E I Ai Pea le Malamalama Iina

Saunia e Elder Dieter F. Uchtdorf

O le Korama a Aposetolo e Toasefululua

Mai se lauga o le konafesi aoao o Oketopa 2017, aʻo avea ai Elder Uchtdorf ma Fesoasoani Lua i le Au Peresitene Sili.

I taimi o a’u malaga faataamilo i le tatou paneta o le lalolagi a o kapeteni ai i se vaalele, sa ou maofa pea i le matagofie ma le atoatoa o foafoaga a le Atua. Sa faapitoa lo’u maofa i le sootaga i le va o le lalolagi ma le la. Ou te manatu i ai o se lesona loloto o meafaitino, i le auala o loo i ai le pouliuli ma le malamalama.

E pei ona tatou iloaina uma, o itula uma e 24 e liliu ai le po i le aso ma le aso e liliu i le po.

O lea la, o le a le po?

O le po e leai a se mea ua na o se atalafoia.

E oo lava i po e sili ona pogisa, e le muta lava le faasusulu mai e le la o lona malamalama. E faaauau pea ona susulu tele mai. Ae o le afa o le lalolagi o loo i ai i le pouliuli.

O le leai o se malamalama e mafua ai ona pogisa.

A oo ina pa’u mai le pogisa o le po, tatou te le faanoanoa ma popole faapea ua le toe i ai se la. Tatou te le manatu ua le o toe i ai le la iina pe ua mate foi. Ua tatou malamalama o loo tatou i ai i se atalafoia, o le a faaauau pea ona taamilo le lalolagi, ma e iu lava ina toe oo mai ave o le la ia i tatou.

O le pouliuli e le o se faailoga lena e le o i ai se malamalama. Ae tele lava, o lona uiga tatou te le o i ai i le nofoaga sa’o e maua ai le malamalama.

E faaauau pea ona susulu mai le malamalama faaleagaga i luga o mea uma na foafoaina e le Atua.

E faitalia lava i tatou pe tatou te i ai i le nofoaga sa’o e vaai atu ai i le malamalama faalelagi ma le upumoni o le talalelei a Iesu Keriso. E tusa lava pe oo mai le po ma foliga mai ua pogisa le lalolagi, e mafai lava ona tatou filifili e savavali i le malamalama o Keriso, tausi i Ana poloaiga, ma molimau atu ma le lototele i Lona moni ma Lona silisiliese.

O taimi uma tou te ua’i atu ai o outou loto i le Atua i tatalo faamaulalo, tou te mauaina Lona malamalama. O taimi uma tou te saili atu ai i Lana afioga ma Lona finagalo i totonu o tusitusiga paia, e faatuputeleina ai lava le susulu o le malamalama. O taimi uma tou te matauina ai se tasi o mafatia ma ositaulaga ai lou lava toafimalie e aapa atu ai ma le alofa, e faalauteleina le malamalama ma maena. O taimi uma e te teenaina ai se faaosoosoga ae filifili le mama, o taimi uma e te saili atu ai [mo se faamagaloga] pe faamagalo atu, o taimi uma e te molimau atu ai ma le lototele e uiga i le upumoni, e tuliesea ai e le malamalama le pouliuli ma tosina mai ai isi o loo saili foi i le malamalama ma le upumoni.