Aes-Loli Misin Basket
Hem we i raet i bin go long wan misin long Filipin mo naoia i stap long Vijinia, YSA.
“Jisas i talem long hem se: ‘Ale, yu givim kakae long ol sipsip blong mi’” (Jon 21:17).
Jared i wokbaot i aot long jos i gobak long haos long wan dei blong hot san, wetem Mama mo Papa. Hem i stap tingting long Praemeri lesen blong hem. From se hem i no save harem gud samting, Jared i mas luklukgud ol pikja we tija blong hem i stap soem, mo ol toktok we hem i stap raetem long bod.
Long dei ia, oli bin lanem se Jisas i bin askem ol disaepol blong hem blong oli mas stap ol misinari. Jared i stap askem hemwan wanem hem i save mekem blong serem gospel, olsem we Jisas i askem. Hem i bin save se hem i no save go yet long wan misin. Nao hem i gat wan gudfala tingting. !Mebi bae hem i stat blong sevem mane blong go long misin!
Taem hem i kasem haos, Jared i ron i pasem Amba, sipsip blong hem, mo i go long haos. Hem i karem wan bigfala plastik kontena, mo katem wan hol antap long hem. Hem i raetem “Misin Basket” long saed blong hem. Afta, hem i go long rum blong hem, mo karem mane blong hem andanit long bed. Wan afta wan, hem i dropem wanwan koen i go. Be koen blong hem i no save kavremap daon long kontena ia nomo. ?Olsem wanem nao bae hem i winim mane?
Jared i tingting mo i tingting. Hem i lukluk i go aotsaed long windo, i luk san i saen gud. Ples i hot long Filipin. Jared mo ol fren blong hem oli kakae kokonat aes loli kolosap evri aftenun, afta long skul. “!Hemia nao!” hem i tingting. Bae hem i mekem aes loli, mo salem i go long ol narawan we oli wantem harem gud smol.
Jared i ron i go faenem Mama blong hem. “?Yu save soem long mi olsem wanem blong mekem aes loli?” Jared i mekem saen lanwis blong talem hemia. Oli stap yusum saen lanwis, wan lanwis we yu toktok wetem han nomo. Mama i smael mo i talem yes.
Long nekis dei, Jared mo Mama oli wokbaot i go long bigfala maket, oli pem ol samting. Taem oli kasem haos, Jared i tekemaot wan bigfala bol mo i miksim melek blong kokonas, melek long tin, vanila, mo kokonas we oli skrasem. Mama mo Jared i yusum wan fanel blong kapsaet miks ia i go long smol bag. Oli putum ol smol plastik ia i go long aes bokis. “!Gudfala wok!” Mama i talem long saen lanwis.
Aes loli ia i tekem taem blong i strong. Be long nekis dei, afta long skul, !hem i rere! Jared i klaem long wan jea, mo tekemaot waet eski antap long aes bokis. Hem i putum sam tawel i go daon, insaed long eski, mo i putum aes loli antap long hem. Hem i no save wet blong go salem.
Jared i ron i go aotsaed long ol rod fulap long das. Ol fren blong hem oli stap plei wetem ol kaet blong olgeta mo sakem savat blong olgeta long wan tin blong mekem tin i kapsaet.
Long saed blong rod, hem i setemap wan tebol wetem bigfala saen we i talem “Aes Loli, 5 pesos.” Fren blong hem, Jonel i ron i kam, i poenem eski. Hem i givim 5 pesos long Jared mo Jared i givim aes loli long hem. Tufala i haefaef.
I no longtaem afta, sam moa fren blong Jared oli kam blong pem aes loli tu. Sam aoa afta, taem Mama i singaotem Jared blong kakae, smol aes loli nomo i stap.
Jared i pikimap eski we kolosap i emti mo ol koen blong hem. Long wan poket blong hem, hem i putum sam koen blong taeting blong hem. Nara haf blong koen, hem i putum i go long nara poket. Hem i no save wet blong luk misin basket blong hem i fulap.
Long haos, hem i putum ol misin basket koen blong hem i go long kontena. !Be i gat fulap spes i stap yet! Be Jared i fil gud insaed taem hem i stap tingting blong go long wan misin sam dei. Hem i disaed se bae hem i salem aes loli evri dei kasem taem kontena i fulap gud. Hem i filim gud blong winim mane blong hem i save kam olsem wan misinari olsem we Jisas i askem hem blong mekem.