Faailoga i le Feagaiga Fou

Manatu mai ia Russell M. Nelson, “I Lenei Laueleele Paia,” Liahona, Fep. 1991, 13, 17, 18.

E faaopoopo atu i aoaoga, e mafai ona tatou maua uiga i meafaitino, aganuu, talafaasolopito, ma nofoaga i le Feagaiga Fou.

Vai: “O le Vaitafe o Ioritana o le nofoaga lea sa filifili e Iesu mo Lona papatisoga e Ioane i le ‘faataunuuina o mea tonu uma’ [Mataio 3:15]. Pe taua le faatinoina o lenei sauniga paia i le vaega aupito maualalo o le vai magalo i luga o lenei paneta? Mata na mafai ona Ia filifilia se isi nofoaga e sili atu e fai ma faatusa o le maualalo o le o’oo’o na Ia afio i ai ma lea na Ia toe tu mai ai?”

Mauga: “O mauga e le faigofie ona aea. I aso la, e pei foi o aso nei, na valaauina e le Alii Ona soo e feaei i mauga e faamamafa i ai le lavasiga o le taumafaiga ma le usiusitai. O le a Ia fai atu lea lava mea ia te oe, faafaataoto ma atonu e fai atu tonu foi.”

Olive: “Sa afio mai Iesu i le auvae o le Mauga o Olive e ausia ai le vaega muamua o le Togiola. O lenei mea sa Ia faia i le Faatoaga o Ketesemane. O le upu Ketesemane e sau mai aa upu Eperu e lua: gath, o lona uiga o le ‘oomi,’ ma le shemen, o le uiga o le ‘suauu,’ e faapitoa lava i le [suauu] o le olive.

“O nei olive sa oomia i lalo o le mamafa o ni uilimaa tetele e tatau mai ai i fafo le suauu taua. O Keriso la i le Faatoaga i Ketesemane sa oomia moni lava i lalo o le mamafa o agasala a le lalolagi. Sa afu o Ia i mataua tetele o le toto—o ‘suauu’ o lona soifua—ia na sau mai i puafu uma lava. (Tagai Luka 22:44; MF&F 19:18.)”

Ulupoo: “O le Faasatauroga sa faia i se mauga na ta’ua o Kolotoka (Eperu) po o Kalevaria (Latina) o lona uiga ‘o le ulupoo.’ O le ulupoo na faatusa i le oti. I se nofoaga faapenei, sa faamaeaina ai le taulaga togiola. I luga o le satauro, sa siiae ai le Faaola o le lalolagi i luga a’e o le oti i le tulaga taua e aupito maoae i tulaga taua uma e mafai ona maua—o le iloaina ma le moni o le mana o le Alii i le oti.”