Merikel Misin blong Profet Josef Smit

Jenuware 2019

Merikel Misin blong Profet Josef Smit

I Kam long Elda Dallin H. Oaks

Fas Kaonsela long Fas Presidensi

I kamaot long wan toktok, “Josef Smit: We i Profet, mo We i Man” we hem i bin givim long wan Misin Lidasip Semina long 25 Jun 2018.

Josef Smit i bin mekem moa bitim wanem we eni nara man long wol ia bae i save mekem long wan sot taem olsem. Wan wei nomo blong eksplenem hemia, hem i help we i kam long heven.

Mi jusum blong tokbaot Jisas Kraes, we i profet mo i man. Taem bae mi tokbaot hem, mi hop se bae mi helpem yu blong andastanem ol spesel mo merikel wok blong stamba profet blong dispensesen ia.

Rilesensip blong save mo testemoni blong Josef Smit long saed blong misinari wok, hem i impoten tumas. Yumi evriwan i save se samfala investigeta oli akseptem ol stamba doktrin blong gospel, be oli no save akseptem nomo tru samting ia, we hem i we wan boe blong 14 yia, i kasem visit blong Papa mo Pikinini, mo hem i bin transletem Buk blong Momon mo i kam profet ia we yumi save hem tedei. Olgeta we oli gat hadtaem wetem Profet Josef Smit oli nidim blong lanem samting aot long tijing ia blong Presiden Russel M. Nelson:

“Misin blong Josef long wol ia, God i odenem hem long misin ia. Maen blong hem we i open mo i klin, i rere blong kasem instraksen we i kam long Lod. Be, folem standet blong wol, Josef i no kaen man ia. Mo wok ia blong hem, blong hem i Profet blong las dispensesen ia, i luk se i no posibol nomo. Eksampol ia i soem wan prinsipol we i tru abaot wei we Lod i stap wok: Hem i yusum hem we man i no tingting long hem blong mekem wok ia we i no posibol!”¹

Hem i impoten tumas blong ol misinari blong yumi oli gat testemoni abaot tabu koling mo merikel wok blong Profet Josef Smit.

Mi mi wan 65 yia studen we i stadi long laef blong Josef Smit. Mi bon long 1932, taem Jos i jes kasem 100 yia. Mi biliv se mi wan fetful Lata-dei Sent blong seken senturi ia. Yumi no mitim Josef Smit, be yumi filim se yumi save hem, mo yumi lavem hem tru long wanem we hem i bin soemaot mo tijim. Yumi ol witnes blong trutok blong toktok we i bin kamaot se “ol milian man bambae oli save ‘Brata Josef.’”²

I. Josef Smit we I Profet

Yumi evriwan i save se Josef Smit, olsem fas profet blong dispensesen ia, i tul blong Lod long Restoresen blong Lod. ?Be wanem nao Lod i bin putumbak tru long profet blong hem? I no evri Lata-dei Sent (mo sam we oli no memba) we oli save ol niu laet ia mo plante moa samting we Lod i ademap mo i givim long Profet Josef tru long insperesen, blong mekem doktrin blong Ol Kristin pipol. Hemia i wan sot lis:

Huia i Papa, Pikinini mo Tabu Spirit.
Ol bigfala wok blong ol trifala memba ia blong Godhed mo rilesensip blong Tufala wetem ol pipol long wol ia.
Wanem nao hem i Foldaon blong man.
Stamba tingting blong laef long wol ia blong mekem plan we Papa i gat long ol pikinini blong Hem blong oli kasem fiuja ples ia we i no save finis.
Rol blong Atonmen blong Jisas Kraes blong mekem se man i nomo save ded, mo blong givim janis ia blong kasem laef we i no save finis.
Rol blong mared long laef ia mo long taem we i no save finis insaed long plan blong Papa.
Stamba rol blong prishud mo ol odinens insaed long plan blong Papa.
Ol stamba rol blong ol tempol mo ol proksi odinens insaed long plan blong Papa.
Save ia se God i wantem sevem evri pikinini blong Hem, mo we evriwan we i bin laef long wol ia—we i save Jisas Kraes o no—bae i save kasem hae ples olgeta long heven, afta.
Rilesensip blong ol trifala stamba blong trutok abaot man mo yunives: saens, skripja mo revelesen we i stap gohed blong hem.

Eniwan we i stap stadi wan smol pat blong lis ia—i nomata se hem i biliv o no biliv long Kraes—i mas luksave mo talem se, yes, Josef Smit i stanap long ol hedwota blong wan bigbigfala reva blong ol aedia blong Renlund we oli klia, oli niu mo rij tumas. Taem yumi stap ridim Prijim Gospel blong Mi gospel we i fulwan, God i bin putumbak long wol ia tru long Josef Smit.³

Yu luk gud se insaed long lis blong mi, mi no putum we Josef bae i tekembak Buk blong Momon, wan niu skripja, we i tru, i stamba blong plante long ol niu aedia ia blong relijin. Buk ia, yumi mas tokbaot gud. Taetol blong hem i talemaot bigfala stamba tingting blong hem: “Wan Nara Testeman blong Jisas Kraes.” Be afta long stamba rol ia blong hem, i gat plante moa samting i stap. Hemia wanem bes man blong stadi i bin talem abaot buk ia:

“Buk blong Momon i givim wan niu stamba tingting long Amerika: hem i kam wan niu ples blong stret mo gud fasin be i no wan paoa blong fridom. Sapos yu putum i fesem fasin blong kam rij mo no stap ikwol, Buk blong Momon i stap difendem olgeta we oli pua. … Taem i fesem ripablik gavman, hem i givim wan stret mo gud rul we i kam long ol jaj mo ol king we oli stap anda long loa blong God. Taem i fesem wan relijin we i akseptem Baebol nomo mo i no biliv long ol merikel, Buk blong Momon i stanap i stap blong gat ol revelesen, ol merikel, mo revelesen we i go long evri nesen. Taem i fesem fasin blong no biliv, hem i givim bilif; agensem fasin blong biliv long wan nesen, hem i givim wan Isrel we i blong ful wol. Hem i tokbaot finis disasta blong nesen sapos hem i lavem ol rij samting, i stanap agensem revelesen, mo fasin blong Ol Jentael i stap rul ova long stret mo gud fasin, revelesen mo Isrel.”⁴

Moa impoten long hemia, i jes wanem Presiden Nelson i jes talem abaot Buk blong Momon: hem i “tul ia, we tru long hem, kam tugeta blong Isrel bae i kam blong hapen.”⁵

Taem yumi stap rid insaed long Prijim Gospel blong Mi, Profet Josef Smit i talem se Buk blong Momon i “ki ston blong relijin blong yumi.”⁶

Plante long olgeta we oli no Lata-dei Sent, oli no save bigfala kontribusen blong Josef Smit long tingting blong relijin. Long wan gudfala stadi raon long kantri, wan man blong askem kwestin, Gary Lawrence i bin faenem se kolosap haf blong ol pipol we hem i bin stadi long olgeta, oli ting se ol Lata-dei Sent oli stap olgetawan mo oli defren smol, mo oli gat wan “strenj bilif.”⁷ Taem hem i bin stap askem ol man: “?Wanem nao stamba klem blong Ol Momon?” wan aot long seven nomo i save talem wan samting we i kolosap long aedia blong restoresen, o fasin blong putumbak Kristin bilif we i bin lus. Semmak, taem wan nara sevei blong kantri i bin askem ol man blong tokbaot wanem tingting blong olgeta long saed blong relijin blong yumi, i no gat wan i tokbaot aedia ia se hem i putumbak stret mo fas Fasin blong Ol Kristin Man.⁸

Olgeta samting ia i rimaenem yumi se yumi no mas letem ol misinari blong yumi nomo oli tekem save ia abaot bilif blong yumi. Olgeta we oli tijim olgeta, maet oli harem toktok ia, Momon, be i no stret blong ol misinari nomo oli gat stamba save ia abaot ol besik prinsipol blong bilif blong yumi.

II. Man ia, Josef Smit

Hemia sam tingting blong mi abaot gudfala laef blong Josef Smit.⁹ Josef Smit ia we mi faenem insaed long stadi blong miwan, we mi mekem plante long Ilinoa, YSA, i wan strong man—i yangfala, i gat filing, i smat, mo ol pipol blong hem oli lavem hem mo oli save kam go luk hem eni taem, mekem se plante taem, oli singaotem hem: “Brata Josef.” Yangfala laef blong hem i stamba blong seves blong hem olsem profet. Hem i gat 14 yia long taem blong Fas Visen, i gat 21 yia taem hem i kasem ol buk we oli wokem long gol, mo i jes 23 taem hem i finis blong transletem Buk blong Momon (we i no tekem moa long 60 dei blong wok blong flatem).

Ova haf blong ol revelesen long Doktrin mo Ol Kavenan, God i givim tru long profet ia taem hem i gat 25 yia o i yangfala moa. Hem i gat 26 yia taem oli oganaesem Fas Presidensi, mo hem i jes ova 33 yia taem hem i kamaot long kalabus long Misuri mo i gohed blong lidim Ol Sent. Hem i gat 38 yia mo haf nomo taem oli kilim hem i ded.

Long sot laef blong hem, Josef Smit i bin gat plante we plante hadtaem. Taem hem i gat samples seven yia, hem i safa wan bigfala operesen long leg, we i mekem hem i harem nogud bigwan. From se famli blong hem i pua, hem i skul smol, mo olsem wan yangfala, hem i mas wok blong longfala aoa blong help blong putum kaekae antap long famli tebol. Plante taem, oli kilim hem. Long medel blong taem we hem i stap traehad blong mekem ol responsabiliti blong hem from tabu koling blong hem, hem i mas wokhad olsem wan fama, o man blong salem samting, blong mekem se hem i save lukaot long famli blong hem. Hem i mekem hemia we hem i no gat ol presen blong spirit we i bin sapotem hem long taem blong koling blong hem olsem profet. Lod i bin talem long hem se “long saed blong ol wok blong wol ia, bambae yu no gat paoa, from we hem i no koling blong yu” (Doktrin mo Ol Kavenan 24:9).

Long saed blong ol samting long saed blong spirit, Josef Smit i gat fulap rol model (eksampol) i stap blong save lanem olsem wanem blong kam wan profet mo wan lida. Hem i mas dipen long ol fren we oli no gat eksperiens. Wetem olgeta, oli traehad mo oli bin lanem samting tugeta. Josef i kwik blong lanem samting mo kam smat long tingting blong hem. I tru nomo se hem i gat ol spesel presen. Olsem we bae yumi talem tedei: “hem i stadi kwik.” Hem i talem se ol mesenja blong heven oli tijim hem, mo tu ol nara revelesen we oli kam long God, mo mi mi bilivim hem.

Wan long ol bigfala presen blong hem, i kamtru tru long lav mo strong tingting blong hem long ol pipol we oli bin stap folem hem. Taem Josef i bin givim jalenj long olgeta we oli stap folem hem blong winim ol samting we oli no stret long olgeta long laef long wol ia, hem i no mekem se hem, hem i moa gud bitim olgeta, mo oli bin laekem hem from hemia. Long wan toktok, Josef i bin stap prij ova long wan manis finis bifo oli kilimded hem, hem i talem: “Mi neva talem long yufala se mi mi stret evriwan; be i no gat mistek long ol revelesen we mi bin tijim yufala long hem.”¹⁰ Josef Smit i “gat gudfala fasin” (Josef Smit—Histri 1:28) we i mekem se kolosap evriwan we oli bin save hem, oli bin laekem hem from. Wan we i bin save hem i talem: “Lav ia we olgeta sent oli gat long hem, man i no save talemaot.”¹¹ Kampani blong ol fren blong hem raon long hem, i wan samting we Josef i laekem tumas; mo hem i luk se fasin blong bildimap sosaeti mo bildimap komuniti olsem wan bigfala stamba tingting blong gospel.

Wan taem mi bin tingting mo talem: “Long ful laef blong hem, Josef Smit i bin laef kolosap long evriwan, i stap long boda, long ples we man i mas yusum paoa blong olgeta agensem ol samting blong wol ia mo agensem wanwan long olgeta. Hem i bin wan man we i bigfala mo i strong, mo i muvmuv plante. Hem i laekem blong kompit long spot, mo hemia blong pulum stik—blong testem paoa blong bodi (luk long Histri blong Jos, 5:302). Akaev blong yumi i gat plante ples we oli tokbaot we hem i stap kompit agensem ol fren mo ol narawan we hem i save olgeta. Long wan Sabat dei, hem mo Brigham Yang i bin prij long olgeta Sent long Ramas, Ilinoa, we i wan dei longwe long Nauvu. Long Mandei, bifo hem i aot long Ramas, Josef i kompit agensem wan man we oli talem se hem i “buli blong Ramas” (luk long Joseph Smith Journal, 13 March 1843, we Willard Richards i raetemdaon, Joseph Smith Collection, LDS Church Archives). Josef i sakem hem. Mi mi glad we lokol konfrens blong yumi, i no putum wan taem blong ol lokol memba oli testem ol atoriti we oli stap visit long wei ia”¹²

I no gat plante man we oli bin wantem blong kilimded olgeta long misin blong olgeta o spolem nem blong olgeta olsem we oli bin mekem long Josef Smit. Miwan mi bin stadi long sam long ol rong ia we oli putum agensem hem, mi go lukaot long ol rekod blong Ilinoa, ples we Josef i bin laef long hem long ol las faef yia blong laef blong hem. Wan rong we oli putum i stap, i taem we Josef Smit, we i bin meya, mo Nauvu Siti Kaonsel oli katemaot Nauvoo Expositor wan niuspepa blong oposisen. Samting ia i mekem se oli tokbaot nogud Jos mo i lidim blong oli kilimded Josef.

Ol fas Lata-dei Sent blong raetem histri, mo wan i Elda B. H. Roberts, i talem se aksen ia i no folem loa. Be, taem mi stadi long topik ia olsem wan yang profesa blong loa, mi sapraes blong faenem se i gat loa i stap long loa blong Ilinoa blong 1844. I gat plante niuspepa we oli stap katemaot long bodi long taem blong Sivil Wo. Fridom blong press insaed long Mama Loa blong Yunaeted Stet, hem i no go kasem aksen blong ol siti mo ol stet gavman kasem 1931; mo afta nomo, Hae Kot blong Y. S. i jenisim hemia folem wan amenmen we oli bin pasem long 1868 long wan vot blong 5 tu 4.¹³ Wan i mas jajem aksen blong Josef Smit folem ol loa mo situesen blong taem blong hem, i no taem blong yumi tedei.

Semmak olsem ol studen blong Yunivesiti long Jikago, man blong raetem histri, Marvin S. Hill mo mi, i bin wari long smol poen ia we mifala i kam blong save, se faef man i go pas long kot long Ilinoa from ded blong Josef Smit. Blong 10 yia, mifala i lukaot insaed long ol laebri mo ol akaev raon long nesen blong faenem evri pis infomesen abaot hemia long kot kes blong 1845, mo olgeta we oli pat long hemia. Mifala i luklukbak long ol toktok mo ol aksen blong ol sitisen blong Ilinoa we oli bin save gud Josef Smit—sam we oli lavem hem mo oli putum laef blong olgeta long denja from hem, mo ol narawan we oli no laekem hem nating mo oli mekem plan blong kilimded hem. I no gat wan samting long wanem we mifala i faenem long ol stret rekod blong kot, o long testemoni blong longfala kot kes ia, se i gat eni samting we i soem fasin blong no ona long man ia we oli bin kilim hem i ded.¹⁴

Taem mifala i lukluk long ol rekod blong kot kes long Ilinoa, hemia i lidim mitufala i go long wan nara pat abaot Josef Smit we oli neva stadi long hem. Joseph I. Bentley, we long tetaem ia i wan studen long Jikago, mo mi, i faenem plante rekod blong bisnis aktiviti blong Josef Smit. Mitufala i raetem wan atikol long 1976 we oli singaotem Brigham Young University Law Review long saed blong topik ia.¹⁵ Afta ol yia 1840, i bin gat wan hadtaem blong mane raon long nesen, mo kantri i sot long mane. Ol situesen blong ekonomi long ol boda blong ol stet olsem Ilinoa, oli nogud tumas. Eksampol, olgeta we oli raet abaot laef blong Abraham Lincoln, oli tokbaot ol faenens mistek blong hem long ol 10 yia taem ia, taem bisnis i no wok gud tumas, plante kaon i stap blong pem, mo fasin blong pas long kot i kam antap.¹⁶

Ol enemi blong Josef Smit oli putum hem long kot mo talem se hem i stap giaman long saed blong ol propeti we hem i salem, plante long olgeta, hem i mekem long bihaf blong Jos. Plante kot kes we oli folfolem olgeta, oli bin gohed blong kolosap 10 yia, mo oli lukluk long evri smol ditel. Long en, long 1852, longtaem afta we Ol Sent oli aot long Ilinoa (mekem se i no gat eni risen blong politik o eni samting blong sapotem Ol Sent o lida blong olgeta), a federol jaj i talem se kot kes ia i no gat giaman rod long hem, o giaman fasin we Josef Smit i mekem.¹⁷

Olgeta we oli stadi long skul, oli save abaot ol pablik mata long taem ia, oli raetem hemia abaot kampen blong Josef Smit we i stap ron from presidensi blong Yunaeted Stet:

“I nomata se hem i no gat wan bigfala janis blong winim 1844 ileksen, hem i ron olsem wan kandidet we i series blong leftemap tingting blong jenis blong loa long Yunaeted Stet. Hem i bin hop mo wok blong mekem tingting blong pablik i kam gud moa long saed blong ol problem blong taem ia, olsem fasin blong stap slef, fridom blong relijin, ol kalabus, mo ol pablik graon. Hem mo Robert F. Kennedy oli bin stap tufala Man Amerika we oli bin kilimded tufala taem oli bin stap ol kandidet blong ron from ofis blong presiden blong Yunaeted Stet.”¹⁸

Fasin blong Josef Smit, olgeta man we oli bin save gud hem oli bin andastanem gud hem mo oli bin stanap kolosap long hem long lidasip blong Jos. Oli bin laekem hem tumas mo oli bin sastenem hem olsem wan profet. “Brata blong hem, Haeram i jusum blong ded long saed blong hem. Jon Teila, we i bin stap wetem hem taem oli kilimded Josef Smit, i talem: ‘Mi testifae long fes blong God, ol enjel mo ol man, se Josef i wan gudfala, mo tru man we i gat klin fasin—mo praevet mo pablik fasin blong hem i klin gud—mo hem i bin laef mo ded olsem wan man blong God.’ (The Gospel Kingdom [1987], 355; luk tu long D&K 135:3). Brigham Yang i talem: ‘Mi no ting se wan man i laef long wol ia we i bin save Josef Smit i bitim we mi mi save hem; mi talem stret se, afta long Jisas Kraes, i no gat wan man bakegen, be Josef Smit nomo, we i bin laef i moa gud, o i laef gud moa’ [“Remarks,” Deseret News, 27 Ogis 1862, 65].”¹⁹

III. Josef Smit mo Loa

Olsem we i kamaot klia long ol eksampol we mi bin givim finis, longtaem intres blong mi long histri blong loa, i mekem se mi gat spesel intres long ol wok blong Josef Smit wetem loa sistem blong Amerika long taem blong hem. Ol man blong raetem histri oli bin stap talem se Josef Smit i stap insaed long samples kolosap 40 kot kes. Tedei, wetem help blong wok we oli bin mekem long The Joseph Smith Papers, (Ol Pepa blong Josef Smit), yumi save se namba ia, i moa long 220. Ol kot kes ia blong loa, oli “ol simpol kes i go kasem ol bigfala kes we i yusum mo tokbaot ol bigfala tingting o aedia insaed long ol. … Josef i yusum plante loya blong putum kes long kot, mo difendem ol kaen aksen ia … long tugeta, long sivil loa mo kriminol loa.”²⁰

Aot long bigfala rij save we hem i gat abaot laef blong Profet, Lata-dei Sent Jeffrey N. Walker i bin raetem: “Yumi no save sarem ae o tanem baksaed long hemia, se Josef Smit hem i bin stap lidim tingting mo wok insaed long loa sistem blong Amerika wetem strong paoa. Blong sarem ae long ol impoten aktiviti ia, i minim se yumi mestem plante abaot wei we hem i spendem taem mo paoa blong hem, long smat wei mo wei we i bin wok—mekem se Daniel H. Wells, we i wan loya, jaj mo loya blong gavman, mo i save gud long Josef Smit, i talem tingting blong hem olsem: ‘Mi bin save ol man blong loa long ful laef blong mi. Josef Smit i wan long ol bes loya we mi bin save long laef blong mi’ [olsem we oli kwotem insaed long The Journal of Jesse Nathaniel Smith: Six Decades in the Early West: Diaries and Papers of a Mormon Pioneer, 1834–1906 (1953), 456].”²¹

Olgeta trifala Lata-dei Sent man we i raet ia oli raetem sot samting, i go olsem: “From strong wok blong hem insaed long loa sistem, kwiktaem Smit i lanem ol rul blong gem ia mo i yusum ol rul ia, folem loa, blong gud blong hem, i traehad blong mekem ful yus blong ol niu janis mo proteksen we ol loa blong yangfala nesen ia i stap givim. Ol joes blong hem long saed blong loa, mo fasin blong hem, i mekem i klia se hem i save gud long saed blong ol poen blong loa, mo hem i tekem ol stret step blong mekem gud yus blong wanem loa i letem, blong kasem ol kopi raet blong Buk blong Momon antap long federol loa, blong mekem ol mared anda long loa blong Ohaeo, blong mekem gud ol odinens blong Nauvu siti, blong askem ful proteksen blong fridom blong relijin, blong mekem gud yus blong ol niu loa we i kontrolem fasin blong salem graon blong gavman, mo kasem raet blong ‘habeas corpus’ (man i mas pas long kot bifo oli jajem hem), mo blong askem stret ples blong holem kot, o blong hem i stap anda long niu loa blong taem man i go bagarap long saed blong mane. Long fri taem blong hem, hem i bin stadi long ol buk blong loa. Hem i bin save ol stret toktok blong Konstitusen mo stret fasin blong lanwis blong ol rul blong stet. Hem i bin save gud tu long ol plante divelopmen long saed blong loa long level blong stet mo federol loa truaot long laef taem blong hem.²²

I impoten blong luk se ol trifala man ia we oli raet oli talem: “Taem oli putum hem long kot, kot i neva faenem hem i rong long eni kriminol rong. Taem oli givim hem wan taem blong toktok long kot, oli faenem se hem i wan sitisen we i wokbaot stret mo hem i ones.²³

Ol ditel we oli raetem long kes blong Profet we oli jusum mo stadi long hem insaed long buk we mi bin kwotem, i dipen fulap long wok blong ol plante studen blong J. Reuben Clark Loa Skul, mo oli mekem ol ditel wok we i mekem se ol trifala ia oli raetem buk ia. Mi sapraes long hao oli tokbaot ol tingting blong ol studen blong loa ia:

“Ol loa studen we oli bin yusum bifo ol toktok blong buk ia olsem se i buk blong olgeta, oli oltaem kam long tingting ia se Josef i wan man we i responsibol, i ansa from ol aksen blong hem, i tru, i lukaot long wanem hem i stap mekem, i gat sore, i lukluk gud long ol samting, i obei long loa, i gat longfala tingting, i ting gud oltaem, i save help, i save luksave mo andastanem samting i klia, i gat save, i save jajem gud ol man, mo i smat gud long saed blong loa (hemia toktok blong hem) speseli taem i kam blong protektem ol raet blong relijin mo laef blong man mo ol narawan, o blong kareaot ol diuti we oli putum long solda blong hem. … Josef Smit i neva lusum fet long Mama Loa mo i traehad blong wok strong anda long paoa blong hem, nomata we plante taem, bae tingting blong hem i harem nogud, o i no glad, mo i wari se huia bae i lukaot long ol ples ia.”²⁴

IV. Las Toktok

Long laef blong hem, Josef Smit i bin mekem moa bitim wanem we eni nara man long wol ia bae i save mekem long wan sot taem olsem. Wan wei nomo blong eksplenem hemia, hem i help we i kam long heven. Mi laekem sot toktok ia:

“Hem i transletem mo pablisim Buk blong Momon long Niu Yok; i oganaesem Jos long Niu Yok, mo afta, i stanemap bakegen long Ohaeo, Misuri, mo Ilinoa; i stanemap ol siti, wetem Ketlan, Fa Wes, mo Nauvu; i singaotem mo trenem ol handred lida blong Jos; i stadi long lanwis Hibru mo Baebol; i stanemap Rilif Sosaeti long Nauvu; i gat ol bisnis, blong hemwan mo sam wetem sam patna; i developem wok blong lukaot long graon mo i bildim ol tempol; i raetem mo pablisim ol atikol mo ol atikol blong edita; i gat wan bigfala famli mo i akseptem eniwan i kam fren blong hem; mo i wok long sam gavman ofis, mo wan i jif komanda blong wan bigfala grup blong ami blong ol soldia, mo tu, hem i meya mo jif jaj blong siti blong Nauvu. Hem i toktok plante long ol wik wosip seves, ol dedikesen, mo long plante fenerol; hem i stap pulum plante blong ol ten blong ol taosen blong ol pipol we oli stap folem hem, i pusum bigfala namba blong ol pipol we oli konvet blong oli muv i go long Yunaeted Stet.”²⁵

Long wan toktok blong jeneral konfrens, we hem i bin givim ova long 20 yia nao, hem i talem:

“Olsem ol nara fetful Lata-dei Sent, mi bin bildimap laef blong mi antap long testemoni mo misin blong Profet Josef Smit. Long evri riding mo stadi blong mi, mi neva slakem testemoni blong mi se God i singaotem hem olsem wan profet, mo Lod i statem blong putumbak gospel mo prishud tru long hem. Mi talem tabu testemoni blong mi se wanem Josef Smit i talem long Wentwot Leta long 1842, i tru:

“ … Standet blong trutok, oli putumap finis; bae i no gat wan rabis han i save stopem wok ia blong i gohed; ol fasin blong agens bae oli strong, ol rabis man bae oli joen wanples, ol ami bae oli kam tugeta, fasin blong tokbaot nogud man we i spolem man, be trutok blong God bae i gohed i go nomo, i klia, i stanap stret, i indipenden, kasem taem we bae i gotru long evri graon, i visitim evri kaen weta, i swipim evri kantri, mo i ring long evri sora, kasem taem ol stamba tingting blong God oli kamtru, mo Hae Jehova bae i talem se wok ia i finis” (Times and Seasons, 1 Maj 1842, 709; oli kwotem long Daniel H. Ludlow, ed., Encyclopedia of Mormonism, 5 vols. [1992], 4:1754).”²⁶

Ol brata mo sista, mi testifae abaot Jisas Kraes, Sevya blong yumi, we i bin kamkamaot wetem God Papa, long profet boe ia, mo long hem we Papa i talem: “Hem, Hem i Pikinini blong Mi we Mi Lavem Tumas. !Lisin gud long hem!” (Josef Smit—Histri 1:17). Yumi bin stap harem Lod Jisas Kraes i stap toktok tru long revelesen stat long taem ia i kam kasem tedei. Hemia i Jos blong Hem. Yumi holem atoriti blong tabu prishud blong Hem. Bambae yumi go fored long bigfala wok ia we i gat ona. Mi testifae abaot koling blong Profet Josef Smit, mo abaot koling blong ol profet we oli bin kam afta long hem long bigfala wok ia we yufala i stap long hem.

Yia:	Wanem i Hapen:
14	I kasem Fas Visen
21	I kasem ol buk we oli wokem long gol
23	Finis blong transletem Buk blong Momon
25	I kasem haf blong ol revelesen we oli stap long Doktrin mo Ol Kavenan.
26	Fas Presidensi i oganaes
33	I Ronwe long kalabus long Misuri, i statem lidasip bakegen
38	I Ded from bilif blong hem