Ol Yang Adalt
Tijim Mi blong Flae: Blong Kam blong Dipen long Yuwan long saed blong Filing long Wei blong Lod
Hem we i raetem hemia i stap long Kalifonia, YSA.
Valerie Durrant i blong Kalifonia, YSA, mo hem i bin mared long hasban blong hem, Ryan, blong fo yia nao. I no longtaem i pas, hem i kam mama blong wan bebi boe. Hem i laekem yoga, peinting, riding mo blong wokbaot long bus.
Yumi rili nid blong stap dipen long Papa long Heven mo Jisas Kraes, mo putum traehad taem yumi stap lukluk blong dipen long yumiwan long saed blong filing.
Ol pikja foto oli kam long Getty Images
Taem yumi tingting long wan smol pijin we i stap lan blong flae, plante taem, yumi gat pikja blong las traem blong hem: we i kilkilim ol wing i aot long bed, i openem wing blong hem bigwan, mo i flae i go antap long skae. Bifo long las sakses ia, i gat fulap taem we hem i mestem, we i mekem pijin i no flae antap long skae, be i kilkilim wing blong hem i foldaon long graon.
Olsem wan pijin we i stap lan blong flae, yumi tu, yumi foldaon bakegen mo bakegen taem yumi stap traem blong stap dipen long yumiwan long saed blong filing. Be, sapos yumi tanem yumi i go long Lod blong kasem help, mo traehad, yumi save lanem olsem wanem blong stanap bakegen taem laef i no go olsem we yumi stap plan long hem, mo stap dipen long Hem, mo taem ol tes oli kam plante tumas blong yumi tekem olgeta evriwan yumiwan.
Stap Lan blong Flae
Sapos blong lan blong flae i wan rod we i soa tumas, ?from wanem wan pijin bae i aot long bed blong hem long fas ples? From mama blong hem. Long fas pat blong laef blong ol bebi blong hem, mama pijin bae i tekem kaekae i go stret long olgeta insaed long bed blong olgeta. Be afta sam taem, hem i stat blong lego kaekae aotsaed long bed, mekem se ol smol pijin oli mas aot long gudfala bed blong olgeta blong kasem kaekae.
Hem i semfala rod we yumi folem taem yumi stap lan blong dipen long yumiwan long saed blong filing—be oli no wet se bae yumi save flae yumiwan yet.
Semmak long mama pijin i letem ol bebi blong hem oli foldaon aotsaed long bed blong olgeta, Papa long Heven i letem yumi go tru long ol tes mo ol eksperiens we, samtaem, i soa tumas, i mekem tingting i fasfas, mo i mekem yumi kam slak. Plan blong Hem blong fasin blong sevem ol man, i stap blong helpem yumi kam olsem Hem, blong mekem se evri jalenj we yumi stap fesem, i save kam wan janis blong lanem samting mo gro. Olsem mama pijin ia, Papa long Heven i stap givim yet kamfot mo i soem rod, from se, wetem help blong Hem nomo bae yumi kasem mo holemtaet wan gudfala helt long saed blong filing mo tingting.
Kilkilim Wing blong Yumiwan
I nomata we Papa long Heven i patna blong yumi, yumi no mas ting se Hem bae i mekem evri samting blong yumi. Hem i wantem yumi blong yusum fridom blong joes blong yumi, wetem ol risos we Hem i bin givim long yumi long rod ia blong stap dipen long yumiwan long saed blong filing.
Eksampol, taem yumi stap go tru long wan taem we hat i soa, yumi kros, o yumi lusum wan famli, Hem i wantem yumi blong toktok wetem Hem, be yumi no mas stop long ples ia—yumi nidim blong mekem bes blong yumi blong mekem folem ol toktok we Hem i talem tru long Spirit; blong yumi obei ol komanmen; blong yumi go long tempol blong lukaotem pis, kamfot, mo ol ansa; blong yumi gat tingting long ol advaes we i kam long profet; mo blong trastem plan we Hem i gat long yumi.
Papa long Heven i givim yumi plante tul blong save stap dipen long yumiwan long saed blong filing; be, sapos yumi givim evri samting, mo yumi faenem we yumi fas i stap, o yumi stap traehad wetem helt blong tingting blong yumi, nao yumi nidim sam moa risos. I gat olgeta taem we yu save tanem yu i go long wan profesenol helt dokta blong tingting, o blong kasem advaes we i kam long bisop blong yu blong hem i lidim yu i go moa blong save muv i go fored.
Be, kipim long maen blong yu se sapos yumi askem advaes long ol nara man evri taem we yumi fas long rod, bae yumi lusum ol gudfala janis blong lanem samting mo gro yumiwan. Bakegen, yumi nidim blong givim inaf traehad blong yumi blong muv fored i go.
Stap Folem Paten blong Lod
Insaed long Doktrin mo Ol Kavenan, seksen 9, Oliva Kaodri, Lod i tok strong long hem from hem i traem blong transletem ol buk blong Buk blong Momon, mo i no askem God fastaem, (ves 7). Afta, Lod i askem strong long hem blong hem i mas “stadi gud long hem insaed long maen blong [hem,]” i mekem wan tingting long hemia, mo afta, “i askem God sapos i raet” (ves 8).
Taem yumi stap folem paten ia, Papa long Heven i no lego yumi blong stap dipen fulwan long paoa mo tingting blong yumiwan taem yumi stap kea long helt blong tingting blong yumi. Hem i stap letem yumi gat janis ia blong lanem olsem wanem blong yusum fridom blong joes blong yumi. Blong stap lukaotem ol ansa long ol kwestin blong yumi, mo blong faenem ol ansa long ol problem blong yumi wetem help blong Hem, bambae long en, i helpem yumi blong kam olsem Hem. Wetem hemia long maen, yumi save askem hem blong soem long yumi olsem wanem yumi save gat moa balens long saed blong filing, be i no blong jes askem Hem blong mekem yumi kam oraet.
Taem yumi praktisim fridom blong joes blong yumi bakegen mo bakegen long wei ia taem we filing blong yumi i stap long tes, sloslo yumi kam gud moa mo yumi gat moa tras long yumiwan. Yumi no save flae gud yet, be yumi save stret se Hem i stap wetem yumi evri taem folem rod ia, mo yumi stap glad from se i tru se Hem i stap helpem yumi blong kam gud moa, smol mo smol evri dei. Evri dei i wan nara janis blong kasem niu level bakegen—blong stap mekem yumi rere from dei ia we bae yumi save flae yumiwan nomo.