Hangtud sa Sunod Natong Panagkita
Ang Basahon ni Mormon Magdala og Kabuhong
Gikan sa “The Book of Mormon—Keystone of Our Religion,” Ensign, Nob. 1986, 4–7.
Adunay gahum sa basahon nga magsugod sa pagdagayday sa inyong kinabuhi sa higayon nga sugdan ninyo ang tinuoray nga pagtuon.
Paghulagway pinaagi ni Bjorn Thorkelson
Aduna bay usa ka butang sulod sa atong kasingkasing nga naghandom nga mas mapaduol ngadto sa Dios, mas mahisama Kaniya sa atong matag adlaw nga pagpakabuhi, mobati sa Iyang presensya kanunay? Kon mao, ang Basahon ni Mormon makatabang gayud kanato sa pagbuhat niini kaysa uban pang basahon.
Ang Basahon ni Mormon wala lamang magtudlo kanato sa kamatuoran, bisan tuod naghimo kini niana. Ang Basahon ni Mormon wala lamang magpamatuod kang Kristo, bisan tuod naghimo kini niana, usab. Apan adunay mga butang nga mas labaw pa. Adunay gahum diha sa basahon nga magsugod sa pagdagayday sa inyong mga kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dako nga gahum sa pagpakigbatok sa tintasyon. Makaplagan ninyo ang gahum sa paglikay sa panglingla. Makaplagan ninyo ang gahum nga magpabilin sa higpit og pig-ot nga dalan. Ang mga kasulatan mao ang gitawag og ‘mga pulong sa kinabuhi” (D&C 84:85), ug walay laing mas tinuod pa niana kay sa Basahon ni Mormon. Kon kamo magsugod sa pagkagutom ug pagkauhaw niadto nga mga pulong, kamo makakaplag sa kinabuhi nga mas mabungahon. …
Kini nga mga saad—dugang nga gugma ug panagsinabtanay sa panimalay, mas dakong pagtahud tali sa ginikanan ug anak, paglambo sa espiritwalidad ug pagkamatarung—dili kawang nga mga saad, apan sama sa gipasabut ni Propeta Joseph Smith sa dihang siya miingon nga ang Basahon ni Mormon makatabang kanato nga mas mapaduol ngadto sa Dios. …
Sobra sa napulo ka tuig ang milabay mihimo ako sa mosunod nga mga pahayag kabahin sa Basahon ni Mormon:
“Ang mahangturon ba nga mga sangputanan nag-agad sa atong pagsanong niini nga basahon? Oo, alang man sa atong panalangin o sa atong kaalautan.
“Ang matag Santos sa Ulahing mga Adlaw kinahanglang magtuon niini nga basahon isip usa ka buluhaton sa tibuok kinabuhi. Kay kondili iyang gibutang ang iyang kalag sa kakuyaw ug nagsalikway niadtong makahatag og espiritwal ug intelektwal nga panaghiusa sa iyang tibuok kinabuhi. Adunay kalainan tali sa usa ka kinabig kinsa natukod sa bato ni Kristo pinaagi sa Basahon ni Mormon ug nanggunit pag-ayo sa gunitanan nga puthaw, ug sa tawo nga wala.”
… Dili kita magpabilin ubos sa panghimaraut … pinaagi sa wala paghatag og gibug-aton niining talagsaon ug kahibulongang gasa nga gihatag sa Ginoo ngari kanato. Hinoon, atong kab-uton ang mga saad nga nalakip sa pagbahandi niini sa atong mga kasingkasing.