagata ia latou faia le leaga, ma ia le talitonu ia Keriso, ma faafiti o ia, ma ia le auauna i le Atua, ona outou iloa lea ma le malamalama atoatoa ua mai le tiapolo; ona o le ala lea e galue ai le tiapolo, aua e le faatauanauina e ia se tagata ia faia le lelei” (Moronae 7:16–17).
O se tasi o tofotofoga sili o o tatou aso o le lagolagoina lea o le perofeta soifua. O le toatele o i tatou o le a fai mai, “Oi, e faigofie lena mea. Ua uma ona ou faia lena mea. Seki.”
Ae e ofoofogia le vaaia o le ala e tali atu ai nisi o tagata o e sa manatu na lagolagoina le perofeta soifua i nisi o manatu taatele o le aso. Pe a feagai ma uunaiga a tupulaga, o nisi o i tatou e faia faapei, pe fausia ni manatu lea e fautua mai ai faapea tatou te leiloa o loo i ai se perofeta soifua.
Saili le Paleni Sa’o
Pe ua tele naua ea au mea o fai ua e lagona ai le pei ua fetosoai oe i ni itu eseese? E te iloa? O le a faateleina le leaga. O le fesili la: E faapefea ona e mauaina le paleni sa’o?
Ia faatuina e avea ma ou sulu taiala le natura e faavavau o o tatou agaga ma lou faasinomaga o se atalii po o se afafine o le Atua. Taulai atu lou malosi i lena upumoni ma lona uiga. A le o le aveesea mai o isi mea uma mai lou olaga po o le a pauu atu lava i o latou tulaga tatau ai.1 E lua ni mau e mafai ona avea ma ni mataupu faavae taiala:
“Ae ia outou muai saili le malo o le Atua ma lana amiotonu, ma o le a faaopoopo atu ia te outou nei mea uma” (3 Nifae 13:33).
“A ia outou teuina mo outou lava oa i le lagi, i le mea e le o i ai se mogamoga po o se ele e faaleagaina, ma le osofaia e tagata gaoi pe gaoia:
“Aua o le mea ua i ai lo outou oa, e i ai atoa foi ma o outou loto” (Mataio 6:20–21).
Talitonu i ai pe leai, sa ou i ai i se tasi taimi i le tulaga o tou i ai nei. Sa i ai se taimi i lo’u olaga a’o ou faigaluega tumau, aoga i le po, ma i ai se galuega lona lua le tumau pe a tuua le aoga seia oo i le vaveao—a’o ma faafaileleina ai ma Sister Teh le ma aiga laiti. E na o ni nai itula ou te moe ai i ni nai aso o le vaiaso mo le lua masina. E ese mai lena mea, sa ou galue i le au epikopo a le uarota.
O se tasi na o taimi na sili ona aoga i lo’u olaga. Ou te le iloa pe na ou faaaogaina lelei atoa le 24 itula o le aso e pei ona ou faia i lena vaitaimi.
Na faamanatu mai e Peresitene Gordon B. Hinckley (1910–2008) ia i tatou faapea ua i ai se tatou tiutetauave i lo tatou aiga, i lo tatou pule o falefaigaluega, i le Alii, ma ia i tatou lava.
E faapefea ona tatou faapaleniina na tiutetauave? Sa saunoa mai Peresitene Hinckley: “Ou te le manatu e faigata lena mea. Sa ou galue i le tele o tofiga i lenei Ekalesia. O a’u o se tamā o se fanau e toalima, sa laiti ma tuputupu ae a’o ou galue i na tofiga eseese. … Sa ma fiafia i le olaga. Sa faia a matou afiafi faaleaiga. Sa matou faia le mea na faamoemoe mai le Ekalesia ia matou faia.”2
Fiafia e oo i le Iuga
O le tumau e oo i le iuga e le o faatatau i le faamaeaina o se lisi o mea e fai a le talalelei ona fai atu lea: “Ua ou lelei. Pau lava la’u mea e fai i le taimi nei o le agai i luma e aunoa ma se taumafaiga ma faatumauina.” Nai lo lena, e faatatau i le faaauau pea o le aoaoina ma le tuputupu ae. O le talalelei a Iesu Keriso e faatatau lava i le salamo faifaipea ma suia—o se taumafaiga faifaipea ma e le faigofie.
Fai mai le Tupu o Peniamina, “Ma ia vaai ia faia nei mea uma i le poto ma le faatulagaga lelei; ona e le tatau i se tagata ona momo’e televave atu nai lo le malosi ua ia te ia” (Mosaea 4:27).
Ua taliaina e nisi o tagata o le Au Paia o Aso e Gata Ai lenei fuaitau o se faamaoniga mo lo latou le naunau e taumafai malosi po o le faia o le mea sili latou te mafaia. O le faafitauli, ua latou taulai atu i le na o le afa muamua o le fuaitau.
O le afa lona lua lea: “e tatau ia te ia ona filiga, ina ia mafai ona manumalo o ia i le taui; o lea, e tatau ona faia mea uma i le faatulagaga tatau ai.” O le tuufaatasia o afa e lua e faamaninoina ai le uiga moni lava o le faia o mea i le poto ma le faatulagaga tatau.
Sa faailoa mai ia te a’u e se uo taalo talavou se mea mataina ua ta’ua o le matagi lona lua, o se lagona o le toe faafouina o le malosi lea e avatua ia te oe le malosi e faaauau ai e tusa lava pe ua e lelava.
I le sailia o se matagi lona lua i isi vaega o le olaga, sa tau mai ai e la’u uo “I le avea ai ma se tagata aoga i le kolisi, e mafai ona matua faigofie lava le sau i le fale mai le leva o le po ma faia se ‘alofaga ua matua vaivai lava e fai ni tatalo po o le faitau o tusitusiga paia po o le asiasi soo atu i le malumalu. E mafai ona tele naua ni ‘alofaga mo le le faia o nei mea, aemaise lava mo ni tagata aooga i le kolisi. Ae i le iuga, e manaomia lo tatou sailia o lo tatou matagi lona lua ma faia na mea laiti.”
Atonu nai lo le tumau seia oo i le iuga, e mafai ona tatou sailia la tatou matagi lona lua—o tatou matagi faaleagaga—ma fiafia e oo i le iuga. Ou te molimau atu e mafai ona tatou faia lena mea pe a tatou mulimuli i musumusuga mai le Agaga Paia, filifili le lelei nai lo le leaga, ma faapaleniina a tatou tiutetauave.