Ol Simbol insaed long Niu Testeman

I kamaot long toktok blong Russell M. Nelson, “In This Holy Land,” Tambuli, Feb. 1991, 13, 17, 18.

Antap long ol tijing ia, yumi save faenem mining insaed long ol samting, kalja, histri mo ol ples insaed long Niu Testeman.

Wota: “Jodan Reva i ples ia we Jisas i bin jusum blong Hem i baptaes long hem; Jon i bin baptaesem Hem blong ‘mekem olgeta samting we God i wantem, oli kamtru’ [Matiu 3:15]. ?Hem i gat bigfala mining o no, we tabu odinens ia, oli bin mekem long wan ples blong wota we i stap moa daon evriwan long evri ples blong wota long planet ia? ?Bae Hem i save jusum wan moa gud ples o no, blong stap olsem simbol blong ol bigfala dip samting we Hem i go insaed long hem, mo afta, i girap aot long hem?”

Ol Bigfala Hil: “I no isi blong klaem long ol bigfala hil. Long taem bifo, semmak olsem tedei, Lod i stap singaotem ol disaepol blong Hem blong klaem long ol bigfala hil blong tokbaot bigwan se rod blong stap wok had mo fasin blong stap obei, hem i wan rod we i nambawan. Bambae Hem i askem sem samting long yufala, long evri samting.”

Ol Olif: “Jisas i bin kam long stamba blong Hil blong Ol Olif Tri blong mekem fas pat blong Atonmen blong Hem. Atonmen ia, Hem i bin mekem long Garen blong Getsemane. Toktok ia, Getsemane, i kam long tu Hibru toktok: gath, we i minim ‘anda long hevi samting,’ mo shemen, we i minim ‘oel,’ we oli mekem speseli long olif frut.

“Longwe, oli mas brebrekem ol frut blong ol olif tri anda long wan bigfala hevi ston we oli katem olsem wil, blong skwisimaot o karemaot oel long olgeta. Semmak olsem Kraes long Garen blong Getsemane, we oli putum Hem anda long hevi wet blong ol sin blong wol. Hem i swet, mo ol bigfala drop blong blad—‘oel’ blong laef blong Hem—i kamkamaot long evri hol blong skin. (Luk long Luk 22:44; D&K 19:18.)”

Bun blong Hed: “Ples we oli hangem Hem long kros i tekem ples long wan hil we oli singaotem, Golgota (long lanwis Hibru) o Kalvari (Latin), we i minim ‘bun blong hed.’ Bun blong hed i simbol blong ded. Long wan ples olsem, sakrifaes ia we i pem praes from sin i bin kamtru evriwan. Antap long kros, Sevya blong wol, oli bin leftemap Hem i go antap i ova long ded, long evri bigfala mining blong hem—blong mekem i kamtru mo i ril, paoa ia blong Lod blong winim ded.”