Unsay Atong Buhaton sulod sa Templo?

Ang templo sagrado nga dapit diin kita makapaduol sa atong Amahan sa Langit ug ni Jesukristo. Sa templo, gitudloan kita og importanting mga kamatuoran, moapil og mga ordinansa sa priesthood (sagradong mga seremonya), ug mohimo og mga pakigsaad (sagradong mga pakigsaad) sa Dios aron maandam kita sa pagbalik sa Iyang presensya.

Makadawat kita og mga ordinansa sa templo alang sa atong kaugalingon ingon man para sa atong mga katigulangan. Sama pananglit, ang mga batan-on makaapil sa mga bunyag para sa ilang mga katigulangan ug sa uban kinsa wala mahatagi og kahigayunan nga mabunyagan pinaagi sa tukmang awtoridad sa buhi pa sila. Para sa mga hingkud na, ang ubang mga ordinansa sa templo maglakip sa endowment ug mga pag-seal [pagbugkos] (sama sa kasal sa templo).

Bunyag ug Pagkumpirma alang sa Atong mga Katigulangan

Ang bunyag ug pagkumpirma mga mahinungdanon para sa kaluwasan sa matag responsable nga tawo nga nakapuyo dinhi sa yuta (tan-awa sa Juan 3:5). Bisan pa, daghang tawo ang namatay nga wala mahatagi sa oportunidad nga makadungog sa ebanghelyo o makadawat niini nga mga ordinansa. Pinaagi sa grasya ug kalooy ni Jesukristo, usa ka paagi ang giandam alang sa tanan aron madawat kini nga mga panalangin. Sa mga templo, ang mga miyembro sa Simbahan nga takus makapahigayon og mga bunyag para sa mga tawo nga patay na. Sa kalibutan sa mga espiritu, gisangyaw ang ebanghelyo (tan-awa sa D&P 138), ug kadtong nakadungog niini makapili sa pagdawat niini ug sa mga ordinansa nga gipahigayon para kanila.

Pagtuga [Endowment]

Ang pulong nga endowment nagpasabut nga “gasa.” Ang endowment sa templo usa ka gasa gikan sa Dios diin naghatag Siya og espesyal nga mga panalangin diha kanimo, lakip na ang “gahum gikan sa kahitas-an” (D&P 95:8).

Dihang nagpasakop ka sa Simbahan, nakadawat ka og duha ka ordinansa—bunyag ug pagkumpirma. Ang endowment sa templo madawat usab sa duha ka bahin. Una, madawat nimo ang ordinansa sa initiatory, diin sa simbolikanhon ug ligdong nga paagi “gihugasan” nga limpyo ug makadawat sa espesyal nga mga panalangin kabahin sa imong balaanong panulundon ug mahangturong potensyal. Sa ikaduha nga bahin, madawat nimo ang uban pa sa imong endowment samtang magkat-on ka pa og dugang mahitungod sa plano sa kaluwasan, lakip ang Paglalang, atong katuyoan sa yuta, ug ang misyon ug Pag-ula ni Jesukristo.

Atol sa endowment, mohimo kita og ligdong nga mga panaad sa pagsunod sa Dios, pagsunod ni Jesukristo, pagkalimpyo sa moral, ug pagtabang nga matukod ang gingharian sa Dios. Kon tumanon nato ang mga pakigsaad, gihatag kanato ang saad nga madawat ang tanan nga mahangturong mga panalangin sa Dios.

Mga Pag-seal [Pagbugkos]

Ang mga pamilya mao ang sentro sa plano sa Dios alang sa atong kalipay. Ang paghiusa sa mga pamilya alang sa kahangturan mao ang pinakamahinungdanong panalangin sulod sa templo pinaagi sa awtoridad sa priesthood sa pag-seal—mao gihapon kana nga awtoridad ang gisulti ni Jesus sa Iyang mga Apostoles (tan-awa sa Mateo 16:19). Ang mga pag-seal sulod sa templo maghimo nga ang mga bana ug asawa ug mga anak ug mga ginikanan magkauban sa hangtud pinaagi sa ilang kamatinud-anon sa ilang mga pakigsaad.