O Faatosinaga a se Tama Amiotonu
E alala le tusitala i Kalefonia, ISA.
O le vaavaai atu i tama amiotonu ua pei o ni ou tama ma lou Tama Faalelagi, na ou aoao ai i le mea e tau o le tulaga moni faaletama.
Atapue o le tusitala ma lana tane ma le afafine na saunia e Jesse Warren
I lou tuputupu ae, sa lei i ai sou tama faalelalolagi i lou olaga e faamasani au i le ituaiga alofa o loo i ai i lou Tama Faalelagi mo au. Nai lo o lena, sa ou matauina isi alii o e na faaalia mai Lona alofa ma sa avea ma faataitaiga o le tulaga moni faaletama. Na aoao mai Peresitene James E. Faust (1920–2007), Fesoasoani Lua i le Au Peresitene Sili, “O le tamalii o le tulaga faaletama ua tuuina mai ai ia i tatou sina vaaiga o uiga auaumama paia o lo tatou Tama oi le Lagi.”1 E ala mai i faataitaiga o le toatele o i latou ua pei o ni [ou] tama, e aofia ai tagata o aiga lautele, taitai o le Ekalesia, alii amiotonu i tusitusiga paia, e oo lava i faiaoga maelega o aiga, na ou aoao ai e uiga i uiga faaalia o le Tama Faalelagi ma uiga auaumama faatamalii e mafai e tama faalelalolagi ona atinae e faataitai ai ia te Ia. Mulimuli ane, sa mafai ona ou liliuina le lototiga na ou lagonaina mai le leai o se tama faalelalolagi i le olioli i sootaga vavalalata e mafai ona ou atinaeina ma lou Tama Faalelagi.
Tumau ma Lagolagosua
O lo tatou Tama oi le Lagi e le femoumouai. Ua tatou faitau o Ia “ua tutusa lava o ia ananafi, i le aso, ma le faavavau” (Mamona 9:9). Ua ou matauina o tama faalelalolagi tamalii e mulimuli i le faataitaiga a le Tama Faalelagi o le lemaluelue. O se tama tamalii e faamaoni i lana upu i mea uma. E malamalama o ia o le tumau e fesoasoani i ana fanau ia lagona le saogalemu ma le alofaina, ma e i ai o ia i taimi o faalavelave ma le olioli.
E malamalama foi lo tatou Tama Faalelagi i le ituaiga o galuega faigata e manaomia ina ia agavaa ai e mafuta faatasi ma Ia e faavavau. Na te silafia i tatou taitoatasi e ala i le igoa, ma ua Ia faataga i tatou ia oo i luitau ina ia mafai ona faamamaina ai i tatou. O se tama faalelalolagi tamalii na te faatagaina foi lana fanau e tauivi mai lea taimi i lea taimi aua ua ia iloa o luitau e aumaia ai avanoa mo le tuputupu ae.
O lou toalua o se tagata talenia tele i le faatufugaga o le karate. Sa aoaoina o ia e lona tama ma e masani ona tala mai o lona tama sa faafaigataina mea mo ia nai lo isi tagata aooga. O le aoaiga a lona tama na faamalosia ai o ia ma fesoasoani e vave ai lona faasolosolo i luga, E pei o lo tatou Tama Faalelagi, o tama faalelalolagi tamalii e faamalosiau i a latou fanau e fai mea sili latou te mafai ao ofoina atu le malosi, alofa, ma le lagolagosua.
“O Galuega ua aunoa ma se Gataaga”
O le galuega a lo tatou Tama Faalelagi e faavavau ma e aunoa ma se gataaga (tagai Alema 12:25–33). I se auala e talitutusa lava, o le galuega a se tama faalelalolagi tamalii e le gata foi. O tama tamalii e faia i taimi uma galuega lelei ma finafinau mo le amiotonu. Latou te sao ma faamaoni i lo latou usiusitai i poloaiga a le Atua. Latou te faataatiaese tausinioga manatu faapito mo le manuia lo latou aiga. I le “O le Aiga: O Se Folafolaga i le Lalolagi,” ua aoao mai ai perofeta soifua e faapea, “I le fuafuaga paia, e tatau ona pulefaamalumalu tamā i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga.”2 O lenei mea e le nao le puipuiga faaletino e aofia ai, ae faapena foi i le puipuiga faaleagaga. O tama tamalii e taitai e ala i faataitaiga ma ofo atu le alofa ma fautuaga i a latou fanau. Latou te lapatai atu foi e uiga i mea matautia faaleagaga pe a tatau ai.
O Se Tala i le Faamalosia o le Aiga
I lana tusiga i le New York Times “The Stories That Bind Us,” na tuuina mai ai e Bruce Feiler se vaaiga aoao o suesuega e faatatau i le faavaivaia o le aiga. I nei suesuega, na maua ai e tagata tomai faapitoa i mafaufau o tagata, o tamaiti o e faaalia le malolosi na aafia i se tala o se aiga malosi, lea sa fesoasoani latou te lagona ai latou te auai i se mea e tele atu. Fai mai Feiler, “Afai e te manao i se aiga e sili ona fiafia, ia fatufatu, faaleleia, ma toe faamatala le tala o taimi lelei o lou aiga ma lou gafatia ona toe tulai ae mai taimi faigata. O lena faatinoga e tasi e mafai ona faateleina ai avanoa o le a tutupu manuia ai lou aiga mo le tele o augatupulaga a sau.”3
O se faataitaiga o lenei mea e mafai ona vaaia i le Mose 1. Sa faamalosia Mose e ala i lona malamalama i le fuafuaga a le Atua ma lona lava faasinomaga paia. Ina ua faaosoosoina o ia e Satani, sa tali atu Mose ma le malosi: “O ai oe? Aua faauta, o aʼu o se atalii o le Atua, i le faatusa o lana Toatasi na Fanaua; ma o fea o i ai lou mamalu, e tatau ai ona ou ifo atu ia te oe?” (Mose 1:13). Sa faapea foi ona i ai ia Mose le lototele e poloaiina ai Satani e aluese.
O tama faalelalolagi tamalii e faamalosia a latou fanau e ala i le faamanatu ia i latou e uiga i o latou faasinomaga paia o ni fanau agaga o le Atua. Sa latou fesoasoani e fausia se aiga malosi e ala i a latou faataitaiga lelei ma faamautinoa e aafia ai foi a latou fanau. O lenei mea ua tuuina atu ai ia latou fanau se lagona malosi o le faamoemoe ma le talitonu e faamanuiaina ai.
Sailiga mo se Tane Tamalii
Ao ou tafao faamasani, sa ou sailia se soa faavavau o le o le a avea ma se tama tamalii. Talu ai ona sa ou ola ae e aunoa ma lena faataitaiga i lou olaga o se tamaitiiti, sa faigata atu ia te au ona iloa ia uiga faaalia uma e tatau ona i ai i se tama faalelalolagi tamalii. Sa ou le fiafia ona sa lei tuuina mai i lou faamanuiaga faapeteriaka ni taitaiga auiliili e uiga i le tagata na finagalo le Tama Faalelagi ou te faaipoipo i ai. Na pau lava le faamatalaga, e tatau ona ou sailia se tasi o le e mafai ona aveina au i le malumalu. Ae oo foi i lenei faatonuga lea sa foliga mai e faigofie, sa luitauina foi. E ui ina sa i ai nisi o ou aafiaga lelei i tafaoga faamasani, sa masani ona ou popole ona a le o le, sa lei i ai se tamaloa faapena po o le, sa tatau lava ona ou tigaina i tofototoga e le muta o le loto.
E ui lava i lou atuatuvale ona o ou aafiaga, sa faaauau pea ona ou tatalo mo se toalua o le o le a avea ma se tama amiotonu mo lau fanau, o le o le a alofa ia i latou ma i ai pea i o latou olaga. E pei o lou tina faamaoni, sa ou iloaina e tusa lava po o le a le mea e tupu, o le a mafai ona ou faalagolago atu i lou Tama e Faavavau mo le lagolagosua.
I lou tei tele ma le fiafia, sa tali mai au tatalo i le taimi tonu lava a le Tama Faalelagi. O se faamalologa ia te au le matauina o faataitaiga agaalofa a lou toalua o le ituaiga tagata e tatau ona i ai se tama. Ou te faafetai i lona mulimuli i faataitaiga na faatulaga e perofeta ma aposetolo ma ua ia filifili e teufatuina ma alofa ia te au ma le le manatu faapito. O lana faataitaiga o se tane agaalofa ua faamanuiaina ai foi le ma fanau. Ua tumu lou loto i le faafetai mo lona faamaoni i tofotofoga, o lana faataitaiga o le galue malosi, o lona agavaa e faaaoga le perisitua, ma le alofa mama ma le lemaluelue o loo ia faaalia o se tama talavou.
O Tama ua siomia ai i Tatou
O se atavali vai na saunia e le tusitala o lana tane ma le afafine. Sa musuia o ia e tulitulimatagau faatufugaga e lona faiaoga o aiga—o se tasi sa avea e pei o se tama i lona olaga.
E leai se tapulaa i faatosinaga a se alii o le e malamalama, e pei o Mose, pe o ai o ia. Na aoao mai Sister Sheri Dew, o le sa avea ma Fesoasoani Lua i le Au Peresitene Aoao o le Aualofa, o tamaitai uma o e [faia le galuega o le] faafailele ua faataunuuina le matafaioi o le avea ma se tina, e tusa lava pe lei avea i latou ma tina i lea taimi. “O i tatou uma o tina i Isaraelu,” sa ia molimau mai ai, “ma o lo tatou valaauga o le, ia alofa ma fesoasoani e taitai le tupulaga faiae e ala atu i auala matautia o le olaga nei.”4 O alii o e ua avea o ni faataitaiga amiotonu ua faataunuuina le matafaioi o le avea ma tama i Isaraelu, ma o a latou faataitaiga mama e mafai ona oo i tua atu o lo latou lava aiga.
Ina ua mavae luitau o lou laitiiti, ua ou mautinoa ua silafia lelei lava e le Tama Faalelagi le mea na ou manaomia e mafai ai ona ou faatuatuaina lau soa e faavavau. Sa Ia tuuina le tele o faataitaiga tumau o tulaga faaletama i lo’u olaga. O i latou nei na aofia ai lou tamamatua amiotonu, o le sa alofa i le Alii, ma se faiaoga maelega o aiga, o le na—malamalama i tapulaa o mea tautupe a lou aiga,—sa ia aveina atu au o se tagata aoga i lana aoga faatufugaga ma musuia ai au e mulimuli i ona tulagavae faapolofesa. I lou olaga o se talavou matua, sa tuuina mai ai foi le faamalologa faalelagi e ala i faamanuiaga e lei mafaufauina o le mauaina o se tama fai amiotonu, o le sa onosai i le faatuai ona ou faatuatuaina o ia o se tagata e avea ma ou tama ma o le sa faaauau pea ona faaali mai le agalelei ia te au.
E ala i faatosinaga amiotonu o i latou nei na avea ma [ou] tama, ua ou maua ai le faamoemoe, faamalologa ma le olioli. Ou te faafetai mo alii uma o e o loo mulimuli i le faataitaiga na faatulaga e lo tatou Tama oi le Lagi ma taumafai ia avea ma faataitaiga o ni tama tamalii.