O Le Upu Mulimuli
O Le Faamanatuga ma le Avea Atili e Faapei o Keriso
Saunia e Elder D. Todd Christofferson
O Le Korama a Aposetolo e Toasefululua
Mai se lauga o le konafesi aoao o Oketopa 2017.
E matagofie le mafaufau loloto i le faatusa o le faamanatuga o le Talisuaga a le Alii. Ua faatusa le falaoa ma le vai i le tino ma le toto o Ia o le Areto o le Ola ma le Vai Ola (tagai Ioane 4:10), e faamanatu mai ai lava ma le loto nutimomoia ia i tatou le tau na Ia totogiina e togiolaina ai i tatou. A o tofitofi le falaoa, tatou te manatua ai le tino na tuimomomoina o le Faaola. Pe a tatou feinu i le vai, tatou te mafaufau i le toto na Ia faamaligiina i Ketesemane ma i luga o le satauro ma lona mana faapaia (tagai Mose 6:60).
Ae i se tulaga faafaatusa, o loo i ai se faauigaga sili atu o le aai i Lona tino ma feinu i Lona toto, ma o lena faauigaga o le teuloto o tomai ma uiga o Keriso… . A o tatou aai ma feinu i le falaoa ma le vai o le faamanatuga i vaiaso taitasi, o le a lelei lo tatou mafaufau pe o le a le atoatoa e tatau ai ona tatou faaaofia ai Ona uiga ma le mamanu o Lona soifua e aunoa ma se agasala i o tatou lava tagata. Semanu e le mafai e Iesu ona togiola mo agasala a isi vagana ai e leai se agasala a Ia Lava. Talu ai e leai se aia a le faamasinotonu ia te Ia, o lea ua mafai ai e Ia ona ofoina mai o Ia lava e suitulaga ia i tatou, ina ia faamalie ai le faamasinoga tonu ma aumai ai le alofamutimutivale. …
O le ‘aai i le tino o le Faaola ma feinu i Lona toto o lona uiga o le tuuese mai o tatou olaga soo se mea e le ogatusa ma se uiga faaKeriso ma avea Ona uiga faaleatua mo i tatou lava. O le faauigaga tele atu lea o le salamo: e le gata i le liliu ese mai agasala ua tuanai ae “o se liliu atu o le loto ma le agaga i le Atua” (tagai Taiala i Tusitusiga Paia, “Salamo”). O le a faaali mai e le Atua ia i tatou o tatou faaletonu ma vaivaiga, ae o le a Ia fesoasoani foi ia tatou liliuina vaivaiga i malosiaga (tagai Eteru 12:27). Afai tatou te fesili ma le lotofaamaoni, “Se a se mea ou te lei faia?” (Mataio 19:20) O le a Ia le tuua lava i tatou e taumate, ae o le a Ia tali mai i le alofa ina ia tatou fiafia. Ma o le a Ia tuu maia ia i tatou le faamoemoe.