Giunsa Namo Paglampus sa Pagpaambit sa Ebanghelyo
Isip bag-ong mga kinabig, ako ug ang akong asawa wala kaayo makahibalo kon unsaon sa pagkahimong mga misyonaryo. Apan mihimo kami’g tumong nga mopaambit sa 100 ka tawo.
Never ug Everjoyce Chikunguwo
Ang akong asawa, si Everjoyce, ug ako naggikan sa gamayng lungsod sa Mutare, sa may utlanan sa sidlakan sa Zimbabwe. Human dayon sa among bunyag ug pagkumpirma, naagni kami sa misyonaryo nga buhat. Among nabasa nga “ang umahan puti ug andam na sa pag-ani” (D&P 33:7), ug bisan dili kaayo daghan ang among nahibaloan kon unsaon sa pagkahimong mga misyonaryo, nakahukom kami nga nagkinahanglan nga among “ igalab ang [among] mga sanggot, ug mag-ani uban sa tanan [namo] nga gahum, hunahuna ug kusog.”
Mga miyembro kami sa bag-o lang natukod nga Dangamvura Branch nga nahimutang sa usa sa mga kalungsuran sa Mutare. Nianang panahona, tuig 1991, may 25 ka mga miyembro ang branch. Wala madugay gitawag kami nga mga branch missionaries. Nakakat-on kami og daghan gikan sa usa ka senior nga misyonaryong magtiayon nga nagserbisyo sa among dapit. Usa ka sugyot nga ilang gihimo mao nga maghimo kami og mga tumong.
Gusto namong makapaambit sa ebanghelyo ngadto sa tanan, mao nga naghimo kami og tumong nga mopaambit ngadto sa 100 ka tawo atol sa unang tuig nga kami mga branch missionary. Tingali mga linghod pa kami, apan daw kini among matuman. Misalig kami nga tabangan kami sa Ginoo.
Pinaagi sa pagpanganta og himno sa mga miting sa Simbahan, among nadiskubrihan nga duna kami talento sa musika. Among nahukman nga gamiton ang among mga talento, mao nga nagsugod kami sa pagkanta para sa—ug kauban sa—mga tawo nga mipakita og kainterisado sa ebanghelyo samtang nakigkita kami sa pagtudlo kanila. Giubanan kami sa Espiritu samtang nanganta kami sa sagradong musika, ug gitandog Niya ang mga kasingkasing niadtong among mga gitudloan. Mao usab sa mensahe sa gipahiuli nga ebanghelyo. Gidasig namo ang tanan nga moapil sa among branch choir, ug daghan ang miapil, mga Santos man sila sa Ulahing mga Adlaw o dili. Samtang nagkadaghan ang nakakat-on mahitungod sa ebanghelyo, daghan ang miubog sa tubig sa bunyag.
Gihulagway ni Oriol Vidal
Samtang gipadayon namo ang among misyonaryo nga mga paningkamot, padayon kaming nagpuasa ug nag-ampo alang sa mga pamilya nga mipasakop sa Simbahan. Among gibati nga ang uban sa komunidad nakasaksi sa matarung nga mga ehemplo niini nga mga pamilya. Nagkadaghan ang among nadawat nga mga imbitasyon para sa pagtudlo og mga pamilya, ug ang among teaching pool napuno sa prospective nga mga miyembro.
Tungod sa pagkat-on ug pagsunod sa ebanghelyo, ang mga magtiayon nga bag-ong nabunyagan nagkasuod ug mas mapinanggaon. Nabiyaan ra sa mga ginikanan ang mga tradisyon nga wala mohaum sa kultura sa ebanghelyo. Dili na sila moinom og makahubog ug manabako. Gitudloan nila ang ilang mga anak sa eksaktong mga baruganan. Daghan niadtong kanhi nagumon gayud sa kalibutanong mga butang karon nakadawat na og mga calling sa Simbahan. Nahimo silang mga panalangin sa ilang branch ug sa ilang komunidad. Ang kamot sa Ginoo midala og dakong kausaban sa ilang kinabuhi.
Bisan og ang grabing pagpanggukod mitumaw sa Mutare niadtong higayona, wala kini makapahunong sa paglambo sa Simbahan. Daw samtang nagkadako ang oposisyon, mao usab ang gidaghanon sa mga tawo nga gustong magkat-on mahitungod sa Simbahan. Sama pananglit, dihang ang mga sakop sa nasudnong kasundaluhan nangabut nga wala magpaila aron imbestigahan ang Simbahan nga pasanginlan og sayop nga mga binuhatan, natandog sila sa Espiritu. Daghan ang nabunyagan sa wala madugay ug na-orden sa priesthood.
Pinaagi sa tabang sa Ginoo, misangput nga nakapaambit kami sa ebanghelyo nga sobra na kaayo sa orihinal namong tumong. Tungod kay andam kami nga mangita og mga paagi aron makatabang sa uban, nakasaksi kami og dakong kausaban sa daghang kinabuhi sa tibuok namong komunidad.