E Silafia Oe e le Tama Faalelagi

Saunia e Sister Cristina B. Franco

Fesoasoani Lua i le Au Peresitene Aoao o le Peraimeri

O Aso Sa uma lava i se taulaga laitiiti i Atenitina, e faapotopoto ai se vaega o tagata i lalo o se laau e faitau tusitusiga paia ma aoao e uiga i le talalelei. O nisi o tagata o ni tagata o le Ekalesia. Ae o le toatele o i latou sa lei papatisoina, sa latou matuai mananao lava e papatiso!

Ae peitai, sa i ai so latou faafitauli. E mamao lava le mea latou te nonofo ai mai isi taulaga. Ua umi tele e lei i ai ni taitai o le Ekalesia na o mai e asiasi i lo latou taulaga.

Ona latou faalogo lea e faapea, sa i ai nisi o faifeautalai i le taulaga pe a ma le fa itula le mamao ese. Sa latou saosao tupe uma ina ia mafai e se alii e toatasi ona faatau se pepa malaga o le pasi e alu i le taulaga lea sa i ai faifeautalai. Ina ua taunuu atu o ia iina, sa faatalitali o ia i le nofoaga e tau i ai pasi. Sa manatu o ia, o le nofoaga aupito lelei lea e sue ai faifeautalai.

Ina ua mavae ni nai itula, ona ia vaaia ai lea o ni alii talavou se toalua. O i laua o ni faifeautalai! Sa ia ta’u atu ia i laua e uiga i tagata i lona nuu. Ona fuafua ai lea e faifeautalai ma le peresitene o le misiona se malaga e feiloai i nei tagata.

O le aso sa o mai ai le peresitene o le misiona ma faifeautalai, e toatele tagata sa faapotopoto faatasi e feiloai ia i latou. O lea la ua mafai nei ona papatisoina i latou sa lei papatisoina. Ina ua uma ona aoaoina i latou i lesona, sa saunia i latou!

O le vaitafe aupito lata mai sa matuai mamao foi, o lea sa latou pamuina ai le vai mai se vaieli ma faatumu ai se pa’u taele feaveai. E tolu itula na alu i le faatumuina o le pa’u taele! E 27 le aofaiga atoa o tamaitai, alii, ma tamaiti na papatisoina i lena aso. Sa faatumulia i latou i le olioli!

Sa silafia e le Tama Faalelagi sa mananao nei tagata e papatiso, ma sa Ia fesoasoani ia i latou i le sueina o faifeautalai. E silafia foi oe e le Tama Faalelagi. O loo Ia silafia le mea o loo e i ai, ma le tagata e i ai oe, ma mea e te manaomia. Na te faafofogaina ma tali mai i au tatalo. Po o le a lava lou lagonaina o le tuuatoatasi, o loo i ai o Ia i taimi uma iina. E le o tuua lava na’o oe. E mafai ona e liliu atu ia te Ia i taimi uma.