Auaunaga i le Ekalesia
O Le Mea Sa Manaomia ai i Ma’ua
E alala le tusitala i Massachusetts, ISA.
O se uunaiga e siitia atu i Brooklyn, Niu Ioka, sa taitai atu ai i maua i auaunaga ma faamanuiaga e lei mafai ona ma mafaufauina.
Atapue o le aiga o Eyi
I le 2013 sa ma nonofo i Manhattan, Niu Ioka, ISA. Sa ma fiafia i le ma uarota. Ona sa ma faatalitalia le fanau mai o le ma tamaitiiti muamua, o lea na amata ai ona ma vaavaai mo se falemautotogi tele atu i totonu o le uarota. Sa ma maua le fale sa foliga mai e fetaui lelei, ae sa ese lava le faalogona.
O le tautotogo lena, sa amata ai ona lagona e Laura atonu e tatau ona ma siitia atu i Brooklyn. Sa lei mautinoa tele e Wil. Ma te lei iloa ma se mea e uiga ia Brooklyn, ma sa manao Wil ia latalata i lana galuega o le faaunetupe i le faletupe, ona o le uumi o ona itula faigaluega, ma sa le umi le alu i ai. Sa tonu ma te tatalo e uiga i ai ma faalogologo mo se tali i le taimi o le konafesi aoao.
Ao ma matamata i lauga i luga o le komepiuta feaveai i totonu o le ma tamai falemautotogi, sa faasoa mai e Elder Stanley G. Ellis o le Fitugafulu sona aafiaga na i ai ao avea ma se tasi o le au peresitene o se siteki. Fai mai o ia, o aiga e siitia atu i totonu o lana siteki i Texas, ISA, e masani ona fesili po o le fea le uarota e sili ona lelei. E na o le faatasi lava i le 16 tausaga sa i ai se aiga sa fesili po o le fea le uarota sa manaomia le fesoasoani.1
Sa ma ootia lava i lana tala. Sa taliina ai a ma tatalo. O lea la, nai lo o le nonofo ai i se uarota sa ma fiafia i ai, sa ma lagonaina ai le lagolelei, ma sa i ai se vasega pepe ma se Peraimeri maoae, sa ma talia ai le fautuaga a Elder Ellis ma tatalo po o fea e tatau ona ma siitia i ai.
I le taimi lea, sa ma auauna atu o ni tagata faigaluega i sauniga o le Malumalu a Manhattan Niu Ioka. O se tasi o tagata faigaluega iina na te iloa lelei le Aai o Niu Ioka. Sa ia fautuaina mai ni uarota se lua sa manatu o ia e mafai ona ma fesoasoani i ai—e i ai uma i Brooklyn.
O le uarota muamua sa mamao tele mai le galuega a Wil. O le uarota lona lua sa latalata mai, ma sa ma lagonaina ua ma maua le nofoaga sao ina ua ma asiasi atu i le sauniga faamanatuga a le uarota. O le toatele o le au paia o tagata fai mai mai Haiti. Ona o Wil e sau mai Gabon ma e tautala Faafarani, sa ma manatu ai o le a avea le uarota ma se aiga maoae mo i ma’ua.
O Aafiaga Mataina
I ni nai vaiaso mulimuli ane, sa maua ai se ma falemautotogi ma siitia atu i ai. Sa lei leva ae valaauina Wil e auauna atu i ni auala anoa eseese. O le malamalama i le gagana sa tau umi teisi, ae sa ia lagonaina le faamanuiaina i le vave ona lava lona malamalama i le faaHaiti Creole, e fesoasoani ai e faaliliuupu mo le au paia i le taimi o sauniga ma faatalanoaga. Sa faamanuiaina foi Laura e auauna i ni vaega eseese, ma sa ma aafia i le galuega faafaifeautalai.
O se tasi o a ma uo na maua o se tagata sailiili talavou e igoa ia Normil Romelus, o le sa sau mai Haiti mo aoaoga. E asiasi mai o ia faatasi ma faifeautalai i le ma fale, ma ma te fesoasoani e aoao o ia i le faaFarani ma le faaCreole. Ina ua uma ona papatiso ia Normil, sa ma lagolagoina o ia i le polokalama a le Ekalesia o le Pathway, lea sa ia feiloai ai i lona toalua i le lumanai. Sa lagona e Wil le faafetai i le auai ai i le la faaipoipoga i le Malumalu o Manhattan.
Sa ma feiloai foi i se tuafafine faamaoni o le sa sau mai Niu Ioka mai Haiti ina ia togafitia i le kanesa. I le taimi sa nofo ai o ia iina, sa faia ai e le aufono a le uarota mea uma na mafaia e fesoasoani ai ia te ia ia mautinoa na maua mea sa ia manaomia, e aofia ai le feaveaiga i le alu ma le sau mai ana togafitiga. Sa faamanuiaina i maua e auauna ma asiasi atu ia te ia i lea taimi. Sa matou faamoemoe mo se iuga lelei atu, peitai na maliu o ia.
O na aafiaga e lua ua faatusa ai mea sa faia e le uarota mo tagata—fesoasoani ma sii ae i latou. Ma te faafetai mo nei aafiaga ma isi aafiaga matagofie.
O Mea e Sili ona Taua
Sa ma aoaoina, a tatou auauna atu i le Alii ma Ana fanau, Na te tausia i tatou. O o ma aafiaga i Brooklyn sa fesoasoani ma te faatumauina ai mea i le tulaga e tatau ai. Sa faapitoa ona latou fesoasoani ia Wil ia le popole ai i tulaga tautaua o le faigaluega ai i le Wall Street ae manatua mea e sili atu ona taua. I le faletupe o faaunegatupe, e toetoe o tagata uma e faigaluega i Aso Sa. Sa masani ona fai e Wil mai le fale ia galuega sa tatau ona fai, ae ua faamanuiaina i maua e le Alii ina ia le toe alu atu i le ofisa i Aso Sa.
Ina ua ma siitia atu i Brooklyn, sa ma manatu o le a nao i maua le isi aiga e toalua i aiga e i ai tamaiti laiti i le uarota. Ae sa suia tuaoi o le uarota i le lua o vaiaso talu ona ma siitia i ai, ma sa siitia mai ai foi nisi o aiga talavou.
Mulimuli ane, ua ma fuafua e siitia atu i Gabon. Ma te lagona o o ma aafiaga i Brooklyn ua fesoasoani e saunia ai i maua ia auauna lelei atu i le Ekalesia ma tagata o Aferika. Ma te faafetai ona sa ma mulimuli i le uunaiga e siitia atu. Ua faamanuiaina i maua e le Alii—ma faaauau pea ona faamanuia i maua—i auala semanu e le mafai ona ma iloaina.