O Vaega e Lua o le Faatuatua
Saunia e Elder Wilford W. Andersen
O Le Fitugafulu
Mai se saunoaga i le faigalotu, “The Faith to Reap,” na tuuina atu i le Iunivesite o Polika Iaga–Idaho i le aso 17 o Mati, 2015.
O le faatuatua ia Iesu Keriso ma Lana Togiola o le faatuatua lea e selesele ai. O faatuatua lea i Lona mana, ae le a oe.
O Le Seleselga Faaauro, saunia e David Merrill, faaaloaloga a le Falemataaga o Talafaasolopito a le Ekalesia
O Keriso o loo Tatalo i le Faatoaga o Ketesemane, saunia e Hermann Clementz
Sa i ai Liae ma lona aiga i le vao mo na o ni nai aso ae poloaiina e le Alii e toe auina atu ona atalii i Ierusalema e aumai papatusi apamemea mai ia Lapana. E le masani ona tatou patipatia ia atalii faalogotata e toalua o Liae, o Lamana ma Lemuelu, ae o le mea moni sa mananao i la’ua e o. Sa lava lo laua faatuatua, e taumafai atu i ai.
Sa talosagaina e Lamana, ma Lemuelu mulimuli ane ma o laua uso, ia Lapana mo papatusi. Sa aveesea ia tamaoaiga a le aiga o lenei auuso ma na toeitiiti a aveesea ai ma o latou ola i le taumafaiga. O le taimi lea, na faatoilaloina ai le faatuatua o Lamana ma Lemuelu, ma sa sauni i laua e togi le solo. O Nifae i le isi itu, sa i ai lona faatuatua e faatoilalo ai le matautia ma le lotovaivai.
“O soifua le Atua, o ola foi i tatou, tatou te le o atu i lo tatou tama i le vao, seia uma ona faia e i tatou le mea ua poloaiina ai i tatou e le Atua.
“O le mea lea ia tatou faamaoni ai i le tausiga o poloaiga a le Atua” (1 Nifae 3:15–16).
Ona faaaoga lea e Nifae lona faatuatua tele, sa aumaia papatusi mai ia Lapana, ma toe foi atu ma ona uso i lo latou tama i le vao.
E foliga mai e lua vaega maioio o le faatuatua. O le vaega muamua o le faatuatua e taumafai ai, le faatuatua e sasau ai a tatou selesaito. O le vaega lona lua o le faatuatua e fai ai. E sili atu nai lo o le faatuatua e sasau atu ai lau selesaito—o le faatuatua lea e selesele ai.
Sa i ai ia Lamana ma Lemuelu le faatuatua e taumafai ai, ae sa ia Nifae le faatuatua e fai ai. Sa lava le faatuatua sa i ai ia Lamana ma Lemuelu e sasau ai a laua selesaito, ae sa lava le faatuatua o Nifae e selesele ai.
O lena eseesega laitiiti i le va o le faatuatua e sasau atu ai a outou selesaito ma le faatuatua e selesele ai, o le a faia ai le eseesega uma i o outou olaga. Ina ia toe nonofo faatasi ma lo tatou Tama Faalelagi ma ia ola i ni olaga manuia ma le fiafia i le lalolagi, tatou te manaomia ai ona atinae le faatuatua e selesele ai.
Ua tatou maua ni folafolaga matagofie mai i le Alii—o folafolaga o le fiafia ma le olioli i lenei olaga ma le faaeaga i le olaga a sau. Peitai o luitau ma faafitauli o o tatou olaga i aso taitasi e tele ina faatamaia ai o tatou faamoemoe. E foliga mai ua matuai mamao tele lo latou nuu o le folafolaga, ma o le lemautonu, e amata ai ona tatou masalosalo.
Tatou te manatu, “e le mafai ona ou ausia lena sini pe maua lena faamanuiaga.” “E mautinoa lava sa mafaufau le Alii i se isi tagata i le taimi sa Ia faia ai na folafolaga.”
Leai, sa mafaufau o Ia ia te oe ma ia te a’u. Pau le mea tatou te manaomia o le lava o le faatuatua ia maua ai o tatou faamanuiaga—o se faatuatua e matuai malosi e faapea ai ona liua o tatou folafolaga i le lumanai i ni mea moni i le taimi nei. Tatou te manaomia le faatuatua e selesele ai.
O le a tonu lava lenei faatuatua, ae e faapefea ona tatou atinaea?
Ia Faatuatua ia Iesu Keriso
Muamua, e le pei o le faatuatua e sasau ai a outou selesaito, o le faatuatua e selesele ai e le o le faatuatua ia te outou lava. E le tutusa ma le talitonu o le tagata ia te ia lava po o le uiga o le mautinoa faalemafaufau. E le o le faatuatua foi i lou aiga po o uo—o ia mea uma e lelei. O le faatuatua e selesele ai o le faatuatua ia Iesu Keriso ma Lana Togiola. O faatuatua lea i Lona mana, ae le a oe.
Ina ua valaauina a’u o se peresitene o le siteki i le Siteki a Mesa Arisona Maricopa, sa valaaulia ai i ma’ua ma lo’u toalua e Elder W. Mack Lawrence, o le sa avea ma Pulega Aoao a Fitugafulu i le taimi lea, i totonu o le ofisa o le peresitene o le siteki ma tuuina mai le valaauga. Sa ou taliaina ma le usiusitai. Ona ia valaaulia lea o i ma’ua e o atu i le potu o fautua maualuga ma mafaufau ai ma le agaga tatalo ni tamalii e fautua atu e avea ma o’u fesoasoani. Ao o’u ulu atu i le potu, sa ou vaaia ai ata o peresitene uma o le siteki o e sa auauna muamua atu i le siteki talu ona faavaeina, ma sa ou lagona le lotovaivai. O i latou o ni taitai maoae i le Ekalesia ma i le lotoifale.
Sa ou tilotilo atu i lo’u toalua ma faapea atu, “Kathleen, ailoga e mafai ona ou faia le mea lenei. Ou te le lelei pei o i latou.”
Sa ia faapea mai, “Ia aua e te fai mai i le mea lena ia te a’u. E tatau ona e talanoa ia Elder Lawrence.”
Sa ou te’i ina ua ou fai atu ia te ia, ou te manatu e le mafai ona ou faia le valaauga, sa tali mai Elder Lawrence, “Ia, ou te matea e sa’o oe.”
Ona ia faapea mai lea, “E le mafai ona e faia, Uso Andersen, ae e mafai e le Alii. O loo ia te Ia le mana e fai ai Lana galuega, ma afai o le a e agavaa ma galue malosi, o le a Ia faia. O le a e vaai i ai.”
Ma sa Ia faia.
O le faatuatua e sasau atu ai lau selesaito, o le faatuatua lea e taumafai ai. O le faatuatua o le tagata ia te ia lava, ma e aluese atu i le taimi e faigata ai se tulaga. Ona amata lea ona tatou masalosalo. Ae o le faatuatua e selesele ai o le faatuatua lea i le Alii o Iesu Keriso. E le taitai lava fo’i.
Faaogatusa Lou Loto ma le Finagalo o le Atua
Ina ia faaali le faatuatua e selesele ai, e ao ona tatou mautinoa o tutusa o tatou manaoga ma faamoemoega ma le finagalo o le Atua. E le mafai ona tatou faaalia le faatuatua e selesele ai pe afai e le finagalo malie le Atua i le seleselega. Ina ia maua Lana fesoasoani, e ao ona faaogatusa o tatou loto ma Lona [finagalo].
Ona o le perofeta o Nifae i le tusi a Helamana sa o se tagata amiotonu ma faamaoni, sa fetalai atu ai le Alii ia te ia,” O le a ou faamanuiaina oe e faavavau; ma o le a ou faamamanaina oe i le upu ma mea e fai, i le faatuatua ma galuega; ioe, e oo lava i le faia o mea uma ia te oe e tusa ai ma lau upu.” Ta’i maoae lea folafolaga. Ona faaopoopo mai lea o le Alii, “Ona e te le ole mai i se mea ua le tusa ai ma lo’u loto” (Helamana 10:5).
Ma ua ta’u mai e Moronae le mea lenei ia i tatou: “Ma ua fetalai mai Keriso: Afai tou te faatuatua mai ia te au o le a outou maua le mana e fai ai soo se mea e tatau ai ia te au” (Moronae 7:33).
O le faatutusaina o o tatou manao i le finagalo o le Atua, e ao ona muamua atu i le faatuatua e selesele ai.
A o laiti o’u atalii, sa latou taaalo ai i au pasiketipolo a le aoga maualuga. I aso na, sa masani ona faia a latou tatalo o se au a o le’i amataina ia taaloga taitasi. A o ou matamata mai i luga o tulaga, sa masani ona ou mafaufau po o a ni mea sa latou tatalo atu ai? Afai sa latou tatalo ia manumalo i le taaloga, sa le’i i ai i a latou tatalo le faatuatua e selesele ai. Sa manino le faamaonia o lenei mea e ala i le aofai o taaloga sa latou faiaina ai. O le mea moni sa le’i tutusa le finagalo o le Alii ma lo latou manao ia latou manumalo i taaloga uma.
I se isi faaupuga, o le a fesoasoani le Atua ia te i tatou ia ausia na’o sini lava e lelei mo i tatou. E mafua ona e alofa o Ia ia i tatou, ma e sili atu Lona silafia nai lo o i tatou i mea e lelei mo i tatou. Ma pe tatou te le faafetai ea ona o lena mea? E tatau ona tatou tatalo i aso taitasi ina ia faamanuia i tatou e le Tama Faalelagi i manaoga amiotonu ina ia faagatusa o tatou loto ma Lona [finagalo]. E tatau ona tatou aoao e tatalo e pei ona sa faia e le Alii i le Faatoaga i Ketesemane, ina ia aua le faia o tatou loto, ao lona finagalo (tagai Luka 22:42). Ona faatoa mai ai lea ona tatou faaalia le faatuatua e selesele ai.
Alu e Galue
O le vaega lona tolu e tatau ona muamua atu i le faatuatua e selesele ai o le galue. Ua faamanino mai e le Aposetolo o Iakopo e faapea, e mate le faatuatua pe a leai ni galuega. O le faatuatua e sasau atu ai a tatou selesaito e manaomia ai le talitonu, ae o le faatuatua e selesele ai, e tele atu mea e manaomia ai nai lo na o le talitonu. Sa tusia foi e Iakopo, e oo lava foi i tiapolo e talitonu ma gatete (tagai Iakopo 2:17, 19).
Sa ou faalogo i se tala e uiga i se tama o le sa matauina lona afafine laitiiti o tootuli i tafatafa o lona moega, ma tatalo ina ia puipui e le Tama Faalelagi ia manulele laiti mai le ulu atu i se mailei manulele sa fauina e lona tuagane i le pito i tua o le latou fanua. Mulimuli ane i lena aso, sa faapea ona popole le tama. Sa ia iloaina o le mailei sa o se mailei lelei lava. Sa ia fesoasoani i lona atalii i le fauga.
“Sa ou faalogo o e tatalo ananei i le taeao ina ia puipui e le Tama Faalelagi ia manulele laiti mai le mailei a lou tuagane,” sa ia fai atu ai i lona afafine. “Peitai o nisi o taimi e tutupu ai mea e faanoanoa ai e tusa lava pe tatou te tatalo ia aua ne’i tutupu.”
Sa ia tali mai, “Ou te iloa lava o le a ia le mauaina ni manulele, Tama.”
“Ou te fiafia tele i lou faatuatua, [la’u] pele,” o le tala lea a le tamā. “Ae afai na te mauaina ni manulele, ou te faamoemoe o le a le afaina ai lou faatuatua.”
“Na te le mauaina, Tama,” sa ia fai mai ai. “Ou te iloa na te le mauaina.”
Sa fesili atu le tama, “E mafai faapefea ona e maua se faatuatua tele faapena?”
“Aua ina ua uma la’u tatalo,” sa tali mai ai lona afafine, “Sa ou alu atu i tua ma kiki lana mailei manulele ina ia malepe.
E lelei le tatalo mo faamanuiaga a le Tama Faalelagi. Ae a uma ona tatou fai atu amene, e tatau ona tatou o e galulue. E le mafai ona tatou faamoemoe i le Alii e tataia o tatou tulagavae pe afai tatou te le naunau e faaminoi o tatou vae. Pe tatau foi ona tatou ole atu ia te Ia e faia mo i tatou mea e mafai ma e tatau ona tatou faia mo i tatou lava.
E tatau ona tatou galulue i le ausiaina o a tatou sini amiotonu, ma e ao ona tatou galulue malolosi i le tausiga o poloaiga. O le mana moni o loo i a tatou feagaiga ma le mana moni o loo i le faatuatua e selesele ai e le iloa pe a tatou faaiuina ma le mautinoa e tausia e le Atua Ana folafolaga ae o le pe a tatou faaiuina ma le mautinoa e tausia a tatou [folafolaga]. O le upumoni maoae o le mea lena e faaliliua ia folafolaga i le lumanai i mea moni i le taimi nei. E tatau ona tatou galulue.
Aua le lotovaivai i ou toilaloga ma measese, ae ia tumau pea i au taumafaiga ma ia pulunaunau. O le faatuatua e selesele ai e le manaomia ai le atoatoa, ae e manaoamia ai le maelega.
Ou te valaaulia outou e atinae le faatuatua e selesele ai. Ia tuu mausali lou faatuatua i lo tatou Faaola o Iesu Keriso ma i Lana Togiola. Ia mautinoa e ogatasi ou manao ma ia tutusa ma Lona finagalo. Ona alu loa lea e galue ma lou loto atoa, manatu, mafaufau ma le malosi atoa faapea ma le pulunaunau e le vaivai, ma le maelega. E leai se luitau, leai se faafitauli, leai se papupuni e le gauai atu i le faatuatua e selesele ai.