Sa Katapusan usa Na ka Mahangturon nga Pamilya
Ang tagsulat nagpuyo sa Colorado, USA.
“Bisan unsa ang imong bugkuson dinhi sa yuta pagabugkuson didto sa langit ” (Helaman 10:7).
Unsay buot ipasabut sa ‘Ang Pamilya Mahangturon’?” Nangutana si Mia. Giirog niya ang iyang piraso nga dulaanan sa pikas kilid sa board. Siya ug ang suod niyang higala, si Zoey, nagdula sa sala ni Zoey. Sa bongbong mao ang litrato nga nag-ingon nga, “Ang Pamilya Mahangturon.” Ganahan si Mia nga maminaw niana.
“Nagpasabut kana nga human sa imong pagkamatay, pamilya gihapon kamo,” mipasabut ni Zoey. Nagbutang siya og kard ug giirog ang iyang piraso nga dulaan.
Gilibut og tan-aw ni Mia ang kwarto. Daw normal ra kining tan-awon. Dunay mga kutson, mga lamesa, mga unlan, ug TV. Apan may lahi nga pagbati sa balay ni Zoey kay sa ilaha. “Ikaw ba dunay mahangturon nga pamilya?” Nangutana si Mia.
Mihangad si Zoey gikan sa pagtan-aw sa dulaan uban sa pahiyum. “Oo! Ang akong mama ug papa nakasal sa templo. Mao nga magkauban kami sa hangtud.”
“Mao bay hinungdan nga lahi ang pagbati sa inyong panimalay?” Nangutana si Mia.
Daw naglibug si Zoey. “Lahi?”
Wala mahibalo si Mia unsaon sa pagpasabut ang pagbati sulod sa panimalay ni Zoey. Malipayon kini ug maabi-abihon. Apan daw lahi ra kon isulti. “Kalimti na lang,” miingon siya. “Padayon lang ta og dula.”
Nianang gabhiona dili makahunong sa paghunahuna si Mia mahitungod sa mahangturong pamilya ni Zoey. Ganahan siya sa pagbati sulod sa balay ni Zoey. Ang pamilya ni Mia mamalhin na sa Ontario, Canada, sa pipila ka adlaw. Naghunahuna siya kon unsa kaha ang pagbati sa bag-o nilang panimalay.
“Ma, ang panimalay ni Zoey malipayon kaayo ang pagbati,” miingon si Mia samtang gipahimutang siya ni Mama sa iyang higdaanan. “Gusto ko nga ingon niana ang pagbati sulod sa atong bag-o nga balay.” Naghunahuna si Mia kon unsa niya ka pinangga ang iyang Mama, Papa, ug ang iyang mga manghud nga lalaki. “Gusto ko nga mahangturon usab ang atong pamilya.”
Hilum ra nga naminaw si Mama. Dayon miingon siya, “ako usab.”
Pagkasunod adlaw, gitawagan ni Mama ang mama ni Zoey. Nahibaloan niya nga ang pamilya ni Zoey magsimba sa Ang Simbahan ni Jesukristo sa mga Santos sa Ulahing mga Adlaw.
“Gusto kong moadto niana nga simbahan,” giingnan ni Mia ang iyang mga ginikanan samtang nag-impake sila. Hapit na mahurot ang sulod sa ilang balay karon.
“Miingon ang mama ni Zoey nga makatabang siya nato sa pagpangita og building sa simbahan,” miingon si Papa samtang gibutangan niya og tape ang karton.
Mipahiyum si Mia og mibati og kahinam. Tingali ang bag-o nilang balay may pagbati sa kamaabi-abihon ug malipayon sama sa ila ni Zoey!
Dihang napahimutang na sila sa bag-o nilang balay, nagsugod sa pag-adto sa simbahan ang pamilya ni Mia. Ang mga tawo didto mga nindot kaayo. Ang tanan magtinawganay og “Brother” ug “Sister.” Si Mia miadto sa Primary kauban sa gagmay niyang manghod. Ganahan siyang mokanta ug magbasa og mga kasulatan.
Sa wala madugay duha ka batan-ong babaye miadto sa ilang balay ni Mia. Sila si Sister Justin ug si Sister Ramos, ug mga misyonaryo sila. Gisultihan nila ang pamilya ni Mia mahitungod sa Langitnong Amahan, ni Jesus, ug sa Basahon ni Mormon. Ganahan si Mia nga maminaw mahitungod sa ebanghelyo. Bisan ang iyang mga igsoon hilum nga nanglingkod ug naminaw!
Gisultihan ni Mia si Sister Ramos ug si Sister Justin mahitungod sa panimalay ni Zoey. “Gusto kong dunay mahangturon nga pamilya sama sa kang Zoey.”
“Gusto sa Langitnong Amahan nga tanan kita makaangkon og mahangturong mga pamilya,” miingon si Sister Ramos nga may dakong pahiyum. “Gusto Siya nga magmalipayon kita.”
Sa wala madugay ang pamilya ni Mia mihukom nga magpabunyag.
Si Zoey ug ang iyang pamilya mibiyahe hangtud sa Ontario para sa bunyag. Usa ka tuig human niadto, namalik na usab sila. Niining panahona tungod kay si Mia ug ang iyang pamilya i-seal na sa templo!
Sa adlaw sa pag-seal, nagbarug si Mia sa gawas sa templo uban sa iyang pamilya, nga nagsinina og puti. Dagko sila og mga pahiyum. Gibati ni Mia ang kamaabi-abihon ug kalinaw sa sulod. “Mahangturon na kami nga pamilya karon!” misulti siya nga malipayon.
“Sakto kana,” miingon si Papa. “Mahangturon na kita nga pamilya.”