Mga Pagbiyahe sa Tulo ka Modernong Pioneer
Ang tagsulat nagpuyo sa Utah, USA.
Tulo ka young adult mipaambit sa ilang mga sugilanon bahin sa pagpasakop sa Simbahan ug pagmugna og panulundon sa hugot nga pagtuo alang sa ilang kaugalingon ug sa ilang mga pamilya.
Dihang nagserbsiyo ko sa akong misyon sa Melbourne, Australia, naa ko sa usa ka ward nga gilangkuban sa internasyunal nga mga estudyante. Dihang nagkat-on sila mahitungod sa mga pioneer atol sa Sunday School, naghunahuna ko kon unsa kaha sila ka interesado—hapit silang tanan mga bag-ong kinabig, ug walay usa kanila ang dunay mga katigulangan nga mitadlas sa kapatagan sa Amihanang Amerika.
Makatingala, daghan sa mga internasyunal nga estudyante nainteresado kaayo sa mga sugilanon nga gipaambit. Ang pipila kanila naghisgot sa unsang paagi may kalambigitan sila sa nag-unang mga Santos sa personal nga lebel: sama sa mga pioneer, kining mga internasyunal nga estudyante mga bag-ong kinabig ug mihimo og mga sakripisyo sa pag-establisar sa Simbahan sa mga dapit nga ilang gipuy-an. Para sa uban niini nga mga miyembro, ang Simbahan gamay pa o wala pa sa ilang yutang natawhan. Mga modernong pioneer sila, nga nagmugna og bag-o nga relihiyusong panulundon alang sa umaabut nga mga henerasyon.
Aniay tulo ka mga kasinatian gikan sa mga kinabig kinsa mipasakop sa pundok sa modernong mga pioneer.
Pagtahud sa Akong Pamilya sa Bag-ong Pamaagi
Nami Chan, Taoyuan, Taiwan
Ang akong pamilya ug daghan sa akong kapamilya sa Taiwan mga Buddhist. Sa gamay pa ko, nakahinumdom ko nga mag-andam og mga pangsakripisyo alang sa mga katigulangan ug sa daghang dios-dios atol sa Chinese New Year ug sa ubang mga holiday. Usa kadto ka tradisyon sa pamilya alang kanamo, ingon man pamaagi usab sa paghinumdom sa among mga katigulangan ug pagdala og kalinaw ug kauswagan sa akong pamilya.
Dihang pipila sa akong mga paryente mipasakop sa nondenominational Christian church, sa sinugdanan wala kini epekto sa akong pamilya. Apan atol sa Ching Ming Festival, sa pagsimba sa mga katigulangan ug pagsunog og insenso dapit sa ilang mga lubnganan, ang Kristiyano nakong mga kaliwat dili moapil. Miingon sila nga nakapasalig sila sa pagsunod sa Napulo ka Sugo, ilabi na sa “Dili ka magbaton og lain nga mga dios sa atubangan ko” (Exodo 20:3). Wala maghisgot ang akong pamilya og bisan unsang mga tinuohan kaniadto, apan sukad niadtong adlawa, ang Kristiyanidad mirepresentar sa pagkagun-ob sa mga tradisyon sa panan-aw sa akong pamilya ug gikosiderar kini nga negatibong butang.
Dihang nag-eskwela ko sa unibersidad, nakahimamat ko og mga LDS nga misyonaryo sa dalan. Kasagaran, dili unta ko interesado sa ilang isulti, apan ang pipila ka kasinatian miandam sa akong kasingkasing sa pagdawat sa ilang mensahe. Samtang nakigkita ko nila, miuyon ko nga mag-ampo ug mobasa sa Basahon ni Mormon, ug nagsugod sa paglambo ang akong personal nga pagpamatuod bahin sa gitudlo kanako. Apan, tungod sa mga pagbati sa akong mga ginikanan batok sa Kristiyanidad, wala ko mosulti nila nga gusto kong magpabunyag. Daghang bulan human sa una nakong pakigkita sa mga misyonaryo, gisultihan ra nako sa katapusan ang akong mga ginikanan nga gusto kong magpabunyag ug gusto ko nga moserbisyo og misyon. Nasagmuyo sila, apan nasayud kong naghimo ko og eksaktong pagpili.
Wala akoy mga katigulangan nga pioneer, apan akong gibati nga daw nasabtan nako ang ilang sakripisyo. Lisud ang pagbiya sa ubang mga tradisyon ug pag-atubang sa oposisyon gikan sa mga sakop sa pamilya. Bisan karon, mga lima ka tuig human ko mipasakop sa Simbahan, diin ako nakamisyon, wala mosuporta sa hingpit ang akong pamilya sa akong desisyon, apan gidawat ra nila kini. Ang pagpasakop sa Simbahan nagtugot nga akong matahud ang akong pamilya sa bag-ong mga paagi, pinaagi sa paghimo sa family history ug pag-research sa akong mga katigulangan. Ang akong pagpamatuod kang Jesukristo ug sa Iyang Pag-ula nakatabang sa pagsulbad sa bisan unsa nga problema nako sa akong pamilya.
Pagpangita og Kalipay gikan sa Ebanghelyo
Harry Guan, Utah, USA
Nagtubo ko sa China ug mikonsiderar sa akong kaugalingon nga usa ka Kristiyano, bisan tinuod og wala ako magsimbahan. Interesado ko sa Dios ug ni Jesukristo, ug sa akong hunahuna ang doktrina sa Kristiyano makahupay kaayo.
Dihang mibalhin ko sa Estados Unidos para sa kolehiyo, nagsugod ko sa pagtambong og nondenominational Christian nga simbahan. Paglabay sa pipila ka bulan, nakadungog ko mahitungod sa Ang Simbahan ni Jesukristo sa mga Santos sa Ulahing mga Adlaw gikan sa pipila ka higala nga mikonsiderar sa pag-eskwela sa Brigham Young University. Nangutana ko sa pipila ka estudyante sa Kristiyanong simbahan mahitungod sa mga Santos sa Ulahing mga Adlaw ug nakalitan ko dihang tininuod silang mipasidaan nako nga mopalayo gikan sa “Mga Mormon.” Sa una gisunod nako ang ilang tambag, apan dihang nag-scroll ko sa social media mga semana lang ang milabay, nakakita ko sa usa ka pakigpulong ni Elder Jeffrey R. Holland sa Korum sa Napulog Duha ka mga Apostoles. Sa pakigpulong, gihisgutan niya nga ang mga miyembro sa Simbahan kinahanglang matinahuron sa ubang relihiyon (tan-awa sa “Faith, Family, and Religious Freedom,” lds.org/prophets-and-apostles). Samtang naminaw ko ni Elder Holland, akong gibati ang unsay akong nahibaloan karon nga Espiritu ug mihukom nga kinahanglan kong magkat-on pa og dugang mahitungod sa Simbahan.
Misangput kini sa akong pagsimba ug sa wala madugay sa pakigkita sa mga misyonaryo. Natandog ko sa ilang mga gipangtudlo, ilabi na sa plano sa kaluwasan. Wala kaayo malipay ang akong mga ginikanan dihang mihukom kong magpabunyag, apan gidawat ra nila nga igo na ang akong kahingkod sa paghimo og kaugalingon nakong mga desisyon. Dihang gibisitahan ko sa akong mga apohan sa Amerika mga pipila ka bulan human niadto, natudloan nako sila sa ebanghelyo. Silang duha mihukom nga magpabunyag.
Ang ebanghelyo nagdala kanako og labihang kalipay ug migiya kini ngadto sa umaabut nakong asawa. Ang matag sakripisyo nga akong gihimo o akong himoon igo gayud.
Pag-andam sa Dalan alang sa Umaabut nga mga Henerasyon
Brooke Kinikini, Hawaii, USA
Mipasakop ko sa Simbahan sa 15 anyos pa lang ko, apan nagsimbahan na ko ug nagpalambo sa akong pagtuo ug pagpamatuod sukad sa bata pa ko. Bisan og ako ra ang namiyembro sa akong pamilya, ang matinud-anon nakong mga higala nahigugma nako ug gigiyahan ko nila pinaagi sa ilang ehemplo.
Dili sama sa karaang mga pioneer, wala na ko maghandos pa sa kariton tadlas sa nagkaging nga snow sa kapatagan. Sa pagkatinuod, wala ako mag-atubang og daghang kalisdanan sa pagpasakop sa Simbahan. Tinuod, nawala ang uban nakong mga higala ug mosimba ko nga mag-inusara ug mag-seminary nga ako ra. Apan kon akong hunahunaon ang epekto niini kanako ug sa akong pamilya, nasayud kong usa kadto sa pinakamaayong mga desisyon nga sukad akong nahimo. Ang akong desisyon sa pagpabunyag, nga ma-seal sa templo, ug pagpabiling matinud-anon sa akong mga pakigsaad nagmugna og kadena nga positibong makaimpluwensya sa kinabuhi sa akong tulo ka matahum nga anak, ingon man sa umaabut nga mga henerasyon, sa kahangturan.
Ang pagka-pioneer butang nga mahitungod sa pag-andam sa dalan alang sa uban. Gusto kong maghunahuna nga usa sa daghang panalangin nga akong nadawat sa pagkahimong matinud-anon nga miyembro sa Simbahan mao nga ako makatabang sa pagdala sa uban ngadto kang Kristo. Daw gamay ra nga hitabo—sama sa bunyag sa 15-anyos nga batang babaye sa Maui, Hawaii, o ang mapaubsanong pag-ampo sa 14-anyos nga batang lalaki sa kakahoyan—makausab sa kinabuhi sa mga pamilya sa nangagi, karon ug sa umaabut.
Ang modernong tawag sa mga pioneer wala lang ireserba alang sa mga kinabig. Samtang maningkamot kita sa pagtukod og malungtarong panulundon sa pagkamatinud-anon alang sa umaabut nga mga henerasyon, tanan kita pwedeng mamahimong mga pinoneer.