Gaed blong Stap Stanap Strong we i kam long WOMAN we i Leftemap Hevi Wet
Hem we i raetem hemia i stap long Kalifonia, YSA.
Wan skripja i save jenisim plante samting—iven long wetlifting (leftemap hevi aean) kompetisen.
Taem mi jes go long hae skul, koj blong wetlifting i askem mi blong joen i go long tim.
“Mmm … no tangkyu,” mi talem. “I no samting mi laekem.”
Be hem i gohed blong askem. Blong plante wik.
Nao, mi go traem. Hem i talem stret: mi rili laekem wetlifting Long fas taem, i defren smol; bodi blong mi i neva mekem wan kaen samting olsem. Be mi kam blong lavem filing ia blong praktisim spot ia. Mi lavem tu olgeta fren long tim mo ol kompetisen. Mo mi stat blong mekem gud tu.
Naoia, wetlifting i wan bigfala pat blong laef blong mi. Mi praktis evri dei blong tu o tri aoa, mi mekem ol bak skwat, ol klin jek (leftemap aean long jes, mo antap long hed afta), mo ol snaj (leftemap aean i go stret antap). (Mo sapos yu no save wanem ia ol samting ia, yu no wari—!mi tu, mi no bin save!)
Olsem plante samting, wetlifting i tekem taem mo fasin blong save wet longtaem, mo samtaem, hemia i had. Laki nomo, famli blong mi i bin stap oltaem blong leftemap tingting blong mi, iven taem mi komplen se bodi blong mi i soa (mo i hapen oltaem.) Oltaem nomo papa blong mi i gat aes mo toktok i rere i stap taem mi kambak hom afta long praktis. Mama blong mi, oltaem i mekem ol sakrifaes blong mi save go long ol kompetisen.
Sam yia i pas, mi go long wan long ol kompetisen ia long Filadelfia, Pensilvania, YSA. Mi bin glad tumas se bae mi kompit agensem ol narawan blong kantri ia, be mi wari se bae mi stap longwe long famli. Blong mekem se hem i isi, mama blong mi i promes se bae hem i tekstem ol skripja mo ol gudfala mesej evri dei.
Long naet bifo long kompetisen, sam yangfala oli mekem wan pati. Mi ting se bae i gud blong go, mekem se hem we mitufala i serem rum i go jekem. Be taem mifala i go nomo, mi save se hemia i no kaen pati blong mi go long hem. I gat ol yangfala we oli dring, oli smok, mo oli talem ol rabis toktok, mo oli danis nogud. Mi save se mi no mas stap, be mi wari se bae fren blong mi bae i tingting wanem. O, ol nara fren we oli kompit bae oli tingting wanem.
Be, wan samting i kam long hed blong mi:
“Stanap long ol tabu ples.”
Hem i kamaot long wan ol skripja we mi laekem, mo wan we mama blong mi i bin sendem long moning ia: Doktrin mo Ol Kavenan 87:8: “Taswe, yufala i mas stanap long ol tabu ples, mo no mas muv, kasem dei blong Lod i kam; from luk, i kam kwiktaem, Lod i talem. Amen.”
Mi no save se from wanem mama i bin sendem skripja long dei ia, be i wan we mi bin lavem long ful laef blong mi. Mi bin lanem baehat stat long taem we mi gat eit yia, mo bakegen mo bakegen, i bin rimaenem mi blong gat strong paoa long tingting, blong stap obei, mo stanap from wanem we mi stap biliv long hem.
“Stanap long ol tabu ples.”
“Bae mi go fastaem” mi talem long fren blong mi. Mi eksplenem skripja we mama blong mi i bin sendem i kam long mi long moning ia. “Hemia i no wan ples we mi sapos blong stanap o stap long hem.”
Fren blong mi i talem long mi se, hem tu, hem i no wantem stap long ples ia. Hem tu, hem i no filim se i stret be hem i no bin wantem aot hemwan mo mekem se ol narawan oli talem se hem i gud blong nating. Hem i talem tangkyu long mi blong toktok, mo mitufala i go.
Long nekis moning, mitufala i faenem se afta we mitufala i aot, olgeta yangfala we oli stap pati, oli kasem olgeta mo oli tekemaot olgeta long kompetisen from oli bin stap dring mo tekem ol drag.
Sapos Spirit i no bin talem long mi blong tingbaot ves blong mama, maet bae mi tu mi kamaot long kompetisen. Long en, mi nao mi winim fas ples, mekem se mi glad tumas we mi bin save kompit. (Mi ting se mi talem tangkyu long mama blong mi evri dei from hem i stap tekstem mi.)
Blong winim wetlifting kompetisen ia, i wan blesing we i klia mo i kam hariap from mi bin stap obei long olgeta komanmen. Be Doktrin mo Ol Kavenan 87:8 i no talem se, “Stanap long ol tabu ples blong yu save winim ol wetlifting kompetisen.” Mo Jon 14:15 i no talem se “sapos yu wantem ol blesing hariap, yu mekem folem ol tok blong mi.” Lod i blesem yumi from Hem i lavem yumi. Mo yumi stap traem blong stap tabu mo stap obei from se yumi trastem mo lavem Lod.