Avea ma Soo

O le lalolagi ua tatou nonofo ai e foliga mai ua fuafuaina e suesue ai lo tatou tuuto atu i le avea ma soo. A o tatou suesue i le Feagaiga Fou i le tausaga lenei, e mafai ona musuia i tatou i aoaoga ma faataitaiga a Iesu Keriso ma Ona soo, o e sa taumafai ia aoao mai ma avea atili e faapei o lo latou Matai.

I le avea ai ma faiaoga o le Feagaiga Fou i le Iunivesite o Polika Iaga, sa ma fefaasoaai ai ma la’u soa o Gaye Strathearn i ni manatu o i lenei lomiga e uiga i mamanu o le avea ma soo e mafai ona tatou aoao mai ia Maria, le tina o le Alii (itulau 12), ma Ioane le Soo Pele (itulau 18). O nei tagata e toalua sa aofia faatasi ai i nisi o molimau maoae o Iesu Keriso. E ese mai i le Atua le Tama lava Ia, e leai se tasi e sili atu lona silafia nai lo o le tina o Iesu e faapea, o Ia moni lava o le Alo o le Atua, ae o Ioane sa faitaulia faatasi ma le uluai Toasefululua ma e foliga mai sa avea ma se tasi o uo mamae a le Alii.

O le tuuto o nei ma isi soo, ua aoao mai ai ia i tatou auala e mafai ona avea ai i tatou lava ma soo pele o Iesu Keriso ma tausisia ai lo tatou avea ma ni soo e ui lava i luitau o le lalolagi.

A o tatou suesue ma le agaga tatalo i le Feagaiga Fou, o le a mafai ona tatou iloa e le gata i mea e tele e uiga ia Iesu ae e iloa moni lelei ai o Ia (tagai Ioane 17:3).

Ma le faamaoni lava,

Eric D. Huntsman