Sauniuniga o le Olaga
Mata O Le A Le Manaia le Aualofa?
Sa matuai ou popole lava e auai i le Aualofa, ae ona o le auala sa latou faafeiloaia ai au, sa ou aoao ai e fiafia i ai.
Ina ua atoa lo’u 18, sa mautinoa lava lou fiafia e uiga i ai. O ai se talavou e le fiafia i ai? E moni, sa ou i ai lava i le aoga maualuga, sa i ai lava ou fuafua, ma sa tatau pea ona fai au feau i le fale o le matou aiga i Kalefonia, ISA, ae ua avea au ma se tagata matua. Sa ou ulufale atu i se vaega fou atoa lava o le olaga, ma sa ou fiafia e uiga i ai. O le mea sa ou le fiafia moni ai, o le manatu lea o le i ai faatasi ma “fafine matutua” uma i le Aualofa. Sa i ai a latou fanau ma galuega ma Ulo Iila ma atonu e fiafia e tao pai i seevae tosotoso mafanafana. Sa i ai au meaaoga e fai i le fale ma tauvaga aau ma vali atigilima lanumoana, ma ou te fiafia e ’alo mai le tapenaina o lo’u potu i le umi e mafai ai. E mafai faapefea ona ou fesootai i se tasi iina? Sa ou mautinoa o le a le lagolelei, tuuatoatasi, ma le manaia. Ona ou alu ai lea.
O le mea muamua lava, o le Aualofa sa le faapea e le manaia. Sa i ai le tele o le ataata ma taliega. Sa latou faasoaina ni manatu matagofie ma le moni aiai, ae sa latou le fefefe foi e talie. O le mea lona lua, sa lei ese i latou mai ia te au. E moni, sa matutua atu nai lo au, ae sa latou tausua solo i le tasi ma le isi i le auala lava e tasi na matou tausua ai ma au uo. E silia i le faa-tasi ona fesiligia e se tasi le fesili tonu lava sa ou mafaufau i ai. Ma ina ua latou faasilasila mai le fonotaga faatamaoaiga o le vaiaso lena, sa ou te’i. Sa latou aoaoina le [fusu] mo le puipuiga o le tagata lava ia! Sa ou manao e fai le mea lena.
Sa matuai ou popole lava ina ua fai mai Sister Larsen, le Peresitene o le Aualofa ou te tu i luga e faailoa atu au, ae sa le leaga foi lena mea. Sa ataata uma mai tagata ia te au. Sa faalala i luga e Sister Edward, o lo’u faiaoga seminare i le tausagalua, ia ona limamatutua ia te au, ae sa fai mai Sister Richard, o le sa manatuaina au mai le Peraimeri, e le talitonu ua ou “[teine] matua.” Ma sa latou taulimaina au e pei “o se [teine] matua.” Sa ou lagona le pei o se tamai teineitiiti sa taaloalo i le ofuina o ofu lelei, ae i le toatele o tamaitai i lena aso, o au o se uso fou.
Talu mai lena aso, ua ou fiafia ai lava i le Aualofa, e tusa lava po o le a le uarota ou te i ai. O le taimi lava ou te savali atu ai i totonu o le potu o le Aualofa, ou te lagonaina: lena sootaga faaleuso ma le lagona o le auai ai. Ou te fiafia e fai le mea sili ou te mafaia e siitia ai ou uso o le Aualofa ma aoao uma mai ni mea ou te mafaia mai ia i latou.
Ma sa iloa ane ai, e fai foi si ou feololo i le faiga o pai.