Ang Pagkahibalo Kon si Kinsa Ka—ug Kon si Kinsa Ka Sukad Masukad

Ni Sheri L. Dew

Mahitungod ni Sister Dew

Frame gikan sa Getty Images

Si Sheri Linn Dew natawo sa Ulysses, Kansas, USA, niadtong 1953. Kinamagulangan siya sa lima ka anak, ug dihang nahuman siya sa grade five, nag-drive siya og traktor sa usa ka umahan sa humay sa pamilya. Matag Dominggo hapiton siya og sayo sa iyang lola nga si Maudie Dew para mosimba, nga gipahigayon sa inabangan nga balay. Silhigan nila ang mga upos sa sigarilyo ug mga lata sa beer aron andamon ang kwarto alang sa pagsimba. Kay nahilakip sa usa ka gamayng branch nagpasabut nga daghan siya og himoong pagpamulong ug pagpanudlo. Nahimo siyang branch pianist sa batan-on pa siya ug nagserbisyo sa Primary presidency sa iyang branch sa pag-edad niya og 16.

Human niya naangkon ang degree sa history sa Brigham Young University niadtong 1978, mitrabaho siya isip editor sa Bookcraft. Nagpasakop siya sa Deseret Book niadtong 1988, nga nahimong executive vice president niadtong tuig 2000.

35 anyos siya dihang nasakop siya sa general board sa Relief Society atol sa kapangulohan ni Barbara W. Winder. 43 anyos pa lang siya dihang nahimo siyang Ikaduhang Magtatambag ni Mary Ellen W. Smoot sa Relief Society General Presidency niadtong 1997.

Giawhag ni Sister Dew ang kababayen-an nga sabton ang ilang bili atol sa iyang pakigpulong sa 2001 BYU Women’s Conference, nga gikutlo dinhi.

Bag-o lang, ang akong 16 anyos nga pag-umangkon nga si Megan ug duha sa iyang mga higala miabut aron magpalabay sa gabii sa among balay. Samtang nag-istorya mi nianang gabhiona, usa kanila nangutana nako kon unsay pagbati kon nagtubo ka sa usa ka umahan sa karaang mga adlaw. … Gisultihan nako si Megan ug ang iyang mga higala nga sa “karaang mga adlaw,” grabe ko kamaulawon ug wala gayud akoy pagsalig sa kaugalingon.

“Giunsa nimo sa pagbuntog kana nga pagbati?” Nangutana si Megan. Hapit na ko mohatag og mubo kaayong tubag dihang nahunong ko, mibati nga kining talagsaong batan-on nga mga babaye mas maminaw pa og daghan. Mao nga giingnan nako sila nga ang rason usa ka butang nga espiritwal: Wala kini mahitabo hangtud nga nagsugod kog kasabut unsay gibati sa Ginoo mahitungod kanako hinungdan nga ang akong mga pagbati mahitungod sa akong kaugalingon ug sa akong kinabuhi anam-anam nga nagkausab. Nangutana dayon sila: Giunsa nako sa pagkasayud kon unsay gibati sa Ginoo? Ug unsaon nila sa pagkahibalo kon unsay Iyang gibati mahitungod kanila?

Sulod sa pipila ka oras, pinaagi sa mga kasulatan, gihisgutan namo ang mahitungod sa pagpaminaw sa tingog sa Espiritu, mahitungod sa kon unsa ka matinguhaon ang Ginoo sa pagpadayag sa kahibalo nga gisulod niya sa atong mga espiritu mahitungod sa kon si kinsa kita ug unsay atong misyon, ug mahitungod sa makausab sa kinabuhi nga kalainan nga mahimo niini kon kita makahibalo.

… Walay laing mas importante sa atong paglampos ug sa atong kalipay dinhi kay sa pagkat-on unsaon sa pagpaminaw sa tingog sa Espiritu. Ang Espiritu mao ang mopadayag kanato sa ilhanan sa atong pagkatawo—nga dili lamang kon si kinsa kita apan kon si kinsa kita sukad masukad. Ug kon mahibaloan na nato kini, mahatagan og kahulugan ang atong kinabuhi bahin sa katuyoan nga makahinuklog kaayo nga kita dili gayud mao lang gihapon.

… Ang atong mga espiritu nagtinguha nga kita mahinumdom sa kamatuoran mahitungod sa kon si kinsa kita, kay ang paagi aron atong makita ang atong kaugalingon, ang atong ilhanan sa atong pagkatawo, makaapekto sa tanan natong gihimo. … Makaapekto gayud kini sa pamaagi sa atong pagpakabuhi. Mao nga, karon, dapiton ko kamo sa pagpamalandong sa bag-o nga paagi dili lang kon si kinsa kamo apan kon si kinsa kamo sukad masukad.

… Mahunahuna ba ninyo nga ang Dios, kinsa hingpit nga nakaila kanato, mireserba kanato aron maania karon, diin mas nagkataas ang risgo ug mas nagkagrabe ang oposisyon kay sa kaniadto? Diin nagkinahanglan siya og mas daghang kababayen-an kinsa makatabang sa pagpadako og paggiya sa usa ka pinili nga henerasyon diha sa pinakapiligro og espirituhanong palibut? Mahunahuna ba ninyo nga Iya kitang gipili tungod kay nahibalo Siya nga wala kitay kahadlok sa pagtukod og Zion?

… Bantugan ug talagsaon. Maisug ug determinado. Matinud-anon ug walay kahadlok. Mao kana kamo, ug mao kana kon si kinsa kamo sukad masukad. Ang pagsabut niana nga kamatuoran makausab sa inyong kinabuhi, kay kini nga kahibalo magdala og pagsalig nga dili makopya sa bisan unsang lahi nga paagi.

… Kon masabtan ninyo nga kamo pinili ug gireserba para karon, ug kon magpakabuhi kamo nga nahiuyon niana nga misyon, mas malipayon kamo kay sa kaniadto.

… Ang Dios mao ang atong Amahan, ug ang Iyang Bugtong Anak mao ang Kristo. Unta maglipay na usab kita sa pagbarug nga masaligon alang sa Manluluwas ug sa pagserbisyo uban sa kaisug ug kalig-on sa Iyang ubasan. Ug unta wala kitay kahadlok sa pagtukod sa Zion sa atong Dios—tungod kay nasayud kita kon si kinsa kita ug kon si kinsa kita sukad masukad.