O le Faamaoni ia te Au Lava—ma i le Atua
E alala le tusitala i Iuta, ISA.
O lou faamaualuga na taofia ai au mai le taliaina o le aoaiga a le epikopo o se mea moni—ae mata e mafai moni ona ou finau ma le Agaga Paia?
Pe a ma le afa o lau misiona, sa ma tauivi ai ma lau soa ina ia matou galulue lelei ma le ma taitai misiona o le uarota. Sa i ai ni feeseeseaiga eseese, o lea sa tonu ai ia i ma’ua e talanoa i le epikopo e iloa ai le mea e tatau ona matou faia. I le taele o [lo’u] loto, sa ou faamoemoe ai ia tau lava o le talanoa i ai o le epikopo ma faaleleia o matou faafitauli mo ma’ua.
Ae nai lo o lena, sa ta’u mai e le epikopo ia te au, sa ou faamaualuga ma soona saili masei i isi. Sa ou alu faalii i le fale ma le lagona le malamalama ma le le fiafia—e mafai faapefea ona ia fai mai faapela e uiga ia te au? Pe sa popole ea o ia i o ma’ua luitau i le faasoaina atu o le talalelei?
A o ma savavali, sa faapa atu ou lagona i lau soa. Ae sa faafuasei lava ona oo mai se fuaitau i lou mafaufau: “e ave e tagata ua sala le upumoni o se mea faigata” (1 Nifae 16:2). Sa faapea ona taofi ai ou mafaufauga. Sa manino ia te au na oo mai lea manatu mai le Agaga. O lo’u faamaualuga na taofia ai au mai le taliaina o le aoaiga a le epikopo o se mea moni—ae mata e mafai moni ona ou finau i le Agaga Paia?
Sa ou sala, ma sa faasino mai e le Alii ia ou iloa ai.
Aveesea o le Tauamiotonuina o Au Lava
O le taimi lena, sa matuai faaosoosoina lava le aua nei ou ano i mea sa sese ona ou faia. Sa ioe foi Peresitene Dieter F. Uchtdorf, o le Korama a Aposetolo e Toasefululua. “E leai ma se tasi o i tatou e fia tautino atu pe a tatou se ese mai le ala sa’o.” “… O lea, a tatou suesueina o tatou olaga, tatou te vaavaai lava i o tatou lava manatu faaletagata, o ‘alofaga, ma tala tatou te faamatala ia i tatou lava ina ia faamaonia ai o tatou manatu ma amioga lē agavaa.”1
I lou tulaga, sa ou faatalitonuina au lava e faapea, sa ou faasea mo le manuia o le galuega faafaifeautalai i le matou eria. Ma nai lo le taliaina o le tautua faamaoni a le taitai misiona o le matou uarota—e ui sa foliga mai ia te au e le atoatoa—sa faafuasei ona ou iloa sa ou le loto faafetai, le onosai, ma o le mea moni, sa [ou] le agalelei. Ona o le uunaiga a le Agaga, sa mafai ona ou iloa ai au amioga i le tulaga moni sa i ai.
O Se Iloiloga Faaleagaga Faamaoni
O le mauaina o se aoaiga tuusao faapena mai le Agaga sa tiga, ae o se auala sili ona aoga. Sa ou iloa ai, e tatau ona ou faamaoni ia te au lava e uiga i ou faaletonu.
Sa ou iloa patino ai, e mafai ona avea le Agaga ma au uo maoae i le faagasologa. Sa ou lagona na pei sa saunoa sao mai lava ia te au ia Elder Larry R. Lawrence o le Fitugafulu, ina ua ia valaaulia tagata o le Ekalesia e “ole atu ma le faamaualalo i le Alii i le fesili lenei: ‘O le a se mea o taotaomia ai lou alualu i luma?’ … Afai o e faamaoni,” sa ia fai mai ai, “o le a vave ona manino mai le tali. O le a avea ma faaaliga na faamoemoeina mo nao oe lava.”2 Sa ou iloa sa ia te au le mana e le gata e maua ai uunaiga e uiga i o’u vaivaiga ae faapea foi ona faaleleia ai.
Mai Vaivaiga i le Malosiaga
O lo“u aafiaga sa aoaoina ai au “afai e tumau pea le natiaina o [o’u] vaivaiga ma lē atoatoa, ona le mafai lea e le mana togiola a le Faaola ona faamaloloina na vaivaiga ma avea i latou ma malosiaga.”3
Ae peitai, afai e lava lou toa ia agavaivai ma ioe i ou vaivaiga ma le lotomaualalo, e mafai e le Atua ona fesoasoani ia te au e liliu i latou i ni malosiaga e ala i Lona alofa tunoa (tagai Eteru 12:27, 1 Peteru 5:5).
O le mea a ia, o le faailoaina faamaoni o o tatou vaivaiga—po o le vaaia o i tatou lava i o tatou tagata moni—o le laasaga muamua lea i le ala o suiga lelei. Ao faaauau ona ou faamaoni ma saili le taitaiga mai le Agaga, o le a fesoasoani mai lo’u Tama Faalelagi ia ou iloa mea e manaomia ona suia o lo’u olaga. Ma ao ou faalagolago ia Iesu Keriso, Lana Togiola, ma Lona mana faamama, o le a ou vaaia le alualu i luma ia te au lava.
E ui lava ina sa le manaia le ioe i au measese i lena taimi o le aoaiga, ua ou iloa pe a ou filifili e lotomaualalo ma faamaoni ia te au lava ma i le Atua, e sili atu lou fiafia ma sili atu ona ou taliaina au lava. Ua ou iloa e ui lava i ou faaletonu, e faalelagi lou taua i lo’u Tama Faalelagi—ae e finagalo lava o Ia ia ou alualu i luma. E ala i le mana o Lona Alo o Iesu Keriso ma le salamo faamaoni, e mafai ai ona ou matuai lelei atu nai lo o le tagata e mafai ona ou moemiti e avea ai.