Pagtubag sa Lisud nga mga Pangutana: 3 Ka Baruganan nga Makatabang

Ania ang paagi unsaon sa pagpangita og mga tubag nga makalig-on sa imong pagtuo.

May pangutana ka ba mahitungod sa ebanghelyo o sa Simbahan? Nabalaka ka ba nga ang imong pagpangutana nagpasabut nga wala kay igong pagtuo o ang imong pagpamatuod dili kaayo lig-on?

Normal lamang ang mga pagpangutana ug kinahanglanon kini nga bahin sa imong panaw sa mortalidad. Modala kini kanimo sa mas dakong panabut ug pagtuo. Hinoon, ang imong kinaiya, kadasig ug proseso sa pagpangita og mga tubag makaapekto sa resulta.

Sa seminary makat-unan nimo kining tulo ka baruganan sa doktrinal mastery nga makatabang sa paggiya kanimo ngadto sa mahangturong mga kamatuoran.

Lihukon inubanan sa Pagtuo

Kon ikaw may mga pangutana, pwede kang molihok inubanan sa pagtuo pinaagi sa pagpili sa pagsalig sa Dios ug pagduol Kaniya og una alang sa mga tubag. Motubag ang Dios “pagtulun-an human sa usa ka pagtulun-an, lagda human sa usa ka lagda” (2 Nephi 28:30). Importante nga sa mga panahon sa pagduha-duha mosalig ka sa pagpamatuod nga naa na nimong daan.

“Duhaduhai una ang [imong] pagduhaduha sa dili [ka pa] magduhaduha sa [imong] pagtuo.”¹ —Elder Dieter F. Uchtdorf

“Panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo.”² —Elder Jeffrey R. Holland
Susihon ang mga Konsepto ug mga Pangutana Inubanan sa Panglantaw sa Ebanghelyo

Kon ikonsiderar nimo ang mga pangutana diha sa kinatibuk-ang kahulugan sa plano sa kaluwasan ug sa mga pagtulun-an sa Manluluwas, masugdan nimo ang pagkakita sa mga butang sama sa pagkakita sa Dios niini. Makatabang kini nga imong masusi og balik ang imong mga pangutana gamit ang sumbanan sa Dios bahin sa kamatuoran kay sa kalibutan.

“Ang pagkaangkon og lig-ong koneksyon sa mahangturong kamatuoran … makahatag kanato og kalinaw nga maggikan sa pagtuo kang Jesukristo ug sa kahibalo nga anaa kita sa dalan padulong sa kinabuhing dayon.”³ —Presidente Dallin H. Oaks

“Kon madiskubrihan ninyo ang bisan unsang butang nga ingon og misalipod sa kahayag ug hingpit nga kalipay sa ebanghelyo sa inyong kinabuhi, dapiton ko kamo sa pagbutang niini diha sa panglantaw sa ebanghelyo. Tan-aw sa mga lente sa ebanghelyo ug pagbantay nga dili motugot sa walay hinungdan ug walay katarungan nga mga butang sa kinabuhi nga mosalipod sa inyong mahangturon nga talan-awon sa talagsaong plano sa kalipay.”⁴ —Elder Gary E. Stevenson
Tinguhaon ang Dugang nga Panabut pinaagi sa Balaanong Gitudlo nga mga Tinubdan

Gihatagan kamo sa Dios og daghang magamit nga tinubdan samtang mangita kamo sa kamatuoran. Naglakip kini sa Espiritu Santo, sa mga kasulatan, inyong pamilya, mga lider sa Simbahan, bisan sa mga kapanguhaan gawas sa Simbahan nga makalig-on sa inyong pagtuo kang Jesukristo. Kon mangita og mga tubag, siguroa nga inyong mailhan ang tali sa dili kasaligang mga tinubdan ug sa kasaligang mga tinubdan, nga makalig-on sa inyong pagtuo ug makadapit sa Espiritu Santo sa inyong kinabuhi.

“Daghang benipisyo … maggikan sa inyong paningkamot sa pagpadako, pagpalapad, ug pagdugang sa imong panabut sa kamatuoran. Gamita ang mga kasulatan ug ang mga pamahayag sa mga propeta sa pagpalapad sa inyong kahibalo.”⁵ —Elder Richard G. Scott (1928–2015)

“Padayon kitang magtinguha sa kamatuoran gikan sa tanang maayo nga mga basahon ug ubang maayo nga mga tinubdan. ‘Kon adunay mga butang nga mahiyason, matahum, o maayo og dungog o dalaygon, kami naninguha sa pagpangita niining mga butanga’ [Mga Artikulo sa Hugot nga Pagtuo 1:13].”⁶ —Elder Dieter F. Uchtdorf

Sulayi kini sa imong kaugalingon!

Ang mosunod nga mga ehemplo nagpakita kon unsaon kini sa paghimo. Hinumdumi nga dili kini kompletong mga tubag, mga pananglitan lamang kon sa unsang paagi ang usa ka batan-ong lalaki o babaye mosulay og tubag niining mga pangutanaha sa ilang kaugalingon. Gusto kang mopadayon sa pagtuon ug pag-ampo mahitungod sa mga hilisgutan diin ikaw may mga pangutana mahitungod sa pagpangita og mga tubag ug paglig-on sa imong pagpamatuod.

Ngano nga ang mahigugmaong Langitnong Amahan motugot nga mahitabo ang dautang mga butang?

Lihukon inubanan sa pagtuo: Mibati ko sa gugma sa Dios alang kanako ug nahibalo nga anaa Siya, bisan og wala ko kasabut nganong itugot sa Dios nga mahitabo ang dautang mga butang.

Susihon ang mga konsepto ug mga pangutana gikan sa usa ka panglantaw sa ebanghelyo: Ang kabubut-on usa ka importanting bahin sa plano sa kaluwasan. Gipadala kita sa Dios dinhi sa yuta aron masinati ang mga pagsulay, makahimo og mga desisyon, ug makadawat og pisikal nga lawas. Apan ang pagtugot nga makahimo og mga desisyon ang mga tawo nagpasabut nga usahay ang mga tawo makahimo og sayop nga mga pagpili ug makaapekto sa kinabuhi sa ubang tawo. Ug ang mga pagsulay nga dili resulta sa sayop nga mga pagpili—sama sa natural nga mga katalagman, pagkabaldado, ug kamatayon—makahatag og mga oportunidad aron kita malig-on sa atong mga pagpamatuod ug pagsalig sa Dios.

Tinguhaon ang dugang nga panabut pinaagi sa balaanong gipili nga mga tinubdan: Unsa ang gisulti sa mga kasulatan ug sa modernong mga propeta mahitungod sa kon nganong moagi kita og lisud nga mga butang? “Ang imong kalisdanan ug ang imong mga kasakitan sulod lamang sa mubo nga higayon; ug unya, kon ikaw molahutay pag-ayo, ang Dios mobayaw kanimo sa kahitas-an” (D&P 121:7–8). Si Elder Jeffrey R. Holland sa Korum sa Napulog Duha Ka mga Apostoles miingon, “Ang Dios dili mobiya kanato nga nag-inusara, dili mobiya kanato nga walay tabang sa mga hagit nga atong giatubang.”⁷ Wala ko masayud sa mga rason sa tanan nakong mga pagsulay, apan mituo ko nga gihimo ni Jesukristo ang Pag-ula alang kanako ug sa tanan. Makaduol ako Kaniya ug sa Langitnong Amahan alang sa kalinaw, kalig-on, ug suporta atol sa akong mga pagsulay (tan-awa sa Alma 7:11–12).

Unsaon nako sa pagkahibalo nga ang Espiritu Santo nakig-istorya diay kanako?

Lihukon inubanan sa pagtuo: Bisan usahay lisud kanako ang pagkahibalo nga nakadawat ko og inspirasyon, nasayud ko nga pinaagi sa pagpaminaw sa mga pagpamatuod sa uban ug pagbasa sa mga kasulatan nga ang Espiritu motabang nako sa pagsabut kon padayon kong maningkamot sa pagpaminaw sa Iyang tambag.

Susihon ang mga konsepto ug mga pangutana gikan sa usa ka panglantaw sa ebanghelyo: Gihatagan kita sa Dios og gasa sa Espiritu Santo aron makadawat kita og inspirasyon sa paghimo unsay eksakto. Kon nakadawat ko og pag-aghat sa paghimo og maayo, akong mahibaloan nga gikan kini sa Espiritu, bisan og daw kaugalingon ra nako kining hunahuna.

Tinguhaon ang dugang nga panabut pinaagi sa balaanong gipili nga mga tinubdan: Ang mga kasulatan nagtudlo nga, “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (D&P 112:10). Si Elder David A. Bednar sa Korum sa Napulog Duha ka mga Apostoles mitudlo nga “ang sinsero nga tinguha ug pagkatakus nagdapit sa espiritu sa pagpadayag nganhi sa atong mga kinabuhi.”⁸ Kon naningkamot ko sa pagpaubos ug paghimo sa akong pinakamaayo aron mahimong takus sa Espiritu, tabangan ako sa Ginoo nga magiyahan sa mga tubag. Iya kong tabangan kon sa unsang paagi mamulong ang Espiritu kanako sa piho nga paagi.

Panapos

Ang mga pagpangutana dili usa ka timailhan sa kakulang sa pagtuo; sa kasagaran usa kini ka indikasyon sa nagtubo nga pagpamatuod. Kon molihok ka inubanan sa pagtuo, mosusi sa konsepto ug mga pangutana uban sa panglantaw sa ebanghelyo, ug magtinguha og dugang nga panabut pinaagi sa balaanong gitudlo o gipili nga mga tinubdan, makaplagan nimo ang mapuslanong mga tubag sa imong mga pangutana ug mas hugot nga pagtuo kang Jesukristo.