Dijitol Nomo
From Wanem Mi Nomo Fraet blong Kasem Mentol Helt Kaonseling
Hem we i raetem hemia i stap long Vijinia, YSA.
Blong kasem help we mi nidim i no wan saen blong wiknes o blong mestem rod.
“I gud yu go toktok long wan mentol helt kaonsela.”
Advaes ia i kam olsem wan bigfala sapraes. Mi jes talemaot long wan fren se tingting blong mi i fasfas tumas, from se bae mi go insaed long wan bigfala impoten akaonting program, mi mas holemtaet ol rilesensip, mo stap deit, mo mi wan riten misinari. Mi neva tingting long aedia blong kasem tritmen, mo mi filim se, fasin blong toktok long wan kaonsela, i blong ol pipol we oli gat ol bigfala problem nomo, o oli nomo strong long bodi blong fesem ol jalenj olgetawan. Fren blong mi i gat ol gud samting blong talem abaot eksperiens blong hem, we hem i go toktok long wan kaonsela, mekem se mi stat blong tingting long hemia.
I no longtaem afta, wari blong mi i stap kam mowas. Afta plante naet blong stap wari, mi disaed blong tekem wan apoenmen. Mi no stap kwaet; mi tingting long wanem ol nara pipol oli save talem o tingting sapos oli save se mi mi stap go long wan kaonsela, be long tetaem ia, wari blong mi i stap stopem mi blong wok gud, mekem se mi go.
Stap Winim Bigfala Wari
Long apoenmen, kaonsela i askem fulap kwestin we oli helpem mi blong faenem ol ansa blong miwan. Kaonsela i no givim wan majik ansa long ol trabol blong mi. Hem i no tritim mi tu olsem se mi mi wan krangkewan—hem i luk plante pipol we oli stap traehad semmak olsem mi. Long sam wei, mi filim se mi stap go luk wan nomol dokta nomo. Hem i wan profesenol we i gat eksperiens blong faenemaot wanem problem i stap, mo i gat save ia blong tijim mi olsem wanem blong stopem, mo tritim fasin blong gat bigfala wari.
Wetem sam nara tingting moa, kaonsela i talem se mi mas raetemdaon ol filing mo tingting blong mi long jenol blong mi. Hemia i helpem mi bigwan blong winim bigfala wari blong mi. Mekem se mi go mekem eksasaes, spendem taem wetem ol fren mo famli, kakae ol helti kakae (o i helti olsem wan yang man long skul i save kuk), mi stap stadi long ol skripja, go long jos, mo mi stap prea.
Afta we mi mitim kaonsela ia plante taem, tu samting i jenis long mi: faswan, mi gat niu helti wei blong lukluk long ol wari blong mi, blong lukluk long miwan, mo ol nara pipol; mo sekenwan, mi filim se mi gat plante tul we oli save help, we mi save yusum sapos mi fesem sem kaen situesen long fiuja. Mi no kam oraet evriwan, we mi nomo gat bigfala wari, be mi filim se mi save fesem bigfala wari i moa gud taem i kamaot bakegen. Stat long tetaem ia, mi nomo nid blong gobak long kaonsela, be sapos mi nidim, bae mi no wari se bae mi go askem help–Mi lanem se i no gat risen blong safa mo no tokbaot, o blong stap sem blong askem help long wan dokta blong sik blong tingting.
Stopem Kaen Ia
Sore tumas, i gat fulap defren kaen tingting long fasin blong tritim man from sik blong tingting, be hemia i from sam oli no andastanem se blong mit wetem wan dokta blong helt blong tingting, i wan nid, i semmak olsem se yu go luk wan dokta from sik long bodi. Elda Jefri R. Holan blong Kworom blong Olgeta Twelef Aposol i bin talem: “Sapos yu gat apendisit, God bae i wantem luk yu kasem wan prishud blesing mo i wantem luk yu go kasem medikol help we i stap. Semmak tu taem filing blong yumi i no stap stret. Papa blong yumi long Heven i wantem luk se yumi yusum evri gudfala presen we Hem i givim long bigfala dispensesen ia.”1
Ol nid long helt long tingting, oli wan samting we i haed yet i stap. I no isi blong tokbaot, olsem se bae yu tokbaot se yu kasem flu, o yu brekem wan bun blong yu. Be oli semmak nomo. Wol Helt Oganaesesen i ting se plante pipol wetem ol bigfala problem blong sik blong tingting, oli no stap kasem tritmen: 35 mo 50 pesen blong ol man long ol kantri we oli kam develop, mo i gat 76 kasem 85 pesen long ol kantri we oli develop finis.2
Blong kasem help we mi nidim i no wan saen blong wiknes o blong mestem rod. Papa long Heven i wantem yumi blong stap helti, long saed blong tingting mo bodi, mo i givim yumi plante “gudfala presen” blong helpem yumi blong save tekem ol jalenj blong tingting mo filing long laef long wol ia; long ol gudfala presen ia oli:
Helt blong Tingting
Eksasaes
Ol fren mo famli
Stap laef folem gospel
Slip inaf
Ol lida blong Jos
Givim seves long ol narawan
Wan mentol helt profesenol o dokta
Helti fasin blong kakae
Bae yumi no save winim fulwan evri helt jalenj blong tingting long laef ia, mo plante taem, i no gat wan ansa we i stret long evriwan. Be taem yumi mekem bes blong helpem yumiwan mo yusum ol tul ia we Papa long Heven i bin givim long yumi, bae Sevya i helpem yumi blong tekem ol hevi samting blong yumi isi nomo (luk long Mosaea 24:15), mo bambae yumi kasem blesing blong gat strong paoa long bodi mo hop long ol traehad blong yumi.