Usa ka Sanglitanan sa mga Kasubo atol sa IGPAPAHULAY
Ang tagsulat nagpuyo sa Utah, USA.
Nahibalo ko nga kinahanglan kong mohigugma sa adlawng Igpapahulay, apan wala ko kahibalo kon unsaon.
Paghulagway sa litrato pinaagi ni David Stoker
Nag-ingon ang mga kasulatan nga ang adlawng Igpapahulay balaan nga adlaw, malipayon ug ikahimuot nga adlaw, adlaw sa pagpahulay, adlaw sa pagsaulog.1 Apan pipila ka tuig ang milabay, sa ulahing bahin sa akong pagkatin-edyer, miserable ang akong mga Dominggo. Imbis kalinaw, akong gibati ang kaluya. Imbis kalipay, kasubo. Imbis paglaum, pagbati nga sad-an. Kusog ang akong pagbati sa mga kasubo atol sa Igpapahulay.
Matag Dominggo sa buntag, human sa makaulaw nga pagtago sa ilawom sa akong habol, sa katapusan akong angkunon nga Dominggo kadto ug nag-ilis na para mosimba. Sa simbahan, akong gihunahuna ang miaging semana. Atol sa sakrament, akong giihap ang tanan nakong kapakyasan, nga wala matiwas sa wala pa mobarug ang unang mamumulong. Ang nahibiling panahon sa pagsimba usa ka panglimbasog sa pagpugong sa mga luha nga mosamot pa tungod sa mga bag-ong pagmahay kay wala mobati og kalipay sa pagsimba.
Sa pagkahapon mao ra gyud gihapon. Mibati ko nga sad-an mahitungod sa nanganging mga pagpili, kaluya bahin sa umaabut nga mga pagpili, ug kasubo bahin sa kasamtangang mga kahimtang. Kon wala ang eskwela ug ubang mga ekstra nga kalihokan sa eskwelahan nga naglingaw kanako, kanunay unta kong naghunahuna og negatibong mga butang.
Human makapaminaw, magbasa, ug dayon mabasa og balik ang pakigpulong ni Presidente Russell M. Nelson sa Oktubre 2015 nga kinatibuk-ang komperensya kon unsaon sa paghimong kahimut-an ang Igpapahulay, nag-ampo ko og kalinaw ug gugma alang sa Igpapahulay kay sa kasubo nga kasamtangan nakong gibati.2 Ug miabut ang tubag.
Mag-focus sa Langitnong Amahan ug ni Jesukristo
Akong gibati nga usabon ang akong focus gikan sa akong mga kasubo ngadto sa akong relasyon sa Langitnong Amahan ug sa Manluluwas. Kay sa mamalandong sa akong mga kapakyasan, akong gigahin ang panahon sa pagpamalandong sa Ilang pagpanginlabut sa akong kinabuhi.
Kon mosulod ang negatibong mga hunahuna, akong sublion sa akong kaugalingon unsay akong nahibaloan mahitungod sa Dios ug ni Jesukristo: Ako anak sa Dios. Gipangga ko Niya. Si Jesukristo akong Igsoon, ug Siya nag-antus alang kanako. Gusto silang malipay ko ug mobalik Kanila. Ang Igpapahulay gasa gikan sa Dios.
Nagsugod ko sa paggamit og pagtuo niini nga pagpamatuod.
Mahinamong Modawat sa Sakrament
Ang pag-usab sa akong focus nagdala usab sa akong paghunahuna kon giunsa nako sa pag-atubang ang sakrament. Sulod sa taas nga panahon gitratar nako ang sakrament isip panahon sa pagsilot sa akong kaugalingon. Apan dili kana maoy katuyoan. Ang sakrament sagrado nga ordinansa sa pagbag-o sa atong mga pakigsaad. Kahigayunan kini nga malimpyo kita pag-usab pinaagi sa makatubos nga gahum ni Jesukristo. Pinaagi sa pag-focus sa ordinansa ug sa pakigsaad uban sa pagtuo og mahinulsulong kasingkasing, akong nahibaloan nga ang sakrament nagtanyag og kalinaw samtang gidawat nako ang gasa sa pagpasaylo, gituman ang akong mga pakigsaad, ug gidawat ang Espiritu sa Ginoo (tan-awa sa D&P 20:77, 79).
Ang paghunahuna sa Pag-ula ni Kristo atol sa sakrament nagdala og laing gasa sa akong panghunahuna. Dili lang kay mapasaylo ko, apan madawat usab nako ang pagkaayo tungod kay gidala sa Manluluwas sa Iyang Kaugalingon ang akong kasakit ug mga kahuyang (tan-awa sa Alma 7:11–12). Pinaagi sa Iyang Pag-ula ug sa sakrament, akong nakaplagan ang kalinaw ug kalig-on atol sa Igpapahulay—o sa bisan unsa nga adlaw—kay sa kaluya ug kasubo.
Ug nakaplagan ko kana nga kalinaw. Anaa ang Manluluwas alang kanako sa adlawng Dominggo ug sa kanunay!
Bansayon ang Mapailubon nga Pagtuo
Dili kini usa ka semana ra nga pagtul-id. Usa kini ka panglimbasog, ug midangat kini og panahon. “Apan kon magalaum kita alang sa butang nga dili makita, nan, magapaabut kita niini uban sa pailub.” (Mga Taga-Roma 8:25). Padayon kong naningkamot sa akong focus ug nag-ampo aron bation ang gugma sa Igpapahulay.
Sa paglabay sa panahon, nakaplagan ra gyud nako ang kalinaw ug kahimuot nianang balaan nga adlaw, apan dili ko mohunong basin madakin-as ko ug mobalik sa pagkaluya atol sa Igpapahulay. Ang matag semana nagkinahanglan og makugihong pag-focus sa Manluluwas ug sa katuyoan sa Igpapahulay, apan nahibalo ko nga ang saad sa kalinaw ug kalipay tinuod.