Ol Testemoni Plant
?Hem i minim wanem stret blong gat wan testemoni?
Elisa i wokbaot i go insaed long Praemeri mo i sidaon long saed blong fren blong hem Armando.
“!Welkam!” Sista Russo i talem. “Bae yumi stat wetem wan singsing.”
Elisa i singsing wetem klas blong hem. “Fet i olsem wan smol sid: mi planem mo i gro.” (Liahona, pej F7).
Sista Russo i pasem pepa mo kala pensel. Hem i talem: “Tingting long wanem yu jes singsing long hem.” “Taem yu planem wan sid blong fet, bae i gro i kam wan testemoni. Naoia, droem testemoni blong yu, se bae hem i luk olsem wanem sapos hem i wan plant.”
Elisa i lukluk long pepa blong hem, i waet pej i stap. Evriwan i stat blong dro. Elisa i sakem ae i go long droing blong Armando. Plant o flaoa blong hem, i gat wan stret stik, wetem plante lif. I luk olsem wan spaes we i stap gro long vranda blong haos blong hem. !Ating testemoni blong hem i olsem ia nao! Hem i hang long wan kala pensel mo i droem wan olsem.
“Plis openem skripja blong yufala long Alma 32,” Sista Russo i talem.
Oli ridim abaot fasin blong planem wan sid insaed long hat mo filim plant ia i stap gro. Elisa i lukluk long testemoni plant blong hem. Hemi gat wan testemoni o nogat? ?Hemia i minim wanem? Hem i wantem blong askem be i filim se hem i sem tumas.
Taem klas i finis, Sista Russo i kam luk Elisa.
“I luk olsem wan samting i rong wetem yu. ?Wan samting i rong?” Sista Russo i askem.
Elisa i lukluk long droing blong hem bakegen. “Mi no save stret se mi gat wan testemoni o no. Mi no save stret wanem mining blong toktok ia.”
Sista Russo i smael bigwan long Elisa. “Hem i oraet. Yu yu tingbaot se fet i wanem?”
Elisa i sakem hed blong agri. “?Hem i blong stap biliv long wan samting we yumi no save luk?”
“Yes. !Hemia nao!” Sista Russo i talem. ?Wanem nao sam samting we yu stap bilivim?
Hemia i wan isi kwestin. “Mi biliv long Papa long Heven mo Jisas Kraes. Mi save se Tufala i lavem mi.”
Sista Russo i smael. “!Yu jes serem testemoni blong yu! Wan testemoni i wanem yu stap biliv abaot gospel.”
Elisa i tingting smol long hemia. “So, ?mi mi gat wan testemoni finis?”
“!Yes!” Sista Russo i holem ol skripja blong hem antap. “Mo, ?tingbaot wanem yumi ridim tedei? Yu fidim sid blong yu taem yu stap mekem ol samting, olsem blong kam long jos. Afta, testemoni blong yu bae i kam strong moa.”
Elisa i filim se, naoia, hem i andastanem. “So, ?hemia nao yumi stap droem testemoni blong yumi olsem ol plant?”
“Hemia nao. From se ol plant oli gro sloslo,” Sista Russo i talem. “Ol testemoni, oli semmak. Oli no gro i kam bigwan evriwan wantaem. Oli gro sloslo long wan taem.
Elisa i filim gud abaot plant ia we hem i bin droem. Taem hem i kasem haos, hem i raetem “Testemoni Plant blong Mi” long saed blong droing blong hem. Hem i hangem antap long saed blong bed blong hem. Hem i bin save se testemoni blong hem, i stap gro finis. Mo !hem i bin wantem blong gohed blong folem Jisas blong i save gro i kam bigwan moa!