Mai le Misiona
Fesoasoani Faaopoopo
E alala le tusitala i Iowa, ISA.
I lau misiona, atonu e te feiloai ai i tagata sailiili o e manaomia se tasi i o latou tafatafa, e naunau e maulu i le faagasologa faatasi ma i latou.
Ata pue o le tagata maulu i le faguea na saunia e le Getty Images
Sa ou faasolo i lalo i lau lava saoasaoa. Lima futu (1.5 m) … sa ou faalogoina lou minoi laitiiti i le tafe. O lenei ua sefulu futu. Sa faafuasei lava ona pogisa. Sa ou lagonaina le pupuu o au manava. O le vasa malulu ma le gepu sa leai se mea na pei ai o le vaitaele sa matou faataitai ai. O le fefe ma le popole i ou omia, sa ou alu ae faatopetope ai i luga o le vai.
“O le a le mea ua tupu?” sa fesili mai ai le faiaoga lagolago ia te au. Sa amata ona ou tagi i totonu o lau mea manava. Sa ou i ai i le ogatotonu o le suega mo le faamaoniga o le maulu ma le faguea, e faatino ai se alu i lalo i le 30-futu (9 m), o se tasi o tomai manaomia ia pasi ai le suega. Sa iloa mai e le faiaoga lagolago lou popole ma faamautinoa mai ia te au o le a le afaina. Sa faamalosiau mai o ia, ae sa lei faamalosia. I se tasi o vaega, sa ia fai mai ai, ‘E te le tau faia lenei mea.’ O iina na ou iloa ai sa ou manao e fai.
Sa ou iloaina, e ui ina sa faigata lea mea mo au, sa ou manao e ausia; sa ou manao e maua lau tusi faamaonia. O lea sa ou pulea ai lou fefe ma faamaea ai tomai na totoe faatasi ma le vasega ia pasi ai le suega. Sa faigata, ae faatasi ai ma ni faamalosiauga sa mafai ai ona ou faia.
O ni masina mulimuli ane ao ou auauna atu o se faifeautalai i Peru, sa ou manatua ai lou aafiaga faigata i le maulu ma le faguea, ao ou valaauliaina tagata e faamalolosia o latou faatuatua ma sui o latou olaga. O se tasi o aiga e faapitoa ona ma fiafia ma lau soa e asiasi i ai o le au Rumay. O Carina ma Enrique ma le la fanau teine talavou e toalua o Karen ma Nikola, sa masani ona faafeiloaia i maua ma sa vave lava ona ma alolofa i ai. E lei leva ae talia loa e Carina, Karen ma Nikola le talalelei ma auai i le ekalesia.
Ae peitai, sa manaomia e Enrique sina fesoasoani faaopoopo. O le ma savali sa ese mai le mea sa masani ona ola ae ai o ia, o lea sa tau umi teisi ai ona ma maua lona talitonuina o i maua. Sa i ai ni atugaluga eseese o Enrique. O le vaega autu o le talalelei na fai ma faafitauli ia te ia o le Tusi a Mamona. E lei faalogo muamua o ia i lenei tusi, ma sa faigata ia te ia ona faitau ma malamalama i ai. O lona le masani ai sa lagona ai e Enrique lona le mautinoa.
I le itu la lena, sa pei ai Enrique o au ina ua ou toe foi i luga o le vai: sa foliga mai sa faigofie ona femaulu i lalo isi tagata uma, ao ou malo ai i le fefe. E pei foi o au, pau lava le mea na manaomia e Enrique ia faamanuiaina ai o sina fesoasoani faaopoopo.
O lenei fesoasoani sa oo mai ia te ia i ni ituaiga eseese. Sa ia te ia faifeautalai e fesoasoani ia te ia e faailoa ona atugaluga ma lagona le Agaga. Sa ia te ia foi tagata o le uarota o e sa faaaumeaina o ia ma aoaoina o ia e uiga i lona matafaioi o se tama. Ae o le fesoasoani aupito tele lava, o le aiga lava o Enrique ia.
Ao lei oo foi i o latou papatisoga, sa faia ai e le au Rumay se masani o le faia o tatalo faaleaiga ma le suesueina o tusitusiga paia. Sa latou avatu ia Enrique se seti o tusitusiga paia e lapopoa teisi anotusi ma se lomiga e faalogologo i ai ina ia mafai ona faafaigofie ai lona suesueina o le Tusi a Mamona. O na taumafaiga faatauvaa sa matuai fesoasoani lava ia Enrique. E lei i ai lava se taimi sa faamalosi ai o ia e se tasi; sa na ona latou lagolagosua lava ia te ia. E ala atu ia latou faatinoga, sa latou tau atu ai ia te ia “Matou te iloa e mafai ona e faia lenei mea.”
O lenei fesoasoani na mafai ai e Enrique ona iloa mo ia lava le mana o le Tusi a Mamona. I se tasi o aso, sa ia faailoa mai ai sa faalogologo i le tusi atoa ma ua ia iloaina o le afioga a le Atua. Pe a ma le fa masina talu ona mavae le papatisoga o lona faletua ma ona afafine, sa uia ai e Enrique lea lava laasaga e tasi ma papatisoina foi.
Fai mai Enrique, e faafetai mo le fesoasoani ma le onosai sa ia maua na mafai ai ona oo i le mea ua i ai o ia i le aso. I le avea ai ma se faifeautalai, sa ou lagonaina le faamanuiaina e molimauina le faataitaiga a lenei aiga o le alofa ao latou fesoasoani i le latou tane ma le tama e faatoilalo ona masalosaloga. Sa ou faafetai foi ona o lou aafiaga i le luitau o le maulu ma le faguea, lea na mafai ai ona ou malamalama i se auala itiiti i lagona o Enrique ma lagona o isi tagata sailiili i le taimi o le faagasologa o le liuaina.
Ao e valaaulia tagata e salamo ma sui i lau misiona, ia manatua o nisi taimi na pau lava le mea e manaomia e tagata ia faamanuiaina ai o sina faamalosiauga faaopoopo. Atonu latou te manaomia se tagata e faatuatuaina ma potomasani i lo latou itu e fai atu, “O le a le afaina. Ou te iloa e te mafaia. Ou te matuai talitonu ia te oe.” Atonu o loo latou faamoemoe o le a avea oe ma lena tagata o le e naunau e maulu faatasi ma i latou i le faagasologa, fesoasoani ia latou masani i faiga ma tomai fou, ma fesoaoani ia maua o latou faamaoniga, o le faamaoniga mulimuli lea a le Alii.