Las Toktok
Sakramen mo Blong Stap Kam Moa Olsem Kraes
I Kam long Elda D. Todd Christofferson
Blong Kworom blong Olgeta Twelef Aposol
I kam long wan toktok blong jeneral konfrens blong Oktoba 2017.
Simbol blong sakramen blong Lod Sapa, i naes tumas blong tingting long hem. Bred mo wota oli ripresentem bodi mo blad blong Hem we i Bred blong Laef mo Wota we I Laef (luk long Jon 4:10), we i rimaenem strong long yumi long praes we Hem i bin pem blong pemaot yumi. Taem oli stap brekem bred, yumi tingbaot bodi blong Sevya we i bin karekil from yumi. Taem yumi stap dring long wota, yumi tingbaot blad blong Hem we i ron long Getsemane, mo antap long kros, mo paoa blong sakrifaes ia we i mekem yumi kam tabu (luk long Moses 6:60).
Be blong kakae bodi blong Hem mo dring blad blong hem, i gat moa mining, mo hem i blong tekem insaed long yumi, ol kwaliti mo fasin blong Kraes. … Taem yumi stap tekem mo kakae bred mo wota blong sakramen long evri wik, bae i gud blong yumi tingting se yumi mas tekem, fulwan mo evriwan, fasin blong Hem, mo paten blong laef blong Hem we i no gat sin, i kam insaed long laef mo bodi mo fasin blong yumiwan. Jisas, bae i no save pem praes from ol sin blong ol narawan, be sapos nomo, Hem, Hem i no gat sin. From se jastis i no save askem wan samting long Hem, Hem i save givim Hemwan long ples blong yumi blong stretem wanem jastis i askem, mo afta, givim sore ia long yumi. …
Blong tekem mo kakae bodi mo dring blad blong Hem, i minim blong karemaot long laef blong yumi, eni samting we i no go wetem fasin blong Kraes, mo blong mekem ol fasin blong Hem i kam fasin blong yumi. Hemia mining we i moa bigwan blong fasin blong sakem sin: i no blong tanem yumi longwe long ol sin blong bifo, be tu, blong “tanem hat mo tingting blong yumi i go long God,” mo yumi gogohed fored nomo (luk long Bible Dictionary, “Repentance”). God bambae i soem long yumi ol mistek mo ol samting we yumi no stap mekem, be tu, bambae Hem i helpem yumi blong tanem wiknes blong yumi i kam paoa blong yumi (luk long Ita 12:27). Sapos nomo yumi stap askem yumiwan bakegen: “?Wanem nao i stap we mi no mekem yet?” (Matiu 19:20) Bambae Hem i no lego yumi traem ges, be wetem lav, bambae Hem i ansa blong mekem se yumi stap hapi. Mo bambae Hem i givim hop long yumi.