Mga Hulagway sa Hugot nga Pagtuo
Victor Barbinyagra
Kharkiv, Ukraine
Si Victor natawo nga kulang pa og tulo ka bulan. Agig resulta, duna siyay daghang kakulian sa panglawas ug dili makalakaw hangtud siyete anyos na siya. Bisan sa mga hagit nga iyang giatubang, gipili ni Victor ang pagkamalipayon nga tawo. Gikalipay niya ang pagtabang ug pagpakita og gugma sa uban.
Leslie Nilsson, litratista
Natawo ko nga kulang pa ko og tulo ka bulan nga miingon ang mga Doktor nga posibling wala gyud koy mahimo bisan unsa, apan ang akong mama kanunay nga mangita og lahi-lahing pamaagi sa pagtabang nako. Sulod sa mga katuigan, nakadawat ko og lahi-lahi nga mga tambal, apan dili gihapon ko makalakaw.
Sa katapusan, nakakita og tambal ang akong mama nga pweding makatabang nga makasugod ko og lakaw. Mihukom siya sa wala pa niya kini sugdi nga mohangyo nga panalanginan ko sa mga misyonaryo. Human nako nadawat ang panalangin, nangadto mi sa doktor. Ang tambal usa lang ka lahi nga matang sa pag-exercise. Sa kadugayan, human mahimo kadto nga mga pag-exercise, nakasugod ko og lakaw.
Usahay masagmuyo ko sa akong mga kakulian, apan gipaningkamutan nako nga dili kini ipakita. Sa kasagaran tawo ako nga malipayon, ug dili lang nako ipakita ang akong mga kasagmuyo ngadto sa uban.
Sa nag-tin-edyer na ko, hinoon, dunay panahon nga naluya ko.
Dili ko ganahang mosimba. Nangutana ako sa Dios. “Nganong ingon ani man ko? Nganong dili man nimo mahimo ang paghimo nakong mas maayo? Nganong dili man maayo ang akong mga pakigrelasyon sa uban?” Nakawagtang sa akong kadasig kini nga mga pangutana ug naguol kaayo ko, ug di ko kahibalo unsaon nga mausab ang akong kahimtang, mao nga naghunahuna ko nga siguro ang pagtapos sa akong kinabuhi maoy tubag.
Apan nahunahunaan nako ang akong mama ug unsa kahay iyang reaksyon. Naghunahuna ko nga tingali masubo siya ug mobati nga nakabuhat siya og sayop o dili igo ang iyang gihimo sa pagtabang nako. Mao to nga mihukom ko nga padayon kong magpakabuhi ug magpadayon.
Sa katapusan, akong gibati nga malipayon kaayo ko nga tawo.
Duna koy mga problema, sama sa uban. Dili kini dagko o gagmay, ug bisan dili nato kini masulbad sento porsento, nahibalo kong maatubang ra nato ang atong mga problema ug siguradong makapadayon ra kita.
Nasayud kong dunay plano ang Dios alang sa matag tawo niining kinabuhia bisan si kinsa sila.
Sultihan ko kanunay ni mama nga ang pinaka-gwapo nga tawo pweding maoy pinakadili malipayon, ug ang ngil-ad og dagway nga tawo maoy tinuod nga malipayon.
Tungod sa Simbahan, nasayud kong magmalipayon kamo bisan unsa pa, tungod kay ang plano sa Dios mao ang plano sa kalipay. Mituo ko nga ang kalipay usa ka butang nga naa sa sulod kanato, dili sa gawas.
Ang kalipay naggikan sa pagbaton og pagtuo, pagsalig sa Dios, ug pagsunod sa ebanghelyo. Nagtabang kini aron makabaton kita og tarung nga kinaiya ug magamit unsay anaa kanato para mas momaayo kita.
Alang sa matag tawo, kanunay nga dunay butang nga mas maayo sa umaabut, ug kon duna may dili maayo, maatubang ra nimo kini.
Naningkamot ko sa paghigugma sa tanang katawhan kay ang pinakaimportanting butang sa kinabuhi mao ang atong koneksyon sa ubang tawo. Naningkamot ko sa paghigugma sa akong pamilya tungod kay ang pamilya maoy atong umaabut, mao kini tanan kanato. Nagpasalamat ko sa Dios sa tanan nga ania nako.
Sa tanan nga nanglimbasog, moingon ko: Tinguhaa ang pagdawat sa inyong kaugalingon kon unsa man kamo karon, bisan sa tanan ninyong mga kakulian, ug tuohi nga mahimo kamong mas maayo.
“Nasayud ko nga magmalipayon ka bisan unsay mahitabo,” miingon si Victor Barbinyagra, “tungod kay ang plano sa Dios usa ka plano sa kalipay.” Kini nga mga kamatuoran miabut kang Victor pinaagi sa mga kasulatan.
Ang mga kasulatan naghatag sa gikinahanglan nga giya sa kinabuhi ni Victor. Miingon siya: “Nasayud kong nag-andam og paagi ang Dios alang sa matag tawo niining kinabuhia bisan si kinsa pa sila.”
Kon maghisgot bahin sa mga pamilya, miingon si Victor, “Mao kini ang tanan kanato.” Nagpuyo siya kauban sa iyang lola, si Tamara Kovalyova.
Bisan sa mga hagit nga iyang giatubang, nakaplagan ni Victor ang kalipay sa pagtabang ug pagpakita og gugma sa uban. “Naningkamot ko sa paghigugma sa tanang katawhan kay ang pinakaimportanting butang sa kinabuhi mao ang atong koneksyon sa ubang tawo,” miingon siya.
Gibisitahan ni Victor ang iyang higala, si Anton Mikhailovskiy, kinsa nagserbisyo isip branch president sa Kharkiv.