Dijitol Nomo
14 Wei blong Karem Helt long Saed blong Filing I Kambak long Stret Rod
Hem we i raet, i stap long Aedaho, YSA.
Taem yu filim se yu taed, we filing blong yu i nomo save tekem moa, i gat samfala wei we yu no save mestem blong filim 100 pesen gud bakegen.
Samtaem, laef i save kakae yu long saed blong ol filing, be taem yu save dipen yuwan long saed blong kontrolem ol filing blong yu, bae yu save lukluk long yuwan long saed blong ol filing blong yu, mo yu save tekem ol gud taem mo nogud taem we i save kamaot evri dei. Hemia i no minim se bae yumi neva nidim help. Be, blong stap dipen long yuwan long saed blong spirit, i blong save wetaem yu save handelem ol hevi samting long filing blong yu, yuwan, mo bae yu save wetaem yu nidim help, blong yu save go askem help mo kasem sapot long ol narawan.
Taem yu stap kam blong filim mo handelem ol filing blong yu long wan helti wei, yumi karem moa paoa, mo yumi kam fri blong save wok insaed long kingdom blong God. Sam long ol aedia ia, oli save help taem yu stap lukaot blong yu kam blong dipen moa long yuwan long saed blong kontrolem ol filing blong yu.*
-
Mekem ol besik samting: prea, stadi long skripja, go long jos, mo givim seves. Lukluk nomo blong talem tangkyu.
-
Tekem gud kea long bodi blong yuwan. Meksua se yu stap kakae gud, slip inaf, mo muvmuvum bodi olsem mekem eksasaes. Helt blong bodi blong yumi, i stap lidim helt blong yumi long saed blong filing.
-
Raet long wan jenol blong yu. Wan pat blong stap dipen long yuwan long saed blong ol filing, hem i blong yu save lisin long ol filing blong yu. Blong stap raet long wan jenol, i wan gud wei blong gotru long ol filing blong yu.
-
Wetem ol fren mo famli blong yu, tokbaot ol filing blong yu long wan ones fasin. Toktok raon long ol filing blong yu wetem wan narawan we i helti, mo i save helpem yu blong kipim helt blong filing blong yu i balens gud i stap.
-
Prea blong kasem help, be i no blong narawan i stretem yu. Tingting blong jenisim ol sentens olsem: “Plis, Papa long Heven, balensem ol filing blong mi,” i go long ol sentens olsem: “Plis, Papa long Heven, soem mi wanem mi nidim blong lanem mo mekem miwan blong mi save skelem gud ol filing blong mi.”
-
Skelem hao yu balensem ol samting long laef. Jekem taem mo paoa blong bodi blong yu we yu givim i go long famli blong yu, yuwan, seves, wok, mo pleiplei. Taem wan ples i kakae taem mo paoa blong ol nara ples, yu stat blong lusum slip, paoa long bodi, mo tingting i go olbaot. Hemia i minim se i taem blong taem blong prestem stat baten bakegen mo taem blong stretem balens.
-
Yu no pusumbak taem. Blong stap lego samting i stap, i save lidim yu blong sik long saed blong tingting. Brebrekem ol bigfala wok i go long plante smol wok. Blong stat, talem long yuwan: “Wanem we mi mas mekem naoia hem i _____________” o, “Bae mi spendem sam minit nomo blong mekem hemia, afta mi spel smol sapos mi wantem.”
-
Traem gat wan pikja blong sakses. Blong stap wari, hem i wan wei blong stap praktisim blong yu no save winim samting long laef. Yu no traem blong tingting long maen blong yu long samting we bae i go rong, o blong yu stap wari oltaem long “?be olsem wanem sapos ___”; yu praktis blong gat gud tingting mo mekem sam plan blong ol samting ia oli kamtru. Sapos ol samting oli no wokaot olsem we yu stap hop from, traem pikjarem yu we yu lan aot long wanem i no wokaot, mo go fored.
-
Lukluk nomo long wanem yu mekem we i raet, mo no stap komperem yu long ol narawan. Ol pipol we oli gat tingting blong kasem ol bigfala samting, plante taem, oli lukluk tumas long wiknes blong olgeta, mo ol samting we oli mekem i rong. Be afta, oli no traem blong gohed mo kam antap, be oli stap filim se oli lusum hop. Mekem wan lis blong ol samting we oli impoten long yu, ol talen, ol eksperiens mo ol presen blong yu. Mekem wan plan long hao nao bae yu yusum ol gud samting ia long wan wei we bae i defren, we bae yu krietem wan samting, long wik ia.
-
Lego samting ia we yu no save kontrolem. Ol samting we oli pas finis, fridom blong joes blong ol narawan, weta, ol samting we yu no save mekem, fasin blong ol nara pipol, evri samting ia, yu no save kontrolem olgeta. Lukluk nomo long ol samting we yu save mekem wan samting wetem, olsem fasin blong yu, pat blong yu long wan rilesensip, ol joes we yu save mekem naoia, mo fasin blong yu blong fesem samting.
-
Akseptem se sam samting we i no intresting oli stap nomo. I no se evri samting long laef i gat bigfala mining o i gud we i gud tumas. No mekem ples i girap, no mekem samting i go tumas, o gat raorao blong mekem ples i laef. Be, yu stap kwaet mo glad mo laekem ol gud samting raon long yu, mo lukaotem sam wei blong yu kam antap mo givim seves.
-
Yu no nid blong filim se bae yu kros. Bae ol pipol oli wantem kros taem oli jusum blong luk ol narawan se oli stap (1) sakem nogud toktok mo mekem nogud aksen long yu, (2) taem oli no mekem samting i stret long man, o (3) taem oli no gat respek. Be yu no mekem hemia. Traem luk se bae yu save faenem wan nara eksplenesen we bae yu gat sore long aksen blong olgeta. Eksampol: maet oli taed, oli no save evri samting, oli no filim sef, o oli ting se oli stap help. Mekem joes ia blong no stat blong kros.
-
Holembak fasin blong stap blemem man o yuwan, o mekem man i sem, o mekem yuwan i sem. Be, faenemaot wanem nao problem, mo askem narawan blong help blong stretem, i nomata se rong i blong hu.
-
Lisin long Spirit, i no long nogud toktok. Sapos yu gat sam tingting we i stap daonem yu, stap jikim yu, mekem yu kros, talem nogud yu, stap komplen, i tokbaot yu, o i givim nogud nem long yu, ol tingting ia oli no kam long Lod. Sarem doa long olgeta. Singsing wan hym, talem wan skripja baehat, o talem wan prea blong invaetem Spirit i kambak.